ବିଚାର୍ ଓଡ଼ୋଃ ବାଞ୍ଚାଅଃ
1 ଅକନ୍କ ଆଇଙ୍ଗ୍କେ କାକ କୁଲି ତାଇକେନା, ଇନ୍କୁ ଆଇଙ୍ଗ୍କେ ଦାଣାଁଇଙ୍ଗ୍ ତାନା। ଅକନ୍କ ଆଇଙ୍ଗ୍କେ କାକ ଦାଣାଁ ତାଇକେନା, ଇନ୍କୁ ଆଇଙ୍ଗ୍କେ ଦାଣାଁ ନାମ୍ କେଦିୟାଁ। ଅକନ୍ ଦିଶୁମ୍ରେନ୍ କିଲିକ ଆଇଁୟାଃ ନୁତୁମ୍ ସାବ୍କେଦ୍ତେ କାକ କେଡ଼ା, ଇନ୍କୁକେ ଆଇଙ୍ଗ୍ କାଜିକେଦ୍କଆ, "ନେଲେପେ, ଆଇଙ୍ଗ୍ ଆପେଲଃ ମେନାଇଁୟାଃ" ମେନ୍ତେ ଇନ୍କୁଲଃ ଜାଗାର୍ କେଦା। 2 ଅକନ୍ ଆକଆଃ ଆପ୍ନାଃ ଇଛାସାନାଙ୍ଗ୍ ଲେକା ଏତ୍କାନ୍ ହରାରେ ସେସେନ୍ ତାନାକ, ଏନ୍ ଲେକାନ୍ ଏତ୍କାନ୍ ହଡ଼କ ନାଗେନ୍ତେ ସବେନ୍ ଇମ୍ତା ତିଃଇ ଜିଲିଙ୍ଗ୍କେଦ୍ତେ ମେନାଇଁୟାଃ। 3 ଇନ୍କୁ ବାଗାନ୍ରେ ରାକାମ୍ ରାକାମ୍ ଦାଣେଁକ ଏମ୍ତାନା ଓଡ଼ୋଃ ଇଟା ଚେତାନ୍ରେ ଧୁଆନ୍ ଜୁଲ୍କେଦ୍ତେ, ଆଇଁୟାଃ ଆୟାର୍ରେ ସବେନ୍ ଇମ୍ତା ଆଇଙ୍ଗ୍କେ ଖିସ୍ ରିକାଇଙ୍ଗ୍ ତାନା। 4 ଇନ୍କୁ ତପା ଠାୟାଦ୍କରେ ଦୁବ୍ବାଡ଼ା ତାନା ଓଡ଼ୋଃ ଉକୁକାନ୍ ଠାୟାଦ୍କରେ ବିତାଅତାନା। ଇନ୍କୁ ସୁକୁରି ମାସ୍କ ଜମ୍ତାନା ଓଡ଼ୋଃ ଇନ୍କୁଆଃ ଡୁଭାରେ ସତ୍ରା ମାସ୍ରାଃ ଝଡ଼୍ ମେନାଃ। 5 ମେନ୍ଦ ଇନ୍କୁ କାଜିତାନା, ଆପେ ସାଙ୍ଗିନ୍ରେ ତାଇନ୍ପେ, ଆଇଁୟାଃ ହେପାଦ୍ତେ ଆଲପେ ହିଜୁଃ, ଚିୟାଃଚି ଆପେତାଃ ଏତେ ଆଇଙ୍ଗ୍ ପୁରାଃଗି ପାବିତାର୍ ମେନାଇଁୟାଃ। ନେ ହଡ଼କ ଆଇଁୟାଃ ନାଗେନ୍ତେ ଜୁଲଃତାନ୍ ସେଙ୍ଗେଲ୍ ଲେକାକ ତାନ୍କ।
6 ନେଲେପେ, ଆଇଁୟାଃ ଆୟାର୍ରେ ନେଆଁ ଅଲ୍କେଦ୍ତେ ମେନାଃ, "ଆଇଙ୍ଗ୍ ହାପାକେଦ୍ତେ କାଇଙ୍ଗ୍ ତାଇନାଃ, ଏନାରେୟାଃ ନାଲା ଏମାକଆଇଙ୍ଗ୍, ହେଗି ଆଇଙ୍ଗ୍ ଇନ୍କୁଆଃ କୟଙ୍ଗ୍ରେ ଏମ୍ରୁହାଡ଼େୟାଇଙ୍ଗ୍।" 7 ପ୍ରାଭୁ କାଜିତାନାଏ, "ଆଇଙ୍ଗ୍ ଇନ୍କୁଆଃ ଓଡ଼ୋଃ ଇନ୍କୁଆଃ ପୁର୍ଖା ଆପୁକଆଃ ପାପ୍ ନାଗେନ୍ତେ ଇନ୍କୁଆଃ ଚେତାନ୍ରେ ସାଜାଇ ଆଉୱେୟା। ଚିୟାଃଚି ଇନ୍କୁ ହଁଗି ବୁରୁ ଚେତାନ୍ରେ ଧୁଆନ୍ ଜୁଲ୍କେଦା ଓଡ଼ୋଃ ଟନାଙ୍ଗ୍କରେ ଆଇଁୟାଃ ନିନ୍ଦା ଓଡ଼ୋଃ ହିସିଙ୍ଗା କାମିକ ରିକାକେଦା। ଏନାମେନ୍ତେ ଇନ୍କୁକେ ଆଇଙ୍ଗ୍ ସିଦା ଦିପିଲିରେ ରିକାକାଦ୍ କାମିକରାଃ ନାଲା ଆକଆଃ ହନ୍କକେ ଏମାକଆଇଙ୍ଗ୍।"
8 ପ୍ରାଭୁ କାଜିତାନାଏ, "ଦାଖ୍ ଜ’ରାଃ ଝୁପା ଏତେ ଜେତାନ୍ ରାସି କା ଅଡଙ୍ଗ୍ ରେୟାଃ ଆସ୍ରା କା ତାଇନ୍ ରେହ, ହଡ଼କ କାଜିତାନା, ନେଆଁକେ ଆଲପେ ଜିୟନ୍ ରିକାୟା, ନେଆଁରେ ଚିମିନ୍ ବୁଗିନ୍ ଆଶିଷ୍ ତେୟାଃକ ମେନାଃ। ଆଇଙ୍ଗ୍ ଆଇଁୟାଃ ସେୱା ରିକାତାନ୍ ଦାସିକଲଃ ଏନ୍ଲେକା ରିକାୟା। ସବେନ୍କକେ କାଇଙ୍ଗ୍ ଜିୟନ୍କଆ। 9 ଆଇଙ୍ଗ୍ ଯାକୁବ୍ଆଃ କିଲି ଏତେ ମିଆଦ୍ କିଲି ଓଡ଼ୋଃ ଯିହୁଦା ଆଇଁୟାଃ ବୁରୁ ଏତେ ମିଆଦ୍ ଆକ୍ତେୟାର୍ନିଃ ଉନୁଦୁବ୍ ରିକାୟା। ଓଡ଼ୋଃ ଆଇଁୟାଃ ସାଲାକାନ୍ ହଡ଼କ ଏନା ଆକ୍ତେୟାର୍ ରିକାୟା ଓଡ଼ୋଃ ଆଇଁୟାଃ ଦାସିକ ଏନ୍ତାଃରେ ତାଇନାଃକ। 10 ଓଡ଼ୋଃ ଆଇଁୟାଃ ଅକନ୍ ହଡ଼କ ଆଇଙ୍ଗ୍କେ ଦାଣାଁକିୟାଁ, ଇନ୍କୁ ନାଗେନ୍ତେ ଶାରୋନ୍ ନୁତୁମ୍ ବୁରୁବେଡ଼ାରେ ମିଣ୍ଡି ଗୋଟ୍ ତାଇନଃ ଠାୟାଦ୍ ଓଡ଼ୋଃ ଆଖୋର୍ ଢିପା ଉରିଃକ୍ କଆଃ ତାଇନ୍ ଠାୟାଦ୍ ହୁଇନାଃ।
11 "ମେନ୍ଦ ଆପେସବେନ୍ ପ୍ରାଭୁଆଃ ନୁତୁମ୍କେ ଓଡ଼ୋଃ ପାବିତାର୍ ବୁରୁକେ ରିଡ଼ିଙ୍ଗ୍ ତାନାପେ, ‘ଗାଦ୍65:11 କିସ୍ମାତ୍ରାଃ ମାହାପୁରୁ ମାହାପୁରୁ’ ନୁତୁମ୍ତେ ବେଦି ବାଇତାନା ଓଡ଼ୋଃ ‘ମେନି65:11 କିସ୍ମାତ୍ରାଃ ମାହାପୁରୁ ମାହାପୁରୁ’ ନାଗେନ୍ତେ ମେସାକାନ୍ ଦାଖ୍ରାସି ବାଇତାନା। 12 ଆଇଙ୍ଗ୍ ଆପେୟାଃ କିସ୍ମାତ୍କେ ସାଲାକାଦା, ତାରାଉଡ଼ିଲଃ ମାଗଃ ନାଗେନ୍ତେ ଆପେ ଇକ୍ଡ଼ୁମ୍ ରିକାନାଃ। ଚିୟାଃଚି ଆଇଙ୍ଗ୍ ଆପେକେ କେଡ଼ା ଇମ୍ତା ଜେତାଏ କାପେ କାଜିରୁହାଡ଼୍ କେଦିୟାଁ ଓଡ଼ୋଃ ଆଇଙ୍ଗ୍ ଜାଗାର୍ ଇମ୍ତା ଜେତାଏ ହଁ ଆଇଁୟାଃ କାଜି କାପେ ଆୟୁମ୍କେଦା। ମେନ୍ଦ ଆଇଁୟାଃ ଆୟାର୍ରେ ଅକଆଃ ପାପ୍ ତାନାଃ ଏନ୍ ଏତ୍କାନ୍ କାମିକ ରିକାକେଦା ଓଡ଼ୋଃ ଅକଆଃରେ ଆଇଙ୍ଗ୍ କାଇଙ୍ଗ୍ ସୁକୁଆଃ, ଏନା ଆପେ ରିକା ନାଗେନ୍ତେ ସାନାଙ୍ଗ୍ତାନା। 13 ଏନାମେନ୍ତେ ପେଡ଼େୟାନ୍ ପ୍ରାଭୁ କାଜିତାନାଏ, ଆଇଁୟାଃ ସେୱାତାନ୍କ ଜଜମ୍ ପୁରାଃ ନାମେୟା, ମେନ୍ଦ ଆପେ ରେଙ୍ଗେଃତେ ତାଇନାଃ। ଆଇଁୟାଃ ସେୱାତାନ୍କ ନୁଏଁ ତେୟାଃ ନାମେୟାଃ, ମେନ୍ଦ ଆପେ ତେତାଙ୍ଗ୍ ତାଇନାଃପେ। ଆଇଁୟାଃ ସେୱାତାନ୍କ ରାସ୍କାତେ ତାଇନାଃ, ମେନ୍ଦ ଆପେ ଗିହୁଗଃଆ। 14 ଆଇଁୟାଃ ଦାସିକ ମନ୍ସୁରୁଦ୍ରାଃ ରାସ୍କାତେ ଦୁରାଙ୍ଗ୍ୟେଁଆ, ମେନ୍ଦ ଆପେ ପୁରାଃ ଦୁକୁତେ ରାଆଃ ରିକାୟା ଓଡ଼ୋଃ ମନ୍ସୁରୁଦ୍ରାଃ ଖିସ୍ ହରାତେ ପୁରାଃଗି ଏୟମ୍ ରିକାୟା। 15 ଓଡ଼ୋଃ ଆପେ ସବେନ୍ ଆଇଁୟାଃ ସାଲାକାନ୍ ହଡ଼କତାଃରେ ଆପେୟା ନୁତୁମ୍କେ ସାର୍ପାଅ ରିକାୟା ଓଡ଼ୋଃ ପ୍ରାଭୁ ପାର୍ମେଶ୍ୱାର୍ କିରିୟା କେଦ୍ତେ ଆପେକେ ଗଗଏଃ ପେୟା ଓଡ଼ୋଃ ଇନିଃ ଆୟାଃ ଦାସିକକେ ଏଟାଃ ନୁତୁମ୍ରେ ନୁତୁମ୍କଆ। 16 ଅକ ହଡ଼ ଅତେରେ ଆପାନ୍କେଗି ଧାଇନ୍ ମେନ୍ତେ କାଜିନାଃ, ଇନିଃ ସାର୍ତି ପାର୍ମେଶ୍ୱାର୍ତାଃଏତେ ଆପାନ୍କେଗି ଧାଇନ୍ ମେନ୍ତେ କାଜିନାଃ। ଅକ ହଡ଼ ଅତେଦିଶୁମ୍ରେ କିରିୟା ରିକାଃଏ, ଇନିଃ ସାର୍ତି ପାର୍ମେଶ୍ୱାର୍ଆଃ ହରାତେ କିରିୟା ରିକାଃଏ। ଚିୟାଃଚି ସିଦା ଦିପିଲିରେୟାଃ ଦୁକୁହାସୁ ସବେନାଃ ନିର୍ୟାନା ଓଡ଼ୋଃ ଏନ୍ ସବେନାଃ ଆଇଁୟାଃ ଆୟାର୍ଏତେ ଉକୁଆକାନା।"
ମିଆଦ୍ ନାୱା ବାବାଇ
17 ନେଲେପେ, ଆଇଙ୍ଗ୍ ନାୱା ସିର୍ମାରେୟାଃ ସବେନାଃକେ ଓଡ଼ୋଃ ଅତେକେ ବାଇୟା। ଓଡ଼ୋଃ ସିଦା ଦିପିଲିରେୟାଃ ବିଷାଏକ କା ପାହାମ୍ ରିକାନାଃ ଚାଏ ମନ୍ସୁରୁଦ୍ରେ ପାହାମ୍ କା ହିଜୁଆଃ। 18 ମେନ୍ଦ ଆଇଙ୍ଗ୍ ଅକ ସବେନାଃ ବାଇୟାଇଙ୍ଗ୍, ଏନାରେ ଆପେ ଜାନାଅଗି ଲାନ୍ଦା ଓଡ଼ୋଃ ରାସ୍କା ରିକାଏପେ। ଚିୟାଃଚି ନେଲେପେ, ଆଇଙ୍ଗ୍ ଯୀରୁଶାଲେମ୍କେ ପୁରାଃ ରାସ୍କାତେ ପେରେଜେୟା ଓଡ଼ୋଃ ଏନାରେନ୍ ହଡ଼କକେ ଲାନ୍ଦାତାନ୍ ହଡ଼କ ଲେକା ବାଇକଆ। 19 ଯୀରୁଶାଲେମ୍ ନାଗେନ୍ତେ ଆଇଙ୍ଗ୍ ପୁରାଃ ରାସ୍କା କାନା ଓଡ଼ୋଃ ଆଇଁୟାଃ ହଡ଼କ ନାଗେନ୍ତେ ରାସ୍କା ରିକାୟା। ଓଡ଼ୋଃ ଏନାରାଃ ଥାଲାରେ ଜେତାନ୍ ରାନାଃ ଚାଏ ଏୟମ୍ ରେୟାଃ ସାଡ଼ି କା ଆୟୁମଃଆ। 20 ଏନ୍ତାଃରେ ଜେତାନ୍ ସିଟିୟା ଚାଏ ପୁରାଃ ହାଡ଼ାମ୍ ହଡ଼ କାଏ ତାଇନାଃ। ଅକଏ ମିଦ୍ଶାଅ ବାରାଷ୍ ପୁରାକେଦ୍ତେ ଗଜଃଆ ଇନିଃ ସେପେଡ଼େଦ୍ ମେନ୍ତେ କାଜିୟଃଆ। ମେନ୍ଦ ଅକଏ ମିଦ୍ଶାଅ ବାରାଷ୍ କା ପୁରାକେଦ୍ତେ ଗଜଃଆ, ଇନିଃ ସାର୍ପାଅ କାନାଏ ମେନ୍ତେ କାଜିୟଃଆ। 21 ଇନ୍କୁ ଅଡ଼ାଃ ବାଇୟାଃକ ଓଡ଼ୋଃ ଏନ୍ତାଃରେ ଇନ୍କୁ ତାଇନାଃ। ଦାଖ୍ବାକ୍ଡ଼ିରେ ଦାଖ୍ନାଡ଼ି ରଏକେଦ୍ତେ ଏନାରାଃ ଜ ଇନ୍କୁ ଜମେୟାଁକ। 22 ଇନ୍କୁ ଅଡ଼ାଃ ବାଇୟେରେ ଏଟାଃକ ଏନ୍ତାଃରେ କାକ ତାଇନାଃ ଚାଏ ଦାଖ୍ନାଡ଼ି ରଏରେ ଏଟାଃକ ଜମ୍ କାକ ଦାଡ଼ିୟାଃ। ଚିୟାଃଚି ଆଇଁୟାଃ ହଡ଼କଆଃ ଦିପିଲି ଦାରୁ ଲେକା ହୁଇନାଃ। ଆଇଁୟାଃ ସାଲାକାନ୍ ହଡ଼ ଆକଆଃ କାମିରେୟାଃ ନାଲା ପୁରାଃ ଦିପିଲି ଜାକେଦ୍ ଜମେୟାଃ। 23 ଇନ୍କୁ ସାମାଗି କାକ କାମିୟା, ଚାଏ ଇନ୍କୁଆ ଜାନାମାକାନ୍ ହନ୍କ ଅତେରେ ସିଗିଦ୍ କାକ ରିକାନାଃ। ଚିୟାଃଚି ଇନ୍କୁ ଓଡ଼ୋଃ ଇନ୍କୁଆଃ କିଲିକ ପ୍ରାଭୁଆଃ ଆଶିଷ୍ ନାମାକାଦ୍ ହଡ଼କ ହୁଇନାଃ। 24 ନେ’ଲେକା ହବାଅଃଆ, ଇନ୍କୁ ଆଇଙ୍ଗ୍କେ ହାକାଅ ସିଦାରେ ଇନ୍କୁକେଇଙ୍ଗ୍ କାଜିରୁହାଡ଼୍କଆ। ଇନ୍କୁ ଜାଗାର୍ ତାନ୍ଲଃଗି ଆଇଙ୍ଗ୍ ଇନ୍କୁଆ କାଜି ଆୟୁମେୟା। 25 ପ୍ରାଭୁ କାଜିତାନା, ତୁୟୁ ଓଡ଼ୋଃ ମିଣ୍ଡି ହନ୍ ମିଦ୍ତାଃରେ ତାଇନାଃ। ଟେଡ଼ଃ ଉରିଃକ୍ ଲେକା ତାସାଦ୍ ଜମେୟାଃ। ମେନ୍ଦ ବିଙ୍ଗ୍ ଧୁଡ଼ି ଜମେୟାଃ। ଇନ୍କୁ ଆଇଁୟାଃ ପାବିତାର୍ ବୁରୁ ଠାୟାଦ୍ରେୟାଃ ଜେତ୍ନାଃ କାକ ନକ୍ସାନ୍ ରିକାୟା।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)