ଅତେଦିଶୁମ୍କେ ପ୍ରାଭୁଆଃ ବିଚାର୍
1 ପ୍ରାଭୁ କାଜିତାନାଏ, "ସିର୍ମା ଆଇଁୟାଃ ରାଜ୍ଗାଦି ଓଡ଼ୋଃ ଅତେ ଆଇଁୟାଃ କାଟାଗାଣ୍ଡୁ। ଆପେ ଆଇଁୟାଃ ନାଗେନ୍ତେ ଚିଲ୍କାନ୍ ଅଡ଼ାଃ ବାଇୟାପେ ? ଅକ ଠାୟାଦ୍ ଆଇଁୟାଃ ରୁଡ଼ୁନ୍ ଠାୟାଦ୍ ହବାଅଃଆ। 2 ପ୍ରାଭୁ କାଜିତାନାଏ, ଚିୟାଃଚି ତିଃଇ ତାଇଁୟାଃ ନେ ସବେନାଃ ବାଇୟାକାଦାଏ। ଓଡ଼ୋଃ ଏନାମେନ୍ତେ ନେ ସବେନାଃ କା ଚି ଉନୁଦୁବ୍ୟାନା ?" ମେନ୍ଦ ଅକଏ ଲେବେଃ, ମନ୍ରେ ନାରାଦୁରା ଓଡ଼ୋଃ ଆଇଁୟାଃ ବାଚାନ୍ ବର ତାନାଏ, ନେ ଲେକାନ୍ ହଡ଼କେ ଆଇଙ୍ଗ୍ ନେଲିୟା।
3 "ଅକଏ ଉରିକ୍ ଗଗଏଃ ରିକାଏଃ ଇନିଃ ହଡ଼ ଗଗଏଃନିଃ ଲେକା ହବାନାଃ। ଅକଏ ମିଣ୍ଡି ଦାଣେଁ ରାକାବିତାନାଏ, ଇନିଃ ସେତାରାଃ ହଟଃ ହାଦ୍ନିଃ ଲେକା ହୁଇନାଃ। ଅକଏ ଦାନ୍ ରାକାବେ ତାନା, ଇନିଃ ସୁକୁରିରାଃ ମାୟୋମ୍ ହିର୍ଚିତାନ୍ ଲେକାନିଃ ହବାନାଃ। ଅକଏ ବୁଗିନ୍ସହାନ୍ ଧୁଆନ୍ ଅଣ୍ଡର୍ ରିକାଃଏ, ଇନିଃ ମୁରୁତ୍କେ ସେୱାତାନ୍ ଲେକାନିଃ ହୁଇନାଃ। ହାଁ, ଇନ୍କୁ ଆକଆଃ ହରାକ ସାଲାକାଦା। ଚିୟାଃଚି ଇନ୍କୁଆଃ ଜୀଉ କା ଧାର୍ମାନ୍ ହିସିଙ୍ଗା କାଜିକରେ ଆଶିଷ୍ ନାମେତାନା। 4 ଆଇଙ୍ଗ୍ ହଁ ଆକ ଅକ କାଜିକେ ବରଏତାନା ଏନ୍ କାଜିଗି ଇନ୍କୁଆଃ ଚେତାନ୍ରେ ହବାଅଃଆ। ଆଇଙ୍ଗ୍ କେଡ଼ା ଇମ୍ତା ଜେତାଏ କାକ ଆୟୁମ୍କେଦା, ଆଇଙ୍ଗ୍ ଜାଗାର୍ତାନ୍ ଇମ୍ତା ଜେତାଏ କାକ ଆୟୁମ୍କେଦା। ଆଇଁୟାଃ ଆୟାର୍ରେ ଅକଆଃ ଏତ୍କାନାଃ ତାନାଃ, ଏନ୍ କାମିଗି ଇନ୍କୁ ରିକାକେଦା। ଆଇଙ୍ଗ୍ ଅକଆଃ କାଇଙ୍ଗ୍ ସୁକୁଆଃ, ଏନାଗି ଇନ୍କୁ ସାଲାକେଦା।"
5 ପ୍ରାଭୁଆଃ ବାଚାନ୍ରେ ଆପେ ଯେ ଥାର୍ଥାରାଅଃ ତାନାପେ, ଆପେ ଇନିୟାଃ କାଜି ଆୟୁମେପେ, ଆପେୟାଃ ଅକ ହାଗାକ ଆପେକେ ହିସିଙ୍ଗାପେ ତାନାକ, ଆଇଁୟାଃ ନୁତୁମ୍ ନାଗେନ୍ତେ ଆପେକେ ସାଙ୍ଗିନ୍ ରିକାତାନାକ, ଇନ୍କୁ କାଜିକାଦା, ଆଲେ ଚିଲ୍କା ଆପେୟାଃ ରାସ୍କା ନେଲ୍ ଦାଡ଼ିୟାଃଲେ, ଏନାମେନ୍ତେ ପ୍ରାଭୁଆଃ ମାଇନାନ୍ ହବାଅଃକା। ମେନ୍ଦ ଇନ୍କୁ ଗିହୁଗଃକାକ। 6 ଆୟୁମେପେ, ନାଗାର୍ ଥାଲା ଭିତାର୍ରେ ଲାଡ଼ାଇରେୟାଃ ସାଡ଼ି ଆୟୁମଃତାନା, ମାନ୍ଦିର୍ ଏତେ ମିଆଦ୍ ସାଡ଼ି ଆୟୁମଃତାନା। ନେଆଁ ପ୍ରାଭୁଆଃ ସାଡ଼ି, ଇନିଃ ଆୟାଃ ବାଇରିକକେ ଆକଆଃ କାମିରାଃ ନାଲାକ ଏମାକତାନାଏ।
ଯୀରୁଶାଲେମ୍ଲଃ ରାସ୍କା
7 "ଦୁକୁ ହିଜୁଃ ସିଦାରେ ଇନିଃ ହନ୍ ଜାନାମ୍କିୟାଃ। ହାମ୍ବାଲ୍ରୋୱା ଦୁକୁ ହିଜୁଃ ସିଦାରେ ହନ୍ ଜାନାମ୍ୟାନା। 8 ନେ ଲେକାନ୍ କାଜି ଅକଏ ଚିଉଲା ଆୟୁମାକାଦାଏ ଚାଏ ନେଲାକାଦାଏ ? ଚିୟାଃ ମୁସିଙ୍ଗ୍ରେ ଅକ ଦିଶୁମ୍ ବାଇନା ? ଚିୟାଃ ଜେତାନ୍ କିଲି ମୁସିଙ୍ଗ୍ତେ ହବାଅଃଆ ? ସିୟୋନ୍ ହାମ୍ବାଲ୍ରୋୱା ଦୁକୁ ନାମ୍କେଦ୍ଚି, ଇନିଃ ଆୟାଃ ହନ୍କକେ ଜାନାମ୍ କେଦ୍କଆ। 9 ପ୍ରାଭୁ କାଜିତାନାଏ, ହାମ୍ବାଲ୍ରୋୱା ଦୁକୁ ଆଉ ସେଟେର୍ କେଦ୍ତେ ଚିୟାଃ ଆଇଙ୍ଗ୍ ହନ୍ ଜାନାମ୍ ରେୟାଃ ପେଡ଼େଃ କାଇଙ୍ଗ୍ ଏମାଇୟା ? ଆପେୟାଃ ପାର୍ମେଶ୍ୱାର୍ କାଜିତାନାଏ, ହନ୍ ଜାନାମ୍ ରେୟାଃ ପେଡ଼େଃ ଆଇଙ୍ଗ୍ ଯେ ଏମାଃ, ଆଇଙ୍ଗ୍ ଇନିୟାଃ ହାମ୍ବାଲ୍ରୋୱା ତେୟାଃକେ ଚିନାଃ ସାଙ୍ଗିନ୍ ରିକାୟା ?"
10 ହେ ଯୀରୁଶାଲେମ୍କେ ଦୁଲାଡ଼୍ତାନ୍ ସବେନ୍କ,
ଆପେ ଇନିଃଲଃ ଲାନ୍ଦାରେ ତାଇନ୍ପେ ଓଡ଼ୋଃ ଇନିଃଲଃ ରାସ୍କାନ୍ପେ।
ଇନିୟାଃ ବିଷାଏରେ ସବେନ୍ ରାଆଃତାନ୍କ,
ଆପେ ରାସ୍କା ତାନ୍ଲଃ ଇନିଃଲଃ ପୁରାଃଗି ରିଜ୍ରାଙ୍ଗ୍ ରିକାଏପେ।
11 ଆପେ ଇନିୟାଃ ଜୀଉରାଡ଼େଃରେୟାଃ ସୁକୁ ନାମେୟାପେ,
ଆପେ ପେଡ଼େୟାନ୍ ରେୟାଃ ଜଜମାଃ ଜମ୍କେଦ୍ତେ ଇନିୟାଃ ପୁରାଃ ମାଇନାନ୍ରେୟାଃ ରାସ୍କାରେ ରାସ୍କାନାଃପେ।
12 ଚିୟାଃଚି ପ୍ରାଭୁ ନେ କାଜି କାଜିତାନା, "ଗାଡ଼ା ଟୁଡାକେଦ୍ତେ ଲିଙ୍ଗିୟଃତାନ୍ ଲେକା ଇନିଃତାଃରେ ଜୀଉରାଡ଼େଃ ଓଡ଼ୋଃ ସୁକୁ ପସାଇଦିୟା। ଓଡ଼ୋଃ ଉଛ୍ଲାଅ କେଦ୍ତେ ଲିଙ୍ଗିୟଃତାନ୍ ଦାଆଃ ଲେକା ପୁରାଃ କିଲିରେନ୍ ହଡ଼କଆଃ ଖୁର୍ଜି ଇନିଃତାଃତେ ହିଜୁଃଆ। ଆପେ ଇନିୟାଃ କୟଙ୍ଗ୍ରେ ସୁସୁନ୍ ଲେକା ଇନିଃ ଆୟାଃ କୟଙ୍ଗ୍ରେ ଦହକେଦ୍ତେ ଆସୁଲ୍ପେୟା। 13 ଏଙ୍ଗା ଚିଲ୍କା ହନ୍କେ ସୁସାରି ତାନାଏ, ଏନ୍ଲେକା ଆଇଙ୍ଗ୍ ଆପେକେ ସୁସାର୍ ପେୟା। ଆପେ ଯୀରୁଶାଲେମ୍ରେ ଜୀଉସୁକୁ ନାମେୟା।" 14 ଓଡ଼ୋଃ ନେଆଁ ନେଲ୍କେଦ୍ତେ ଆପେୟାଃ ମନ୍ସୁରୁଦ୍ ରାସ୍କା ରିକାୟା ଓଡ଼ୋଃ ଆପେ ହାରିୟାର୍ ତାସାଦ୍ ଲେକା ହାରା ଇଦିୟଃଆପେ। ପ୍ରାଭୁଆଃ ତିଃଇ ଆୟାଃ ଦାସିକଆଃ ଚେତାନ୍ରେ ଆଶିଷ୍ ଏମେୟା ଓଡ଼ୋଃ ବାଇରିକଆଃ ବିରୁଧ୍ରେ ଖିସ୍ଅଃଆ।
ପାର୍ମେଶ୍ୱାର୍ଆଃ ମାଇନାନ୍ ଓଡ଼ୋଃ ଟୁଣ୍ଡୁ ବିଚାର୍
15 ନେଲେପେ, ପ୍ରାଭୁ ସେଙ୍ଗେଲ୍ ରେୟାଃ ପୁରାଃ ମାସ୍କାଲ୍ତେ ହିଜୁଆଃ, ଆନ୍ଧିହୟ ହିଜୁଃତାନ୍ ଲେକା ଇନିୟାଃ ସାଦମ୍ଗାଡ଼ିକ ହିଜୁଃତାନା। ଇନିଃ ପୁରାଃ ଖିସ୍ରେୟାଃ ସାଜାଇ ଓଡ଼ୋଃ ସେଙ୍ଗେଲ୍ତେ ଚେତାଅ ଏମ୍ ନାଗେନ୍ତେ ହିଜୁଆଃ। 16 ଚିୟାଃଚି ପ୍ରାଭୁ ସେଙ୍ଗେଲ୍ତେ ଓଡ଼ୋଃ ତାରାଉଡ଼ିତେ ସବେନ୍ ମାନୱାକଆଃ ବିଚାର୍ ରିକାୟା। ପ୍ରାଭୁଆଃ ହରାତେ ମାଆଃ ଗଗଏଃ ହଡ଼କ ପୁରାଃଗି ହୁଇନାଃ।
17 ପ୍ରାଭୁ କାଉରିକେଦ୍ତେ କାଜିତାନାଏ, "ଅକନ୍କ, ଆମାଃ ମାନ୍ଦିର୍ ଅଡ଼ାଃରାଃ କୁଣ୍ଡାମ୍ସାଃରେ ତାଇନ୍ତାନ୍ ବାଗାନ୍ତେ ସେନଃ ନାଗେନ୍ତେ ଆପାନ୍କେ ପାବିତାର୍ ଓଡ଼ୋଃ ଫାର୍ଚି ରିକାଏତାନା। ଓଡ଼ୋଃ ଅକନ୍କ ସୁକୁରି ମାସ୍ ଓଡ଼ୋଃ ହୁନି ମାସ୍ ଓଡ଼ୋଃ ଏତ୍କାନ୍ ମାସ୍କ ଜମେତାନା, ଇନ୍କୁ ସବେନ୍କ ମିସାତେ ଜିୟନ୍ ରିକାନାଃ। 18 ଚିୟାଃଚି ଆଇଙ୍ଗ୍ ଇନ୍କୁଆଃ କାଜିକାମି ଓଡ଼ୋଃ ଉଡ଼ୁଃ ପାହାମ୍କ ସାରିତାନାଇଙ୍ଗ୍। ଦିପିଲି ସେଟେର୍ ତାନା, ସବେନ୍ କିଲିକକେ ଓଡ଼ୋଃ ରାକାମ୍ ରାକାମ୍ ଜାଗାର୍ତାନ୍ ହଡ଼କକେ ମିଦ୍ତାଃରେ ହୁଣ୍ଡିକଆ। ଇନ୍କୁ ହିଜୁଆଃ ଓଡ଼ୋଃ ଆଇଁୟାଃ ମାଇନାନ୍କ ନେଲେୟା।
19 "ଆଇଙ୍ଗ୍ ଇନ୍କୁଆଃ ଥାଲାରେ ମିଆଦ୍ ଚିହ୍ନା ଦହେୟାଇଙ୍ଗ୍। ଓଡ଼ୋଃ ଇନ୍କୁଏତେ ବାଞ୍ଚାଅକାନ୍ କିଲିକକେ ଏଟାଃ ଏଟାଃ ଦିଶୁମ୍ ତର୍ଶିଶ୍, ପୁଲ୍, ଲୁଦ୍, ତୁବଲ୍ ଓଡ଼ୋଃ ଯାବନ୍, ଅକନ୍କ ଧାନୁ ସାସାବ୍କ ତାନ୍କ ଓଡ଼ୋଃ ସାଙ୍ଗିନ୍ରେ ତାଇନ୍ତାନ୍ ଟାପୁରେନ୍ ହଡ଼କ, ନିକୁ ସବେନ୍ ଆଇଁୟାଃ ମାନାରାଙ୍ଗ୍ କାଜିକେ କାକ ଆୟୁମ୍ ଚାଏ ଆଇଁୟାଃ ପେଡ଼େଃ କାକ ନେଲ୍। ନେ ସବେନ୍କକେ ଇନ୍କୁତାଃ କୁଲ୍କଆଇଙ୍ଗ୍ ଓଡ଼ୋଃ ଇନ୍କୁ ଏଟାଃ ଦିଶୁମ୍ରେନ୍କ ଥାଲାରେ ଆଇଁୟାଃ ମାନାରାଙ୍ଗ୍ କାଜିକେ ଉଦୁବେୟାକ।" 20 ଓଡ଼ୋଃ ପ୍ରାଭୁ କାଜିତାନାଏ, "ଚିଲ୍କା ଇସ୍ରାଏଲ୍ କିଲିକ ପ୍ରାଭୁଆଃ ଅଡ଼ାଃତେ ବୁଗିନାଃ ତେୟାଃରେ ଫାର୍ଚି ଜିନିଷ୍କ ବେଦିରେ ଦାଣେଁ ରାକାବ୍ ନାଗେନ୍ତେ ଆଉୱେତାନା, ଏନ୍' ଲେକା ଇନ୍କୁକେ ଆକଆଃ ସବେନ୍ ହାଗାକକେ ଓଡ଼ୋଃ କୁପୁଲ୍କକେ ପ୍ରାଭୁଆଃ ବେଦିରେ ଦାନ୍ ରାକାବ୍ ନାଗେନ୍ତେ ସବେନ୍ ଦିଶୁମ୍ ଏତେ ଇନ୍କୁ ସାଦମ୍କ, ସାଦମ୍ଗାଡ଼ି, ଉଁଟ୍, ନେ ସବେନାଃକକେ ଇନ୍କୁ ଜିନିଷ୍କ ଲାଦିତାନ୍ ଗାଧାକଆଃ ଚେତାନ୍ରେ ଆଇଁୟାଃ ପାବିତାର୍ ବୁରୁ ଯୀରୁଶାଲେମ୍ତେ ଆଉୱେକା।" 21 ଓଡ଼ୋଃ ପ୍ରାଭୁ କାଜିତାନାଏ, "ଆଇଙ୍ଗ୍ ଇନ୍କୁ ଥାଲା ଏତେ ଚିମିନ୍କକେ ଯାଜାକ୍ ଓଡ଼ୋଃ ଲେବୀ ହବାଅଃ ନାଗେନ୍ତେ ସାଲାକଆ।"
22 "ପ୍ରାଭୁ କାଜିତାନାଏ, ଚିୟାଃଚି ଆଇଙ୍ଗ୍ ଆଇଁୟାଃ ପେଡ଼େଃତେ ଅକ ନାୱା ଅତେ ଓଡ଼ୋଃ ସିର୍ମାରାଃ ସବେନାଃ ବାଇୟା, ଆଇଁୟାଃ ଆୟାର୍ରେ ଏନା ଚିଲ୍କା ଠାହାରାଅ କେଦ୍ତେ ତାଇନାଃ, ଏନ୍ଲେକା ଆପେୟାଃ କିଲିକ ଓଡ଼ୋଃ ଆପେୟାଃ ନୁତୁମ୍ ଜାନାଅଗି ତାଇନାଃ। 23 ଓଡ଼ୋଃ ମିଆଦ୍ ମାହିନାରାଃ ଆମାସ୍ ତାଃଏତେ ଏଟାଃ ମାହିନାରାଃ ଆମାସ୍ ଜାକେଦ୍ ଓଡ଼ୋଃ ମିଆଦ୍ ରୁଡ଼ୁନ୍ ହୁଲାଙ୍ଗ୍ ଏତେ ଏଟାଃ ରୁଡ଼ୁନ୍ ହୁଲାଙ୍ଗ୍ ଜାକେଦ୍ ସବେନ୍ ହଡ଼କ ଆଇଁୟାଃ ଆୟାର୍ରେ ସୁନୁସାର୍ ନାଗେନ୍ତେ ହିଜୁଃଆକ।" ନେଆଁ ପ୍ରାଭୁ କାଜିତାନାଏ। 24 "ଓଡ଼ୋଃ, ଇନ୍କୁ ବାହାରି ଅଡଙ୍ଗ୍ କେଦ୍ତେ ଅକନ୍କ ଆଇଁୟାଃ ବିରୁଧ୍ରେ କା ଧାର୍ମାନ୍ କାମିକ ରିକାକାଦାକ, ଇନ୍କୁଆଃ ଗୟାକାନ୍ ମାଁଡ଼ାକ ନେଲେୟା। ଚିୟାଃଚି ଇନ୍କୁଆଃ ତିଜୁକ କାକ ଜିଅନଃଆ। ଚାଏ ଇନ୍କୁଆଃ ସେଙ୍ଗେଲ୍ କା ଇଣିଁଜଃଆ। ଓଡ଼ୋଃ ଇନ୍କୁ ସବେନ୍ ଅତେରେ ଗିହୁଃ ଇଚିୟଃଆକ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)