1 Kwayele ŵandu ŵa ku Kiliati Yealimu ŵajawile ni kulijigala lisanduku lya lilangano lya Ambuje Akunnungu, ŵalijawisye ku nyuumba ji che Abinadabu, juŵatamaga ku chitumbi. Ŵantesile akundikwe kwa kwapopelela Akunnungu mwanagwe jwannume jwakuŵilanjikwa che Eleasali kuti aŵe jwakulilolela lisanduku lyo.

2 Lisanduku lya lilangano lya Ambuje Akunnungu lyatemi ku Kiliati Yealimu kwa yaka ishilini. Pa kele katema ko Ŵaisilaeli wose ŵaliji nkulilasika nombewo ŵapopesile kwa Ambuje Akunnungu kuti ŵakamusye.