Ezequiel 9

Maɖue Maɣɔsɔrɛse

1 Kere ne lonɔ Bosate ɔkpere ku silɔ teteree sɔ, "Mikɔ ɔmagɛ̃siare madzuɛ̃se mibɔ i ngbe. Ma ɔbiara si ɔla ikpira i kɔrɔ̃." 2 Ne lonya marɛrɛ̃ ikuɔ ɔbɔrɛ i Kakpagɛkɔ̃ kayogodɔ̃ isɛ, nga nto kanyɔ katikpe isɛ, ne ma ɔbiara ɔla ikpira i kɔrɔ̃ ame maba. Ɔrɛrɛ̃ ɔwɛ̃ wɔ lopia ɔkati ɖɔbɔrɔa ara fiɛ iratsɛrɛra ɔkoto ɔse i ɔ̃ kɔrɛ ɔwe i ma ndɛ̃. Mabo i kame ne maya i ayiwa isɔrɛkasege kuruɛ.

3 Kiniɔ ne Israel Ɣaa ikpawaĩ ɔbɔrɛ ikɛlɛ kato i makerubi kato, i ngbegɔ iɔse, ne ka ikɛlɛ isɔrɛyo kabɔrɛnya. Kere ne Bosate ɔkpere ɔrɛrɛ̃ wɔ lopia ɔkati ɖɔbɔrɔa ara fiɛ ɔwe iratsɛrɛra ɔkoto i ɔ̃ kɔrɛ. 4 Ne Bosate ɔɣere wũ sɔ, "Kɛlɛ aaki i Yerusalem ɔmagɛ̃siare ɔɖuɖu ame si asɛ, mma ɔɖuɖu nto mamararã so fiɛ mato sipini i anyanyara ɔɖuɖu wa mato mabara i ɔ̃ ame iti, ikparĩ i ma ntɔ̃."

5 Gɔ ame nto lokãatsue ne, ɔɣere mamama sɔ, "Misiai wũ si miɖue maturi i ɔmagɛ̃siare ame, midaanyɔ kuwɛ̃ nnya ɣee midaabara wũ kayiribielea. 6 Miɖue marɛrɛ̃kpakpa, maporoporoi gu mabitɛ, marɔ̃go gu mabiɛtɛ, ɣɛɛ midaaɖue kuwɛ̃ wɔ masɛ ikpo. Misɛ ne karɔ̃ i wũ isɔrɛyo ame." Ne ɔso masɛ karɔ̃ ne maɖue makpakpa ma lowe i isɔrɛyo katɔ̃.

7 Kere ne ɔɣere ma sɔ, "Mipukutura isɔrɛyo si misu maturi ma lokpi miyira kusarɛkɔ̃. "Mikɛlɛ!" Ne ɔso makɛlɛ ne masɛ maturi iɖue karɔ̃ iki i ɔmagɛ̃siare ɔɖuɖu ame. 8 Gɔ mato maɖue maturi fiɛ ikuti wũ ɔnɔwɛ̃ ne, lorɔ̃ losu anɔ lofu i karɔ̃, lobiɛ teteree loɣɛ sɔ, "Ao, Bosate Wɔ Nsiguso! Ato aawɔra Israel maturi ma lokuti ɔɖuɖu i fɔ sikpã teterea dzɛ aɖi afere i Yerusalem iso ame?"

9 Ɔtã me mmuai sɔ, "Israel iyo gu Yuda ikpi ɔɔfe imɔ, karɔ̃ ɔyigu ima ne ɔmagɛ̃siare ɔyigu itɔ̃me idaaɣɛ i ɔri iso. Masɛ maɣɛ sɔ, ' Bosate ɔɔsɛ̃ karɔ̃, Bosate iisɛ ɔnya.' 10 Ne ɔso loibanyɔ ma ku nnya ɣee lonyua lotsɛ ma, ɣɛɛ loakpadzɛ̃ nnɛ mabara losia i ma mɔmɔ ati iso."

11 Kere ne ɔrɛrɛ̃ wɔ mpia ɔkati ɖɔbɔrɔa arapia ku iratsɛrɛra ɔkoto i ɔ̃ kuruɛ ɔkpesegu itɔ̃me ɔbɔ ɔɣɛ sɔ, "Loɔbara lɛ kumɛgɔ aɣɛ."