Isaías 1

1 आमोस कै बेट्टे यशायाह का दर्शन, जिस ताहीं उसनै यहूदा अर यरुशलेम कै बारै म्ह उज्जियाह, योताम, आहाज, अर हिजकिय्याह नाम कै यहूदा कै राजयां कै दिनां म्ह पाया।

यहूदा का धोक्खा

2 यहोवा नै कह्या, हे सुर्ग सुण, अर हे धरती कान लगा; क्यूँके यहोवा कहवै सै: "मन्‍नै बाल-बच्यां का पालन-पोषण करया, अर उन ताहीं बढ़ाया भी, पर उननै मेरे तै बिश्वासघात करया। 3 बळध तो अपणे माल्‍लिक नै अर गधा अपणे माल्‍लिक की चरणी नै पिच्छाणै सै, पर इस्राएल मेरे ताहीं न्ही जाणदा, मेरी प्रजा विचार न्ही करदी।"*1:3 इस तुलना के जरिये यहूदियाँ की महा मूर्खता अर अहसान फरामोशी ताहीं दर्शाया गया सै।

4 हाय, या जात पाप तै किसी भरी सै! यो समाज अधर्म तै किसा लद्या होया सै! इस वंश के माणस किसे कुकर्मी सैं, ये बाल-बच्‍चे किस तरियां बिगड़े होए सैं! उननै यहोवा ताहीं छोड़ दिया, उननै इस्राएल के पवित्र परमेसवर ताहीं निकम्मा जाण्या सै! वे पराए बणकै दूर होगे सैं।

5 थम धोक्खा कर-करकै क्यूँ घणी मार खाणा चाहो सो? थारा सिर जख्मां तै भरग्या, अर थारा हृदय दुःख तै भरया सै। 6 पैर तै सिर ताहीं किते भी कुछ सेहतमंद न्ही, सिर्फ चोट अर कोड़े की मार की निशान्‍नी अर सड़े होए घाव सैं जो ना दबाए गए, ना बाँधे गए, ना जैतून का तेल लगाकै नरमाए गए सैं। 7 थारा देश उजड़या पड़या सै, थारे नगर भस्म होगे सैं; थारे खेत्तां ताहीं परदेशी माणस थारे देखदे ए निगळ रहे सैं; वो परदेशियाँ तै नाश करे होए देश की तरियां उजाड़ सै। 8 अर सिय्योन के लोग दाख की बारी म्ह की झोपड़ी की तरियां छोड़ दी गई सै, या काकड़ी के खेत म्ह के मचाण या घिरे होए नगर की तरियां एक्ली खड़ी सै। 9 जै सेनाओं का यहोवा म्हारे थोड़े-से माणसां ताहीं ना बचाए राखदा, तो हम सदोम की तरियां हो जान्दे, अर गमोरा*1:9 गमोरा सदोम और गमोरा नाम के शहर उनके पाप की बजह नाश कर दिए गए थे की तरियां ठहरदे। 10 हे सदोम*1:10 हे सदोम उत्प. 13:13; यहे. 16:49 के न्यायियों, यहोवा का वचन सुणो! हे गमोरा की प्रजा, म्हारे परमेसवर के नियम-कायदे पै कान लगा। 11 यहोवा न्यू कहवै सै, "थारे भोत सारे मेलबलि मेरे किस काम के सैं? मै तो मिंढयाँ के होमबलियाँ तै अर पाळे होए पशुआं की चर्बी तै अक ग्या सूं; मै बाछड़या या भेड़ के बच्‍चयां या बकरयां के लहू तै खुश न्ही होन्दा। 12 थम जिब अपणे मुँह मेरे ताहीं दिखाण खात्तर आओ सो, फेर या कौण चाहवै सै के थम मेरे आँगणां ताहीं पैरां तै रौंदो? 13 बेकार अन्‍नबलि फेर ना ल्याओ; धूप तै मेरे ताहीं घृणा सै। नये चाँद अर विश्रामदिन का मानणा, अर सभा का प्रचार करणा, यो मेरे ताहीं बुरा लाग्गै सै। महासभा कै गैल ए गैल बेकार काम करणा मेरे ताहीं सहया न्ही जान्दा। 14 थारे नये चाँद अर ठहराए होए त्यौहारां के मान्‍नण तै मै जी तै बैर राक्खूँ सूं; वे सारे मेरे ताहीं बोझ जाण पड़ै सैं, मै उननै सहन्दे-सहन्दे थक ग्या सूं। 15 प्रार्थना*1:15 प्रार्थना नीति. 1:28; मीका. 3:4 मै जिब थम मेरी ओड़ हाथ फैलाओ, फेर मै थारे तै मुँह फेर ल्यूँगा; थम कितनी ए प्रार्थना क्यूँ ना करो, तोभी मै थारी ना सुणूँगा; क्यूँके थारे हाथ निर्दोष के खून तै भरे सैं। 16 अपणे-आपनै धोकै*1:16 अपणे-आपनै धोकै 1 पत. 2:1; याकू. 4:8 पवित्र करो: मेरी आँख्यां कै स्याम्ही तै अपणे बुरे काम्मां नै दूर करो; भविष्य म्ह बुराई करणा छोड़ द्यो, 17 भलाई करणा सीखो; कोशिश करकै न्याय करो, हुड़दंग करण आळयां नै सुधारो; अनाथ का न्याय चुकाओ, बिधवा का मुकद्दमा लड़ो।" 18 यहोवा कहवै सै, "आओ*1:18 आओ यो इस्राएल राष्ट्र नै सम्बोधित करै सै अर योए आग्रह सारे पापियाँ कै खात्तर सै।, हम आप्पस म्ह वाद-विवाद करां: थारे पाप चाहे लाल रंग के हों, तोभी वे बर्फ की तरियां सफेद हो जावैंगे; अर चाहे अर्गवानी रंग के हों, तोभी वे ऊन की तरियां धोळे हो जावैंगे। 19 जै थम हुकमां नै मान्‍नण आळे होकै मेरी मान्‍नो, 20 तो इस देश की बढ़िया तै बढ़िया चीज खाओगे; अर जै थम ना मान्‍नो अर बिश्वासघात करो, तो तलवार तै मारे जाओगे; यहोवा का योए वचन सै।"

बिश्वासघाती यरुशलेम

21 जो नगरी बिश्वासयोग्य थी वो किस तरियां व्यभिचारिणी होगी! वो न्याय तै भरी थी अर उस म्ह धार्मिकता पाई जावै थी, पर इब उस म्ह हत्यारे पाए जावैं सैं। 22 तेरी चाँदी धातु का मैल होगी, तेरे दाखमधु म्ह पाणी मिलग्या सै।*1:22 मैल धातु नै पिंघळा कै फेर उसका मैल न्यारा हो जावै सै। इसका महत्त्व कम बलके ना गिणन कै बराबर सै। इस अभिव्यक्ति का मतलब सै, शाशक भ्रष्ट एवं हारे होए होगे थे जिसे के मान्‍नो शुद्ध चाँदी पूरी तरियां तै मैल्‍ली होगी। 23 तेरे हाकिम हठीले अर चोरां तै मिले सैं। वे सारे के सारे रिसवत खाणआळे अर भेंट के लालची सैं। वे अनाथ का न्याय न्ही करदे, अर ना बिधवा का मुकद्दमा अपणे धोरै आण देवैं सैं।

24 इस कारण प्रभु सेनाओं के यहोवा, इस्राएल के शक्तिमान की या वाणी सै: "सुणो, मै अपणे बैरियाँ नै दूर करकै शान्ति पाऊँगा, अर अपणे बैरियाँ तै बदला लेऊँगा। 25 मै थारे पै हाथ बढ़ाकै थारी धातु का मैल पूरी तरियां तै भस्म करुँगा अर थारी गंदगी पूरी तरियां तै दूर करुँगा। 26 मै थारे म्ह पैहले की तरियां न्यायी अर आदिकाल की तरियां मंत्री फेर ठहराया करुँगा। उसकै बाद तू धर्मपुरी अर बिश्वासयोग्य नगरी कुह्वावैगी।"

27 सिय्योन न्याय कै जरिये, अर जो उस म्ह फिरैंगे वे धार्मिकता कै जरिये छुड़ा लिये जावैंगे। 28 पर बिश्वासघात करणीये अर पापियाँ का एक साथ नाश होवैगा, अर जिननै यहोवा ताहीं छोड्या सै, उनका अन्त हो जावैगा। 29 क्यूँके जिन बांज दरखतां*1:29 बांज दरखतां पुराणे युग म्ह ये मूर्तिपूजा कै खात्तर मनभावणी जगहां थी। की थम आराधना करया करदे, उनतै ए थम लज्जित होवोगे, अर जिन बारियाँ तै थम खुश रहो थे, उनकै कारण थारे मुँह काळे होवैंगे। 30 क्यूँके थम मुर्झाए होए पत्यां के बांज दरखत की, अर बिना पाणी के बाग की तरियां हो जाओगे। 31 बलवान तो सण अर उसका काम चिंगारी बणैगा, अर दोन्‍नु एक साथ जळैंगे, अर कोए बुझाण आळा न्ही होवैगा।