1 तेबे यहोवे रा वचन मांगे पऊँचेया, 2 "ओ नाश ऊणे वाल़े माणूंआ, मागोग देशो दे राजा गोग ओर रोष शईरो रिया तरफा खे कुमो ओर देखो। से मेशेक ओर तूबलो रा सबी ते जरूरी शासक ए, तेसखे चतौणी देणे रिया तँईं तेसरा सन्देश बोल।"* 3 तिना खे ये बोल, "ओ गोग, ओ रोष, मेशेक ओर तूबलो रे परदान, परमेशर यहोवा ईंयाँ बोलोआ, देख, आऊँ तेरे खलाफ ए। 4 मां तूँ कुमायी देणा ओर तेरे जबड़ेया दे नकेल पायी की तूँ इस्राएलो गे लई आऊणा। तूँ ओर तेरी सारी सेना, तेरे कोड़े ओर कोड़ेया पाँदे सवार अथियार लई की लोक, ओर बऊत सारे ओर सिपाई जो बड़ी ढाला ओर छोटी ढाला लई की ऊणे, ओर तिना सबी गे तलवारा ऊणिया। 5 तिना साथे फारस, कूश* ओर पूत, जो तिना रे सारे अथियार ढाला ओर टोप पईन दे ऊणे; 6 ओर गोमेर ओर तेसरे सारे दलो खे ओर उत्तर दिशा रे दूर-दूर देशो रे बेथ-तोगर्मा राज्य रे सिपाई ओर तेसरे सारे दल काडणे; तां साथे बऊत सारे देशा रे सिपाई ऊणे। 7 इजी री खातर तूँ त्यार ऊई जा; तूँ ओर जितणी लोका री पीड़ तांगे लड़ने खे कट्ठी ओ, त्यार रया ओर तैं तिना रा अगुवा बणना। 8 कुछ साला बाद तेरी खबर-सम्बाल़ लणी ओर अन्तो रे सालो दे तूँ तेस देशो दे आऊणा, जो तलवारी ते छूटेया दा ऊणा ओर जेथो रे रणे वाल़े बऊत सारी जातिया बीचा ते कट्ठे ऊणे; मतलब तूँ इस्राएलो रे पाह्ड़ो पाँदे आऊणा जो लगातार उजाड़ने लगी रे; पर इस्राएली सबी देशा रे लोका रे वशो ते छुड़ाई की सारे के सारे बिना डरे रणे। 9 तां अमला करना ओर तूफानो जेड़ा आऊणा ओर आपणी सारी सेना ओर बऊत सारे लोका समेत बादल़ो जेड़ा देशो पाँदे छायी जाणा।"

10 परमेशर यहोवा ईंयाँ बोलोआ, "ओ गोग, तेस दिने तेरे मनो दे एड़िया-एड़िया गल्ला आऊणियां कि तां एक बुरी योजना बी करनी; 11 ओर तां बोलणा कि मां तिना गाँवां पाँदे अमला करना जिना दे चऊँ कनारे दवाला नि आ, जिना दे लोक शान्तिया ते रओए, ओर आसा तिना पाँदे अमला करना। तिना गे बचणे रिया तँईं कोई मजबूत दवाल या द्वार नि ए, 12 ताकि तूँ तिना री तन-दौल़त छीनी की तिना खे लूटे ओर तिना खण्डहरा पाँदे अमला करे जो फेर बसायी राखे ओर तिना लोका रे खलाफ जाए जो जातिया बीचा ते यरूशलेमो दे कट्ठे ऊए थे जो तरतिया री नाई ए, जेती सेयो आपणे डांगर ओर बाकी सम्पत्ति राखोए।" 13 शेबा ओर ददान शईरो रे लोका ओर तर्शीश शईरो रे बपारिया आपणे देशो रे सारे जवान शेरा समेत तांते पूछणा, "क्या तूँ लुटणे आऊणे लगी रा? क्या तैं पैसा छुड़ाणे, सूईना-चाँदी चकणे, डांगर ओर सम्पत्ति निणे ओर बड़ी लूट लुटणे खे आपणी पीड़ कट्ठी करी राखी?"

14 इजी बजा ते, ओ नाश ऊणे वाल़े माणूंआ, भविष्यबाणी करी की गोगो खे बोल, "परमेशर यहोवा ईंयाँ बोलोआ, जेस बखते मेरी इस्राएल प्रजा बिना डरे बसी री रणी, ताखे एतेरी खबर मिली जाणी? 15 तूँ उत्तर दिशा दे आपणे देशो ते आऊणा; तूँ ओर तां साथे बऊत जातिया रे लोक, जो सारे के सारे कोड़ेया पाँदे चढ़े रे ऊणे, मतलब एक बड़ी पीड़ ओर तागतबर सेना। 16 जिंयाँ बादल़ जमीना दे छाई जाओआ, तिंयाँ ई तां मेरी इस्राएल प्रजा पाँदे चढ़ाई करनी।" इजी खे ओ गोग, अन्तो रे दिनो रे एड़ा ई ऊणा कि मां तांते आपणी इस्राएलो री प्रजा पाँदे इजी रिया तँईं चढ़ाई कराणी, ताकि जेबे आऊँ जातिया सामणे तेरे जरीये आपू खे पवित्र ठराऊँ, तेबे तिना आऊँ पछयाणी लणा।

17 परमेशर यहोवा ईंयाँ बोलोआ, "क्या तूँ सेईए जेसरे बारे दे मैं पुराणे बखतो रे आपणे दासा साथे, मतलब इस्राएलो रे तिना भविष्यबक्तेया रे जरीये गल्ल कित्ती थी, जो तिना दिना रे सालो तक ये भविष्यबाणी करदे रये कि यहोवे गोगो ते इस्राएलिया पाँदे चढ़ाई करवाणी?" 18 जेस दिने इस्राएलो पाँदे गोगो चढ़ाई करनी, तेस दिने ई मेरा रोष मेरे मुंए ते सामणे आऊणा, परमेशर यहोवे री येई बाणी ए। 19 मैं जल़नी रे ओर रोषो रे आई की बोलेया कि तेस दिने पक्का इस्राएल देशो रे बड़ा ईल्लण ऊणा। 20 सब जिऊँदे प्राणी समुद्रो रिया मछलिया, सर्गो रे पंछी, मैदानो रे डांगर, जमीना दे लूरने वाल़े सारे जीव-जन्तु ओर जमीना दे जितणे माणूं रओए, सब मेरे ऊणे रिया बजा ते डरी जाणे। ओर पाह्ड़ टाल़ी जाणे; चट्टानी टूटी जाणिया; दवाला तरतिया पाँदे टल़ी जाणिया।* 21 परमेशर यहोवे री ये बाणी ए कि मां तेसरे खलाफ तलवार चलाणे रिया तँईं सारे पाह्ड़ो खे आका पाणिया ओर गोगो रे सारे सिपाईया एकी दूजे रे खलाफ तलवारे की लड़ना शुरू करी देणा। 22 मां गोग ओर तेसरी बड़ी सेना खे सजा देणी ओर तेस पाँदे ओर तेसरी सेना पाँदे ओर तिना पाँदे बऊत सारी जातिया जो तिना गे ऊणिया, मां बड़ी पारी बर्खा करनी ओर ओल़े, आग ओर गन्धक बरसाणी।* 23 ईंयाँ आऊँ आपणे आपू खे महान ओर पवित्र ठराऊँगा ओर सबी देशा रे सामणे आपू खे प्रगट करना। तेबे तिना सबी देशा रे लोका खे पता लगी जाणा कि आऊँ ई यहोवा ए।