1 मेरे दर्शणो दे, से माणूं माखे मन्दरो रे द्वारो गे वापस ल्याया। तेती मैं देखेया कि मन्दरो रे द्वारो ते थाले पूर्बा रिया तरफा खे एक सूबल़ बह्यीणे लगी री थी ओर दक्खणा रिया तरफा खे बेदिया रे दाणे कनारे ते जाणे लगी री थी।*47:1 प्रका. 22:1 2 से माणूं माखे उत्तरो रे बड़े द्वारो ते ऊई की दवाला ते बारे लईगा ओर पूर्बो रे द्वारो रिया तरफा खे लईगा। तेती आऊँ पूर्बा रे द्वारो गे दक्खणा रे इस्से गे बह्यीणे लगी रे पाणिये खे देखी सकुँ था, 3 से माणूं माखे आथो दे नापणे री डोरी लई की नापदे ऊए 1,750 फुटा तक पाणिये साथे लईगा ओर पारले कनारे लईगा। ओर पाणी मेरे मोरड़ेया तक था। 4 तिने फेर 1,750 फुटो तक नापेया ओर माखे फेर पार लईगा। एबे तेती से पाणी मेरे जानूआ तक था। 1,750 फुट आगे जाणे ते बाद, पाणी मेरे लको तक आईगा, 5 तिने फेर 1,750 फुट नापेया, ओर नदी इतणी डूगी ऊईगी थी कि पैदल चली की पार जाणा मुमकिन नि था। ये तरने रिया तँईं काफी डूगी थी, पर पैदल चलणे खे बऊत डूगी थी। 6 तेबे तिने माणूंए मांते पूछेया, "ओ नाश ऊणे वाल़े माणूंआ, क्या तैं ये देखी राखेया?" तेबे तिने आऊँ नदिया रे कनारे-कनारे वापस लई जाई की पऊँचाई ता। 7 मैं वापस ऊई की क्या देखेया कि नदिया रे दुँईं कनारेया पाँदे बऊत सारे डाल़ ए।*47:7 यहे. 47:12 8 तिने माणूंए माखे बोलेया, "ये सूबल़ पूर्बा रिया तरफा री जमीना रिया तरफा खे जाओई। ये यरदन नदिया री काअटिया दे जाओई। फेर पाणी अराबा*47:8 अराबा यरदन काअटी रे खारे समुद्रो दे चली जाओआ। जेबे ये पाणी तेती समुद्रो दे जाओआ, तो पाणी खारा ऊणे रे बजाये शुद्ध ऊई जाओआ। 9 जेती-जेती ये नदी बह्ओगी, तेती-तेती सब प्रकारा रे बऊत अण्डे देणे वाल़े जीव-जन्तु जिऊणे ओर मछलिया बी बऊत ऊई जाणिया; कऊँकि एसा सूबल़ा रा पाणी तेती पऊँची रा ओर तालो रा पाणी मीठा ऊई जाणा ओर जेती केथी ये नदी पऊँछणी तेती सारे जन्तु जियूणे। 10 समुद्रो रे कनारे पाँदे मच्छुआरे खड़े रे रणे ओर एनगदिया रे चरणे ते लई की एनगलैम चरणे तक तिना जाल़ बछाई की राखणा ओर तिना खे बड़े समुद्रो जेड़िया कई प्रकारा रिया अणगिणत मछलिया मिलणिया। 11 पर मृत समुद्रो गे जो दल-दल ओर गड्डे ए, तिना रा पाणी मीठा नि ऊणा, सेयो लूणके ई रणे। 12 नदिया रे दुँईं कनारेया पाँदे कई-प्रकारा रे खाणे जोगे फलो वाल़े डाल़ जमणे, जिना रे पत्ते नि मुरझाणे ओर ना तिना रा फल देणा कदी बन्द ऊणा, कऊँकि नदिया रा पाणी पवित्र जगा ते निकल़ी रा। तिना रे मीन्ने रे मीन्ने नये-नये फल लगणे। तिना रे सारे फल तो खाणे रे ओर पत्ते दवाईया रे कामे आऊणे।"*47:12 प्रका. 22:2

13 परमेशर यहोवा इस्राएलो खे ईंयाँ बोलोआ, "जेस बन्ने ते पीतरे तुसा रे सबी गोत्रा खे ये देश बाँडणा पड़ना, से ये ए: यूसुफो खे दो इस्से मिलो।" 14 यहोवा परमेशरे इस्राएलिया ते बोलेया, "से तुसा एकी-दूजे जेड़ा आपणे इस्से दे पाणा, कऊँकि मैं कसम खाई राखी कि से तुसा रे पितरा खे देणा, इजी री खातर ये देश तुसा रा आपणा सदा रा इस्सा ठईरना। 15 तेस देशो रा बन्ना जो परमेशर इस्राएलिया खे देओआ से ये ए। मतलब उत्तरो रिया तरफा रा बन्ना भूमध्य समुद्रो ते पूर्बा रे शईर हेतलोनो तक, फेर हमात दर्रे ते ऊँदे ऊए सदादो री काट्टिया तक, 16 हमात बेरोता ओर सिब्रैम शईरा तक, जो दमिश्क इलाके ओर हमात इलाके रे बीचे बन्ने गे ए। तेथा ते से बन्ना हसर्हत्तीकोन शईरो तक फैलणी, जो हौरान जगा रे बन्ने पाँदे ए। 17 ईंयाँ ये बन्ना भूमध्य समुद्रो ते लई की दमिश्को ते ऊँदे ऊए दक्खणा दे हसरेनोन शईरो तक फैली दी ऊणी। तेतेरे उत्तरा दे हमात शईरो तक। उत्तरो रा बन्ना ये ईए। 18 पूर्बा रिया तरफा खे, बन्ना हौरान ओर दमिश्को बीचे, दक्खणा दे यरदन नदिया साथे गिलाद इलाका ओर इस्राएलो री जमीना बीचे, मृत समुद्रो साथे तामार शईरो तक फैली दी ऊणी। पूर्वी बन्ना तो येई ओ। 19 दक्खणा रिया तरफा खे, बन्ना तामारो दे दक्खण-पच्छमा ते लई की मरीबा-कादेश शईरो रे नेड़े री सूबल़ा तक फैलेया दा ऊणा। फेर बन्ना मिस्रो रे बन्ने पाँदे सूके नाल़े रे कनारे पच्छमा दे बड़े समुद्रो तक फैली दी ऊणी। दक्खणा रा बन्ना येई ओ। 20 पच्छमा रा बन्ना दक्खण बन्ने ते लई की हमात री काट्टिया सामणे तक समुद्र ओ। पच्छमा रा बन्ना येई ओ। 21 ईंयाँ देश इस्राएलो रे गोत्रो रे मुताबिक आपू बीचे बांडी लणा। 22 ये आपू बीचे ओर तिना परदेशिया साथे बांडी लणा, जो तुसा बीचे रंदे ऊए बाल़क जमाओ। सेयो तुसा री नजरा रे देसी इस्राएलिया जेड़े ठईरो ओर तुसा रे गोत्रा बीचे आपणा-आपणा इस्सा पाओ। 23 जो परदेशी जेस गोत्रो रे देशो रे रओआ, तेसखे से ई इस्सा देणा, परमेशर यहोवे री येई बाणी ए।"