1 सज़ाह देनेरे दिहाड़े यहोवा एपनी बेड़ी सखत मज़बूत तलवारी सेइं लिव्यातान* नंव्वेरे तेज़ दौड़ने बाले ते टारे च़लनेबाले सप्पे सज़ाह देलो, ते ज़ै अजगर समुन्दरे मां रहते तैस कत्ल केरेलो।

2 तैस वक्ते अक खूबसूरत बाग भोल्ही, तुस तैसेरी तारीफ़रू गीत ज़ोइयथ! 3 अवं यहोवा तैस बागरी हिफाज़त केरताईं; अवं हर पल तैस सगताईं। अवं रात दिहैड़ी तैसेरी हिफाज़त केरेलो एरू न भोए कि कोई तैसेरो नुकसान केरे। 4 मेरे मने मां जलन नईं। अगर कोई किसमे-किसमेरे बुट मीं सेइं लड़नेरे लेई खड़ो केरेथो, त अवं तैन पुड़ पव रेखतां तैन पूरे तरीके सेइं भस्म केरेथो। 5 या मीं सेइं मेल केरनेरे लेई तैना मेरी शरण नेन, तैना मीं सेइं मेल केरन।

6 एजने बाले दिहाड़न मां याकूब अपनु ज़ील मज़बूत केरेलो, ते इस्राएल फलदार भोल्हो, ते तैसेरे फलन सेइं सारी दुनिया भेरोली।

7 कुन यहोवा तै मारो ज़ेन्च़रे तैनी तैसेरे मारनेबाले मारोरे थिये? कुन तै मारो जेव, ज़ेन्च़रे तैनी तैसेरे कत्ल केरनेबाले कत्ल कियोरे थिये? 8 ज़ैखन तीं इस्राएल गुलैमी मरां कढो, तैखन सोच-विचार केरतां तैस दुख दित्तो: तैने पूर्वेरे हवारे दिहाड़े तै तेज़ हवाई सेइं उडारो। 9 एल्हेरेलेइ एस सेइं याकूबेरे अधर्मेरो प्रायश्चित कियो गालो, ते एसेरे पाप दूर भोनेरो एहे नितीजो भोल्हो कि ज़ैखन तै वेदरे सारे घोड़ चुन्नो बनानेरे लेई चकनाचूर केरेले; ते अशेरा देबरी ते दिहाड़ेरी मूरती फिरी खेड़ि न रहेली।✝ 10 किजोकि क़िले बालू नगर गैर आबाद भोव, तैन ज़ेन्च़रे उज़ड़ोरी बसती या सुनसान ठैरारू ज़ेरू भोव; तैड़ी बछ़ड़ां च़रेलां ते बुट्टां केरि डैलड़ी खालां। 11 ज़ैखन तैसेरे डैलड़ी शुक्‍की गान त तैखन ट्लोड़ी गैली; ते कौन्शां एइतां तैन ट्लोड़तां फुकेली। किजोकि एना लोक बेअक्ल आन; एल्हेरेलेइ तैन केरो बनानेबालो परमेशर भी तैन पुड़ दया न केरेलो, ते तैन केरो बनानेबालो तैन पुड़ अनुग्रह न केरेलो।

12 तैस मौके यहोवा फरात दरियाए करां लेइतां मिस्रेरे नाले तगर तैसेरू अन्न मडेलो, ते हे इस्राएली लोकव तुस अक-अक केरतां अकोट्ठे किये गाले। 13 ते तैस्से वक्ते बड्डो नरशिंगो बज़ाव गालो, ते ज़ैना अश्शूरेरे मुल्खे मां नाश भोइ राहोरे थिये, ते ज़ैना मिस्रे मां गुलाम भोवरे थिये, तैना वापस यरूशलेम नगरे मां एइतां यहोवारे पवित्र पहाड़े पुड़ आराधना केरेले।✝