1 तैस मौके सत कौन्शां एक्‍की मड़दे ट्लेइतां ज़ोली, "रोट्टी त असां अपनि खामेली, ते लिगड़ां भी असां अपना लामेली, सिर्फ असन जो तेरी ज़ोवं गाए; इश्शे बदनामी दूर केर।"

2 तैस वक्ते इस्राएलेरे बच़ोरे लोकां केरे लेई यहोवारी डालड़ी, खूबसूरती ते महिमा ठहरेली, ते ज़मीनरी पैदावार, खूब रोड़ी ते शोभा देनेबाली भोल्ही।✝ 3 ते ज़ै कोई सिय्योने मां बच़ोरो रालो, ते यरूशलेम नगरे मां रालो, मतलब यरूशलेम नगरे मां ज़ेत्रे लोकां केरां नंव्वां ज़िन्दगरे किताबे मां लिखोरां भोल्हां, तैन जो पवित्र ज़ोले।✝ 4 इन तैखन भोल्हु, ज़ैखन प्रभु न्याय केरनेबाली ते भस्म केरनेबाली आत्मारे ज़िरिये सिय्योनेरी कौन्शां केरि गन्दगी दूर केरेलो ते यरूशलेमेरो खून दूर केरेलो। 5 तैखन यहोवा सिय्योन पहाड़ेरे हर एक्‍की घरे पुड़, ते सेभी ठारां केरे बह, दीसां तूएरी बिदलार, ते राती भड़कती अग्गरी लौ चमकेली, ते सारे वैभवे पुड़ अक तेम्बु भोल्हो। 6 तै दीसां धुप्पी करां बच़ानेरे लेई छाव भोल्ही ते आँधी ते पानी ते झ़ेड़ी मां अक आड़ भोल्ही।