Isaías 8

यशायाहेरू मट्ठू लोकां केरे लेई निशान

1 फिरी यहोवा मीं सेइं ज़ोवं, "अक बड्डी तख्ती एन्हतां तैस पुड़ साफ-साफ लफज़न मां लिख: महेर्शालाल्हाशबजेरे*8:1 महेर्शालाल्हाशबजेरे इस नंव्वेरो मतलबे शिकार या लुटनेरे लेई जल्दी केरनी। लेई।" 2 एल्हेरेलेइ अवं ऊरिय्याह याजक ते जेबेरेक्याहेरे मट्ठे जकर्याह ज़ैना वफादार आन तैन इस गल्‍लरे गवाह बनेइलो। 3 किछ वक्तेरां बाद अवं एपनी कौन्शी कां जेव, ते तै दोज़ींती भोइ जेई ते तैस मट्ठू भोवं। तैखन यहोवा मीं सेइं ज़ोवं, "तैसेरू नवं महेर्शालाल्हाशबज रख; 4 किजोकि एस करां पेइले तै बच्‍चो अम्मा बाजी ज़ोनू शिखे, दमिश्क ते सामरिया दूईयां केरि धन-दौलत लुटतां अश्शूरेरो राज़ो अपने मुल्खे जो नेलो।"

अश्शूर मुल्खेरे राज़ेरू एजनू

5 यहोवा फिरी मीं सेइं ज़ोवं, 6 "एल्हेरेलेइ कि एन लोक शीलोहेरे बल्हे-बल्हे बगनेबाले पैनी निकम्मे समझ़तन, ते राज़ो रसीन ते राज़ो पेका रमल्याहेरे मट्ठे सेइं साथी अक भोइतां खुशी मनातन, 7 एल्हेरेलेइ शुन, प्रभु तैन पुड़ प्रबल ते फरात दरियाए मतलब अश्शूरेरे राज़े तैसेरे सारे शान-ओ-शोकती सेइं साथी च़ाढ़ेलो; ते तै तैन केरे सब नालन भरेलो ते तै सारे बन्न करां छ़ेलकतां बगेलो। 8 ते तै यहूदा पुड़ भी च़ैढ़ी गालो, ते बद्धते-बद्धते तैस पुड़ च़ेढ़ी गालो ते गले तगर पुज़्ज़ी गालो; ते हे इम्‍मानुएल, तेरो सारो मुल्ख तैसेरे फंघन हैठ छ़ेप्पी गालो।"*8:8 मत. 1:23.

9 हे लोकव, शौर केरनी त केरा, पन तुश्शो नाश भोइ गालो। हे धेरतरे दूर-दूरेरे सब मुल्खां केरे रानेबाले लोकव ध्याने सेइं शुना, अपनि-अपनि कमर कसने त कस्सा, पन तुश्शे टुक्ड़े-टुक्ड़े किये गाले; अपनि कमर कसने त कस्सा, पन तुश्शो सत्यानाश भोइ गालो। 10 तुस योजना बनाने त बनाथ, पन तै कामयाब न भोल्ही, तुस किछ भी ज़ोथ, पन तुश्शू ज़ोवरू पूरू न भोल्हु, किजोकि परमेशर असन सेइं साथीए।✝8:10 रोम. 8:31;कह. 31:30.

यहोवारी खबरदारी

11 यहोवा मीं खबरदार केरतां ज़ोवं, कि इन लोकां केरे चाली पुड़ न च़ेलां। 12 ते तैनी ज़ोवं, "ज़ैस गल्‍ली जो एना लोक बगावत ज़ोन, तैस तुस बगावत न ज़ोइयथ, ते ज़ैस गल्‍ली करां तैना डरतन तैस करां तुस न डेरथ ते न घबरेइयथ। 13 सिर्फ सेना केरे यहोवाए पवित्र मेन्थ; तैसेरो डर मेन्थ, ते तैसेरी आदर केरथ।✝8:13 प्रका. 15:4;लूक. 12:5. 14 तैए तुश्शे लेई छ़पनेरी ठार भोल्हो, पन इस्राएलेरे दूईये घराना केरे लेई ठोकरारो घोड़ ते दब लगनेरी चट्टान ते यरूशलेम नगरेरे रानेबालां केरे लेई फंदो ते जाल भोल्हो।✝8:14 रोम. 9:32-33. 15 ते बड़े लोकन ठोकर लग्गेली; तैना बिछ़ड़तां चूर-चूर भोल्हे; तैना फंदे मां फसेले ते ट्लेइयोई गाले।"

मुड़दन करां पुछ़नेरे खलाफ खबरदारी

16 यहोवा ज़ोते खबरदारी देनेरो शहादत*8:16 खबरदारी देनेरो शहादत मतलब ज़ैना गल्‍लां यशायाह पेइली ज़ोवरी थी। नामो बन्द केरा, ते मेरे चेलां केरे लेई शिक्षाई पुड़ मोहर लाथ। 17 अवं तैस यहोवा बलगतो रेइलो ज़ैनी अपनु तुत्तर याकूबेरे खानदाने करां छ़ुपेइतां रखेरूए, ते अवं यहोवा पुड़ उमीद रखेलो।✝8:17 मीक. 3:4;भज. 27:14. 18 हेर, अवं ते ज़ैना मट्ठां यहोवा मीं दित्तोरन, तैस्से सेना केरे यहोवारी तरफां ज़ै सिय्योन पहाड़े पुड़ बास केरते, इस्राएली लोकां केरे लेई निशान ते चमत्कारन।✝8:18 इब्रा. 2:13. 19 ज़ैखन लोक तुसन सेइं ज़ोन, "जैदूगिरन ते टूनो केरनेबाले लोकन कां गेइतां पुछ़ा ज़ैना फुसफुसातन ते बुड़बुड़ातन," तैखन तुस एन ज़ोइयथ, "कुन लोकेईं अपने परमेशरे कां गेइतां पुछ़ोरू न लोड़े? कुन ज़ींतां केरे लेई मुड़दन पुछ़ोरू लोड़ते?"✝8:19 लैव्य. 20:6;19:31.

20 सिर्फ कानून ते हदायतां केरि चर्चा केरा! अगर लोक इस वचनेरे मुताबिक न ज़ोन त सच़्च़े तैन केरे लेई न ट्लेकड़ोलू।

मुसीबतरो वक्त

21 लोक इस मुल्खे मां मुसीबती मां नियन्ने भटकते फिरते राले; ते ज़ैखन तैना नियन्ने भोल्हे, तैखन तैना क्रोधे मां एइतां अपने राज़े ते अपने परमेशरे जो लानत देले, ते अपनु तुत्तर अम्बरेरे पासे खड़ू केरेले; 22 तैखन तैना लोक धेरतरे पासे तकेले; मुसीबत तंगी ते आंधरू ते दुखे-दुख लेइहोलो; ते तैन तैस आंधरे मांजो ढ्लैक दित्ती गाली।✝8:22 सप. 1:14-15.