1 ጎዳዉ፥ ታ ዎሳ ስአ፤

ታ ዋሶይ ኔኮ ጋኮ።

2 ታ ዋይያ ጋላስ ነ ሶምኡዋ ታፐ ገንፋ፤

ነ ሀይ ታኮ ዛራ፤

ታኒ ኔኮ ዋስያ ዎደ፥ ታና ኤሶን አላ።

3 ታ ላይይ ጩያዳ ዬስ፤

ታ መቀይ ታማዳ ኤፄስ።

4 ታ ዎዛናይ ቡጭድ የግዳ ማታዳ መልስ፤

ካካ ታዉ ሜተተና።

5 ታኒ ታ ቃላ ቁ ኦዳ ኦልዳ ግሾ፤

ታ ጎጋይ መቀራ ኦይከትስ።

6 ታኒ ዎራን ደእያ ሶሎ መላ፥

ካይሳ ኬን ደእያ ጉቶ መላ።

7 ታኒ ዝንእን ስኮይ ዬና፤

ታኒ ኬ ሁጰን ባርካ ኡትዳ ካፎ ግዳስ።

8 ታ ሞርከት ጋላስ ኩመ ታና ጫዮሶና፤

ታና ቀልቅሰይሳት ታ ሱንን ባዶሶና።

9 ብዶይ ታዉ ካ ግድስ፤

ታ አፉይ ታ ኡሻራ ዋላከትስ።

10 ሄስ ሀንዳይ ነ ሀንቆይነ ነ ይሎይ፥

ታና ደንድ ዎራ ሆልዳ ግሾሳ።

11 ታ ላይይ ኦማርሳ ኩያ መላ ኤለስድ አስ፤

ታኒ ማታዳ ሹላይስ።

12 ሽን ጎዳዉ፥ ኔኒ ነ አራታን መርናዉ ኡታዳሳ፤

ነ ሱንይ የለታፐ የለታ ጋካናዉ ሀሳየታና።

13 ኔኒ እዮ ማርያ ዎደይ ጋክዳ ግሾ፤

ደንዳዳ ፅዮነስ ቃታ፤

ኔኒ ዶርዳ ዎደይ ጋክስ።

14 እ ሹቻት ነ ኦሳንቾታስ አልኦ፤

እ ቢታይካ ኤንታ ቃስ።

15 ካዎተት ጎዳ ሱንስ ያያና፤

ሳኣ ካዎት እያ ቦንቹዋስ ዳጋማና።

16 ጎዳይ ፅዮነ ዛሪድ ኬፃና፤

ባ ግታተ በሳና።

17 እ ማንቆታ ዎሳ ስአና፤

ኤንታ ኦይሻ ካና።

18 ቡሮ የለታና አሳይ ጎዳ ጋላታና መላ፥

ሀይስ ያ የለታስ ፃፈቶ።

19 ጎዳይ ቃን ደእያ

ባ ጌሻ በሳፈ ፄልስ፤

ሳሎን ግድድ ሳኣ ፆሞሴስ።

20 ሄስካ ቃሸትዳ አሳ ዋሱዋ ስአናዉነ

ሀይቆ ፕርደትዳ አሳ ብርሻናሳ።

21 ሄሳ ግሾ፥ ጎዳ ሱንይ ፅዮነን ኦደታና፤

እያ ጋላታይ የሩሳላመን አዋጀታና።

22 ደረይነ ካዎተይ ሺቅድ፥

ጎዳስ ሄ ዎደ ጎይናና።

23 ታኒ ናአተን ደእሽን፥

ታ ዎልቃ እፅስስ፤ ታ ላይ ቃምስስ።

24 ታኒ፥ "ታ ፆሳዉ፥

ታ ላይ ግዶ ዛዋን ታና ኮፋ" ያጋይስ።

ጎዳዉ፥ ኔኒ የለታፐ የለታ ጋካናዉ ደኣሳ።

25 ኔኒ በን ሳኣ መዳሳ፤

ሳሎይካ ነ ኩሸ ኦሶ።

26 ሀይሳቲ ኡባይ ያና፤ ሽን ኔኒ ዳና፤

ኤንቲ ኡባይ አፍላዳ ዉራና።

ኔኒ ኤንታ ጩርቃ አፍላዳ ላማና፤

ኤንትካ አና።

27 ሽን ኔኒ ነና፤

ነ ላይይ ዉረና።

28 ነ አይለታ ናይታ ኔኒ ሳሮ ዎሳ፤

ኤንታ ኮቻይ ነ ስንን ምንድ ዳና።