1 ጎዳ ጋላትተ፤ እያ ሱን ፄግተ፤

እ ኦዳባ ካዎተታስ ኦድተ።

2 እያ ሳቢተ፤ ጋላታ ማዝሙረ የፅተ፤

ማላልስያ እያ ኦሶ ኡባ ኦድተ።

3 እያ ጌሻ ሱንን ጬቅተ፤

ጎዳ ኮየይሳታ ዎዛናይ ኡፋይቶ።

4 ጎዳነ እያ ዎልቃን አማነትተ፤

ኡባ ዎደ እያ ኮይተ።

5,6 ህንተኖ፥ እያ አይልያ አብራሃመ ዛረቶ፥

ዶረትዳ ያይቆባ ናይቶ፥

እ ኦዳ ማላልስያባታ፥

እያ ማላታነ ሱረ ፕርዳ ሀሳይተ።

7 እ ጎዳ፥ ኑ ፆሳ፤

እያ ፕርዳይ ቢታ ኡባ ቦላና።

8 እ ባ ጫቁዋ መርናዉ፥

ባ ገልዳ ቃላ ሙኩሉ የለታ ጋካናዉ ናጌስ።

9 እ አብራሃመራ ጫቅዳ ኡፋይሳ ቃላ፥

ይሳቃስ ገልዳ ኡፋይሳ ቃላ፥

10 ያይቆባስ ዎጋ፥

እስራኤለስ መርና ጫቁዋ

ኦድ ምንስ።

11 እ፥ "ካናነ ቢታ ነዉ እማና፤

እ ነ ኮቻ ጋክዳ ላታ ግዳና" ያግስ።

12 ፆሳ አሳት ታይቦን ጉነ

ካናነ ቢታን በተ አስ ግድድ ደእያ ዎደ፥

13 እስ ደርያፐ ሀራ ደርያ፥

እስ ካዎተፈ ሀራ ካዎተ ዩይዶሶና።

14 ፆሳይ ኦንካ ኤንታ ኡንኤና መላ ኦቤና፤

ኤንታ ግሾ ካዎታ ሴርስ።

15 "ታ ትይዳይሳታ ቦቾፍተ፤

ታ ናበታ ቆሆፕተ" ያግስ።

16 ጎዳይ ቢታን ኮሻ የድድ፥

ኤንታ ካ ኡባ ይስስ።

17 ሽን እ ባ አሳ አሻናዉ፥

እስ አድያ ግብፀ ኪትስ፤

ሄ ኡራይ አይለ ግድድ ባይዘትዳ ዮሰፋ።

18 እያ ቶሆት ብራታን ዱፀትዶሶና፤

እ ሳንላታን ቃሸትስ።

19 እ ካሰ ኦድዳይስ ቱማታና ጋካናዉ፥

ጎዳ ቃላይ እያ ፓጭስ።

20 ሄሳፈ ጉየ ግብፀ ካዎይ አሰ የድድ፥

እያ ቃሾ ኬፈ ከስስ።

21 እያ ባ ኬ ቦላ ጎዳ ኦስ፤

ባዉ ደእያ ኡባ ቦላ ሹምስ።

22 ባ ሞርናታ ዞራና መላ፥

ባ ጭማታ ጭንጫተ ታማርሳና መላ ሹምስ።

23 እስራኤለይ ግብፀ ብስ፤

ያይቆብ ካማ ቢታን ኡትስ።

24 ጎዳይ ባ አሳ ዳርስስ፤

ኤንታ ሞርከታፐ አድ ኤንታ ምንስ።

25 ባ አሳ እፃና መላ ግብፀ አሳ ዎዛና ላምስ፤

ባ አይለታ ጭማና መላ ኦስ።

26 ባ አይልያ ሙሰነ

ባ ዶርዳ አሮና ኤንታኮ ኪትስ።

27 ኤንቲ ግብፀ አሳ ስንን ማላታ፥

ካማ ቢታን ማላልስያባ ኦዶሶና።

28 ጎዳይ ማ ኪትድ፥ ቢታ ምስስ፤

ሽን ግብፀ አሳይ እያ ኪታ ፖልቦኮና።

29 ኤንታ ሃ ሱ ላምድ፥

ሞሎታ ዎስ።

30 ኤንታ ቢታ ኡባ፥

ካዎ ጋካ ሾ ኩንስ።

31 እ ኪትን፥ ኡዱንፀነ ቢነ

ኤንታ ቢታ ኡባ ቦላ ቢነይ ዎስ።

32 እራ ግሾ ኤንታ ቢታ ቦላ

ሻች፥ ዳዳነ ዎልአን ቡክስስ።

33 እ ኤንታ ዎይንያነ ባላስያ ሾጭስ፤

ኤንታ ቢታን ደእያ ም መንረስ።

34 እ ኪትን፥ ቦለይነ

ታይቦይ ባይና ዱጎይ ከይስ።

35 ኤንታ ቢታን ዶልዳ ካ ኡባ ምስ፤

ጋደን ደእያ ጭልኦባ ኡባ ይስስ።

36 ጎዳይ ግብፀ አሳ ባይራ ናይታ ኡባ ዎስ፤

ኮይሮ የለትዳ ኡባ ይስስ።

37 ሄሳፈ ጉየ፥ እስራኤለ አሳ

ዎርቃነ ብራ አሌቆራ ከስስ፤

ኤንታ ኮቻ ግዶፈ ጉየ አትዳይ ኦንካ ባዋ።

38 ግብፀ አሳይ ኤንታዉ ያይዳ ግሾ፥

ኤንታ ከሳን ኡፋይትዶሶና።

39 ጎዳይ ኤንታ ካማናዉ ሻራ ምጭስ፤

ቃማ ኤንታዉ ፖእሳናዉ ታማ ጊግስስ።

40 ኤንቲ ምያባ ኦይችዳ ዎደ፥

ኩራቾ ዳንያ ካፎታ ኤንታዉ የድስ፤

ኤንታ ሳሎ ካ ካልስስ።

41 እ ሹቻ ጳልቅን፥ ሃ ፑልትስ፤

መላ ቢታን ሻፋዳ ጎግስ።

42 እ ባ አይልያ አብራሃመስ፥

ገልዳ ጌሻ ቃላ ሀሳይስ።

43 እ ባ አሳ ኡፋይሳን፥

ባ ዶርዳይሳታ እልልሳን ከስስ።

44 እ ኤንታዉ አላጋ ካዎተታ ቢታ እሚስ፤

ሀራት ዳቡርዳ ጎሻ ላትዶሶና።

45 እ ሄሳ ኦዳይ ኤንቲ እያ ዎጋ

እያ ህግያ ናጋናነ ኦና መላሳ።

ጎዳ ጋላተቶ!