1 ጎዳዉ፥ ታኒ ኔኮ ባቃታዳ አትያ ግሾ፥

አዉደካ ታና ዬላዮፓ።

2 ነ ፅሎተን ታና ናጋ፤

ነ ሀይ ታኮ ዛራ፤ ታና አሻ።

3 ኔኒ ታ ኡባ ዎደ ጌማዳ አትያ ዛላ

ታኒ ጌማዳ አታና መላ ምኖ ሚፃ ግዳ፤

ኤ፥ ኔኒ ታ ዛላነ ታ ሚፃ።

4 ታ ፆሳዉ፥ ኢታታ ኩሸፐነ፥

ቃይ ባይና አሳታፐ ታና አሻ።

5 አቤት ጎዳዉ፥ ታ ናአተፈ ዶማዳ፥

ኔኒ ታ ኡፋይሳነ ታ አማነተ።

6 ታ የለትዳ ዎደፐ ዶማዳ ነናን ዘምፓስ፤

ታ አየ ኡሎፐ ታና ከስዳይ ነና፤

ታኒ ኡባ ዎደ ነና ጋላታና።

7 ኔኒ ታ ቆሰታዳ አትያ በሲ ግድዳ ግሾ፥

ታ ደኦይ ዳሮ አሳስ ሌምሶ ግድስ።

8 ጋላሳ ኡባን ታ ዶናይ

ነ ጋላታንነ ነ ቦንቹዋን ኩምስ።

9 ታኒ ጭምዳ ዎደ ታና የጎፋ፤

ታ ዎልቃይ እፅዳ ዎደ ታና አጎፋ።

10 ታ ሞርከት ታ ቦላ ቶቦሶና፤

ታና ዎናዉ ኮየይሳት ታ ቦላ ማቀቶሶና።

11 ኤንቲ፥ "ፆሳይ እያ አግስ፤ የደድ ኦይኮስ፤

እያ አሻናይ ኦንካ ባዋ" ያጎሶና።

12 ፆሳዉ፥ ታፐ ሃኮፋ

ታ ፆሳዉ፥ ታና ማዳናዉ ኤለሳ።

13 ታና ሞተይሳት ዬላትድ ዮ፤

ታና ቆሀናዉ ኮየይሳት፥

ዬላነ ካዉሸ ማኦ።

14 ሽን ታኒ ኡባ ዎደ ኡፋይሳን ነና ናጋና፤

ዛራ ዛራዳካ ነና ጋላታና።

15 ነ ኦዳባ ታ ታይባናዉ ፆነትኮካ፥

ታ ዶናይ ጋላስ ኡባን ነ ፅሎተነ

ነ አቶተባ ኦዳና።

16 ታኒ ኡባ ሃርያ ጎዳ ዎልቃን ያዳ፤

ነ ፃላላ ፅሎ ግደይሳ አዋጃና።

17 ፆሳዉ፥ ኔኒ ታ ናአተፈ ዶማዳ ታና ታማርሳዳሳ፤

ሀእካ ነ ማላልስያ ኦሱዋ ታ ኦዳና።

18 ፆሳዉ ነ ዎልቃነ ነ ምኖተን

ያ የለታ ኡባስ ኦዳና ጋካናዉ፥

ታኒ ጭማዳ ፑሉምኮካ ታና አጎፋ።

19 ፆሳዉ፥ ነ ፅሎተይ ሳሎ ጋክስ፤

ግታባ ኦዳ ፆሲ፥ ነ መል ኦኔ?

20 ኔኒ ታ ቦላ ዳሮ መቶ ኤሀዳሳ፤

ግዶሽን ታ ደኡዋ ዛራዳ ኦራፅሳዳሳ፤

ኔኒ ታና ቢታ ጋርሳፈ ከሳዳሳ።

21 ኔኒ ታ ቦንቹዋ ዳርሳዳሳ፤

ታና ዛራዳ ምንዳሳ።

22 ታ ፆሳዉ፥ ነ ቱማተ ግሾ፥

ታ ነና ዲን ጋላታና።

አቤት እስራኤለ ጌሻዉ፥

ታ ነና ማስንቆን ሳባና።

23 ታ መተርሻይ ኡፋይሳን ቁ ኦድ የፄስ፤

ኔኒ ታና አሽዳ ግሾ ታኒ ነና ሳባና።

24 ታና ቆሀናዉ ኮየይሳት ዬላትዳ ግሾነ

ካዉይዳ ግሾ ታ እንፃርሳይ ነ ፅሎ ማዱዋባ

ጋላስ ኡባን ኦዳና።