Salmos 84

ፆሳ ኬ ብሸ የፅያ ማዝሙረ

ዛማረታ ሀላቃስ ቆረ ናይት ፃፍዳ ሱሱልኤን የፀትያ ማዝሙረ

1 ኡባፈ ዎልቃማ ጎዳዉ፥

ነ ደእያ በሳይ ዋን ሎእ!

2 ታኒ ጎዳ ኬ ዳባባ ላሞታይስ፤

ታ ኩመ አሳተይ

ደኦ ፆሳስ ኡፋይሳን የፄስ።

3 ኡባፈ ዎልቃማ ጎዳዉ፥

ታ ካዋዉ፥ ታ ፆሳዉ፥

ነ ያርሾ በሳ ማታን

ቡበ ካፎይ ባዉ ደእያ በሲ ደማሱ፤

ሆለይካ ባ ናይታ ዎያ ኬ ኬፃሱ።

4 ነ ኬን ደኤይሳትነ

መርናዉ ነና ሳበይሳት አንጀትዳይሳታ። ሳላሀ

5 ነና ባንታ ምኖተ ኦይሳት፥

ባንታ ዎዛና ፅዮነ ኦግያ ቦላ፥

ዎይሳት አንጀትዳይሳታ።

6 ኤንቲ ዬሆ ዛንጋራራ አያ ዎደ፥

ሄ በሳይ ፑልቶይ ከይያ በሲ ግድስ፤

ቶርቸ እራይ ቡክድ ኦላ ኩንስ።

7 ኤንቲ ዎልቃ ቦላ ዎልቃ ጉጅ ጉጅ ባና፤

እሶይ እሶይ ፆሳ ስንን ፅዮነን በንታና።

8 ኡባፈ ዎልቃማ ጎዳዉ ፆሳዉ፥

ታ ዎሳ ኔኒ ስአ፤

ያይቆባ ፆሳዉ ሀይዛ። ሳላሀ

9 ፆሳዉ፥ ኑ ጎንዳልያ በአ፤

ነ ዶርዳ ካዋ ኬሀ አይፈን ፄላ።

10 ታኒ ሀራ በሳን ሙኩሉ ጋላስ ዳናፐ፥

ነ ዳባባን እስ ጋላስ ደኤይስ ታዉ ሎኦ።

ኢታታ ዱንካንያን ዳናፐ፥

ፆሳ ኬ ፐንገ ናጎይ ታዉ ሎኦ።

11 ጎዳ ፆሳይ ኑስ ጎንዳለነ ፖኦ፤

ኑስ ቦንቾነ ኬሀተ እሜስ፤

ሱረተን ሄመተይሳታ ሎኦባ ድገና።

12 ኡባፈ ዎልቃማ ጎዳዉ፥

ነናን አማነተይሳት አንጀትዳይሳታ።