1 יהוה מלך ירגזו עמים ישב כרובים תנוט הארץ׃2 יהוה בציון גדול ורם הוא על כל העמים׃3 יודו שמך גדול ונורא קדוש הוא׃4 ועז מלך משפט אהב אתה כוננת מישרים משפט וצדקה ביעקב אתה עשית׃5 רוממו יהוה אלהינו והשתחוו להדם רגליו קדוש הוא׃6 משה ואהרן בכהניו ושמואל בקראי שמו קראים אל יהוה והוא יענם׃7 בעמוד ענן ידבר אליהם שמרו עדתיו וחק נתן למו׃8 יהוה אלהינו אתה עניתם אל נשא היית להם ונקם על עלילותם׃9 רוממו יהוה אלהינו והשתחוו להר קדשו כי קדוש יהוה אלהינו׃