1 ଇଫ୍ରୟିମ୍‌ତେ ମାତାଲ୍‌ ନାରୁଡ଼୍‌ ନୁ ଅଙ୍ଗୁର୍‌ରସ୍‌ତେ ଆରେମ୍‌ ଆତ୍‌ତେ ନାରୁଡ଼୍‌ ଗର୍ବଲେକାତ୍‌ ସଜ୍‌, କାୟେ ପୟିତାନ୍‌ ପରୁ ତାଲେତାଗ୍‌ ମାନ୍ଦାନ୍‌ ତାନ୍‌ ସୁନ୍ଦର୍‌ ସଜ୍‌ ଲେକେତ୍‌ ୱାର୍‌ୱାଦ୍‌ ପୁଙ୍ଗାର୍‌, କାରାପ୍‌ତାଦ୍‌ ଆଦ୍‌ତେ ! 2 ଉଡ଼େ ପ୍ରବୁନ୍‌ ୱେରଣ୍ଡ୍‌ ଶକ୍ତିତଣ୍ଡ୍‌ ନୁ ସାହାସ୍‌ତଣ୍ଡ୍‌ ନାରୁଣ୍ଡ୍‌ ମିନ୍ଦେଣ୍ଡ୍‌; ଅଣ୍ଡ୍‌ ବାଣ୍ଡ୍‌କାଲ୍‌ ଲେକାମ୍‌ ଗାଲ୍‌, ୱାର୍‌ସାମ୍‌ ଲେକାମ୍‌, ଯାପେ ତୁଃସ୍‌ ଅଦାନ୍‌ ତୁପାନ୍‌ ଏର୍‌ଦେ ୱାଡ଼୍‌ସାମ୍‌ ଲେକାମ୍‌, କାଇତଡ଼୍‌ ବୂମ୍‌ତାଗ୍‌ ହେଃସିତଡ଼୍‌। 3 ଇଫ୍ରୟିମ୍‌ତେ ଡଲ୍‌ତେ ନାରୁଡ଼୍‌ ଗର୍ବତ୍‌ ସଜ୍‌ ପାଦାତ୍‌ ମଦଲ୍‌ ଗୁଣ୍ଡାଲ୍‌ ଆଦ୍‌ତେ; 4 ମେଣ୍ଡେ, କାୟେ ପୟିତାନ୍‌ ଅନାଦ୍‌ ତାଲେତାଗ୍‌ ମାନ୍ଦାନ୍‌ ତାନ୍‌ ସୁନ୍ଦର୍‌ ବଗିଚାତାଗ୍‌ ୱାର୍‌ୱେ ପୁଙ୍ଗାର୍‌, ଏଦ୍‌କାଲାମ୍‌ତେ ମୁନେତ୍‌ ତୟେକାୟାନ୍‌ ଲେକାମ୍‌ ଆଦ୍‌ତେ; ବାତେ ବେନ ଉଡ଼ୱାନାକେ ଉଡ଼ିତଣ୍ଡ୍‌ ନୁ କାଇଦଡ଼୍‌ ପଇସୱାନାକେ ତିନ୍ଦ୍‌ତଡ଼୍‌। 5 ଆଦ୍‌ ଦିନାମ୍‌ତେ ସାରେକେ ବେଡ଼ିୟନ୍‌ ସଦାପ୍ରବୁ ତାନ୍‌ ନାରୁଡ଼୍‌ ମାନ୍ଦାନ୍‌ ସାରେତଡ଼୍‌ ସେଙ୍ଗେ ଗୌରବତେ ସଜ୍‌ ନୁ ୱେସ୍‌ ଲେକାମ୍‌ ଆଦ୍‌ତେ; 6 ମେଣ୍ଡେ, ବିଚାର୍‌ ମାଡ଼ାନ୍‌ ସେଙ୍ଗେ ବେଡ଼ିୟେ ନାରୁଣ୍ଡ୍‌ ପରୁ ବିଚାର୍‌ତାଦ୍‌ ଆତ୍ମା ନୁ ବେନଡ଼୍‌ ନଗର୍‌ ଆର୍‌ତାଗ୍‌ ଯୁଦ୍ଦ୍‌ ମାଲ୍‌ପିତଡ଼୍‌, ଅଡ଼୍‌ ପର ଶକ୍ତି ଲେକାମ୍‌ ଆଦ୍‌ତେ।

7 ମାତର୍‌ ଇଡ଼୍‌ଏକେ ଅଙ୍ଗୁର୍‌କାଲ୍‌ତେ କାନାନଡ଼୍‌ ଆସ୍‌ମିନ୍ଦେଡ଼୍‌ ନୁ କାଲ୍‌ଉଞ୍ଜ୍‌ କାରାପ୍‌ ଆର୍‌ଦାଗ୍‌ ଆଞ୍ଜ୍‌ ମିନ୍ଦେଡ଼୍‌; ଯାଜକ୍‌ ନୁ ବବିଷ୍ୟଦ୍‌ବକ୍ତାଲ୍‌ କାଲ୍‌ଉଞ୍ଜ୍‌ ବୁଲ୍‌କା ଆସ୍‌ମିନ୍ଦେଡ଼୍‌, ଅଙ୍ଗୁର୍‌ରସ୍‌ ଅଡ଼୍‌କିଂଙ୍କ୍‌ ଗ୍ରାସ ମାଡ଼ିମିନ୍ଦେ, କାଲ୍‌ଉଞ୍ଜ୍‌ ଅଡ଼୍‌ କାରାପ୍‌ ଆର୍‌ଦାଗ୍‌ ଆଞ୍ଜ୍‌ ମିନ୍ଦେଡ଼୍‌; ଅଡ଼୍‌ ଦର୍ଶନତାଗ୍‌ ବୁଲ୍‌କା ଆଦ୍‌ତଡ଼୍‌, ବିଚାର୍‌ତାଗ୍‌ ତାଲ୍‌ଗି ରାଲିତଡ଼୍‌। 8 ବାତେଙ୍କ୍‌ଇତ୍କେ, ଟେବୁଲ୍‌ ଏକାମ୍‌ ପର୍ସ୍‌ତାଦ୍‌ ନୁ ବେଗେମିକା ଇସୁର୍‌ମିକା ସାୟେତାଦ୍‌ ପଡ଼ିୟେ ଇଲେ। 9 ଅଣ୍ଡ୍‌ ବେନଙ୍କ୍‌ ଜ୍ଞାନ୍‌ ଶିକ୍ଷା ଇଦ୍‌ତଣ୍ଡ୍‌ ? ଅଣ୍ଡ୍‌ ବେନଙ୍କ୍‌ ସମାଚାର୍‌ ବୁଜାମାଡ଼ିତଣ୍ଡ୍‌ ? କି ପାଲ୍‌ ୱିଡ଼୍‌ସ୍ତେନଡ଼୍‌ ନୁ ପାଲ୍‌ ୱିଡ଼୍‌ସି ମାନ୍ଦାନ୍‌ ପିଲାକିଙ୍କ୍‌ ? 10 ବାତେଙ୍କ୍‌ଇତ୍କେ, ଇଦ୍‌ ତ ନିୟମ୍‌ ପରୁ ନିୟମ୍‌, ନିୟମ୍‌ତେ ପରୁ ନିୟମ୍‌; ଲାଇନ୍‌ତେ ପରୁ ଲାଇନ୍‌, ଲାଇନ୍‌ତେ ପରୁ ଲାଇନ୍‌; ଇଗେ ଇସୁକ୍‌, ଆଗେ ଇସୁକ୍‌। 11 ଇଲ୍ଲେ, ମାତର୍‌ ଆଦ୍‌ ବିଦେଶିତେ ପାୟୁର୍‌ତଡ଼୍‌ ନୁ ୱେରେଗଟ୍‌ ତଡ଼୍‌ ଇ ନାରୁଡ଼୍‌କିଙ୍କ୍‌ ଗଟି କେତିତଡ଼୍‌; 12 ଅଣ୍ଡ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, "ଇଦ୍‌ ରମାନାଦ୍‌, ମିଡ଼୍‌ ଆୟିତେ ନାରୁଡ଼୍‌କିଙ୍କ୍‌ ରମାନଙ୍କ୍‌ ଇମୁଟ୍‌, ମେଣ୍ଡେ, ଇଦ୍‌ ତ ରମାନାଦ୍‌," ମାତର୍‌ ଅଡ଼୍‌ କେଞ୍ଜାନଙ୍କ୍‌ ତିଆର୍‌ ଆଇୟଡ଼୍‌। 13 ଆଦିଙ୍କ୍‌ ଅଡ଼୍ ବେଲାନ୍‌ ଆଞ୍ଜ୍‌ ପେର୍କେଆଞ୍ଜ ଉର୍ଙ୍ଗିତଡ଼୍‌, ଉଡ଼ିୟିତାଗ୍‌ ଆର୍ଦ୍‌ତଡ଼୍‌ ନୁ ପୟିତ୍‌ତଡ଼୍‌, ଆଦିନ୍‌ ସେଙ୍ଗେ ଅଡ଼୍‌ ପରୁ ସଦାପ୍ରବୁନ୍‌ ବାକ୍ୟ ନିୟମ୍‌ତେ ପରୁ ନିୟମ୍‌, ନିୟମ୍‌ତେ ପରୁ ନିୟମ୍‌; ଲାଇନ୍‌ତେ ପରୁ ଲାଇନ୍‌, ଲାଇନ୍‌ତେ ପରୁ ଲାଇନ୍‌; ଇଗେ ଇସୁକ୍‌, ଆଗେ ଇସୁକ୍‌ ଆଦ୍‌ତଡ଼୍‌।

14 ଆଦିଙ୍କ୍‌ ହୋ ଯିରୂଶାଲେମ୍‌ତେ ନାରୁଡ଼୍‌ତେ ଶାସନ୍‌ ମାଡ଼ାନଡ଼ି ନିନ୍ଦେ ମାଡ଼ାନଡ଼ି, ମିଡ଼୍‌ ସଦାପ୍ରବୁନ୍‌ ବାକ୍ୟ କେଞ୍ଜାଟ୍‌; 15 ମିଡ଼୍‌ କେସମିନ୍ଦେଡ଼ି, "ମାମେ ଡଲାନାଦିନ୍‌ତଡ଼୍‌ ନିୟମ୍‌ ମାଡ଼ିମିନ୍ଦେମ୍‌ ନୁ ପାତାଲ୍‌ତଡ଼୍‌ ମାୟାଦ୍‌ ଚାନ୍ଦ୍‌ ମାଡ଼ି ମିନ୍ଦେମ୍‌; ଆଦିଙ୍କ୍‌ ଏର୍‌ ଗାଙ୍କୁଡ଼୍‌ ଲେକାମ୍‌ କରଡ଼ା ରେଃତାନ୍‌ ୱେଲେ ଆଦ୍‌ ମା ପାକେ ୱାଡ଼; ବାତେଙ୍କ୍‌ଇତ୍କେ ମାମେ ମିଚ୍‌ତିଙ୍କ୍‌ ମା ନିଜେତାଦ୍‌ ପଡ଼ିୟେ ମାଡ଼ିମିନ୍ଦେମ୍‌ ନୁ ସତ୍‌ତିଙ୍କ୍‌ ମଦଲ୍‌ ମାମେ ନିଜେତାଗ୍‌ ମିଞ୍ଜସ୍ପି ମିନ୍ଦେମ୍‌," 16 ଆଦିଙ୍କ୍‌ ପ୍ରବୁ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ଉଡ଼େ, ମାମେ ବିତ୍ତିମୁଲେତିଙ୍କ୍‌ ସିୟୋନ୍‌ତେ ୱେରଡ଼୍‌ କାଲ୍‌, ପରୀକ୍ଷା ଆତ୍‌ତେ କାଲ୍‌, ଢ଼ାଟୁମ୍‌ ମଦଲ୍‌ ଲେକାମ୍‌ ନାର୍ଗେଦାମିନ୍‌ ମୁଲେତ୍‌କାଲ୍‌ ତିଆର୍‌ ମାଡ଼ିମିନ୍ଦେମ୍‌; ବେନ ବିଶ୍ୱାସ୍‌ ମାଡ଼ିତଣ୍ଡ୍‌, ଅଣ୍ଡ୍‌ ସିଗ୍‌ ଆୟ୍‌ୟଣ୍ଡ୍‌। 17 ମେଣ୍ଡେ, ମାମେ ନ୍ୟାୟ ବିଚାର୍‌ତିଙ୍କ୍‌ ପରିମାଣତେ ନଡ଼ମ୍‌ ନୁ ଦାର୍ମିକ୍‌ତିଙ୍କ୍‌ ଓଲମ୍‌ ମାଡ଼ିକାଡ଼୍‌; ମେଣ୍ଡେ, ଆଦୁର୍‌ଗାଡ଼ାନ୍‌ ୱାଡ଼୍‌ସାମ୍‌ ବୁସାଲେକାମ୍‌ ପଡ଼ିୟେତିଙ୍କ୍‌ ଦଂସ ମାଡ଼ିତେ ନୁ ଏର୍‌ସାରେ ମିଞ୍ଜାନ୍‌ ପଡ଼ିୟେତିଙ୍କ୍‌ ଉଃତିକାଡ଼୍‌। 18 ମେଣ୍ଡେ, ଡଲାନାଦିନ୍‌ ତଡ଼୍‌ ମିୟାଦ୍‌ ମାଡ଼ି ମାନ୍ଦାନ୍‌ ନିୟମ୍‌ ଦୁର୍‌ ମାଡ଼ିତଡ଼୍‌ ନୁ ପାତାଲ୍‌ତଡ଼୍‌ ମିୟାଦ୍‌ ଚାନ୍ଦ୍‌ କଟ ମାନନ୍‌; ଏର୍‌ ଗାଙ୍କୁଡ଼୍ ଲେକାମ୍‌ କରଡ଼ା ୱାଦାନ୍‌ ୱେଲେ ମିଡ଼୍‌ ଆଦିନ୍‌ତଡ଼୍‌ ଦଂସ ଆଦ୍‌ତିଡ୍‌। 19 ଆଦ୍‌ ବେସ୍କ୍‌ଦାମ୍‌ ୱାଦ୍‌ତେ, ଆସ୍କ୍‌ଦାମ୍‌ ମିକିଙ୍କ୍‌ ପୟ୍‌ଦ୍‌ତଡ଼୍‌; ବାତେଙ୍କ୍‌ଇତ୍କେ ନାର୍କକ୍‌ତିଙ୍କ୍‌ ନାର୍କୁକ୍‌, ଦିନାମ୍‌ ନୁ ନାର୍କା ଆଦ୍‌ ହେୱ୍‌ଦ୍‌ତେ ; ମେଣ୍ଡେ, ଆଦ୍‌ ସମାଚାର୍‌ ବୁଜେମ୍‌ ଆଦାନାଦ୍‌ ମାତର୍‌ ୱେର୍‌ତାନଙ୍କ୍‌ ଆଦ୍‌ତେ। 20 ବାତେଙ୍କ୍‌ଇତ୍କେ ନିଜେତିଙ୍କ୍‌ ଆତାନ୍‌ ସେଙ୍ଗେ ନାରୁନ୍‌ ପାଟାନ୍‌ ପଡ଼ିୟେ ସୁଦୁରାଦ୍‌ ନୁ ନିଜେତିଙ୍କ୍‌ ମୁଚାନଙ୍କ୍‌ ସେଙ୍ଗେ ଚିଲେ ସୁଦୁର୍‌। 21 ବେଲାନ୍‌ ସଦାପ୍ରବୁ, ବେଲାନ୍‌ ପରାସୀମ ମେଟେତାଗ୍‌, ଆଦ୍‌ଲେକାମ୍‌ ତେଦିତେ, ବେଲାନ୍‌ ଗିବୀୟୋନ୍‌ତେ ମଦଲ୍‌ତେବୁମ୍‌ତାଗ୍‌, ଆଦ୍‌ଲେକାମ୍‌ ଅଣ୍ଡ୍‌ କପାମ୍‌ ମାଡ଼ିତଣ୍ଡ୍‌; ଆସୁଙ୍କ୍‌ ଅଣ୍ଡ୍‌ ନିଜେତ୍‌ କାମ୍‌, ନିଜେତ୍‌ ବାକ୍‌ୱା କାମ୍‌ ପୁରା ମାଡ଼ିତଣ୍ଡ୍‌ ନୁ ନିଜେତ୍‌ ବେପାର୍‌ ନୁ ନିଜେତ୍‌ ବାକ୍‌ୱା କାମ୍‌ତେ ବେପାର୍‌ତିଙ୍କ୍‌ ପୁରା ମାଡ଼ିତଣ୍ଡ୍‌। 22 ଆଦିଙ୍କ୍‌ ଇଞ୍ଜେ ମିଡ଼୍‌ ନିନ୍ଦେତଡ଼ି ଆୟିମାଟ୍‌, ପେର୍କେ ବା ମିୟାଦ୍‌ ଉଡ଼ି ଡାଟୁଙ୍କ୍‌ ଆଦ୍‌ତେ, ବାତେଙ୍କ୍‌ଇତ୍କେ ପ୍ରବୁ, ସାରେକେ ବେଡ଼ିୟନ୍‌ ସଦାପ୍ରବୁନାଗାଙ୍କ୍‌ ମାମେ ସାରା ପୃତିବୀ ପରୁ ଦଂସ, ତିଆର୍‌ତେ ଦଂସତେ ଗଟ୍‌ କେଞ୍ଜିମିନ୍ଦେମ୍‌।

23 ମିଡ଼୍‌ କେୱୁତାରି ମାୟାଦ୍‌ ଲେଙ୍ଗ୍‌ କେଞ୍ଜାଟ୍‌; ମାନ୍‌ଇସ୍‌ ମିକା ମାୟାଦ୍‌ ବାକ୍ୟ ଗ୍ରହନ୍‌ ମାଡ଼ାଟ୍‌। 24 ଚାଷୀ ୱିଜେ ୱିତାନଙ୍କ୍‌ ବାତେ ନିତାଲ୍‌ ନାଙ୍ଗେଲ୍‌ ଉଡ଼୍‌ସ୍ପିତଣ୍ଡ୍‌ ? ଅଣ୍ଡ୍‌ ବାତେ ନିତାଲ୍‌ ଦନ୍ଦ୍‌ମାଡ଼ି ନିଜେତ୍‌ ବୁମ୍‌ତେ ଗାଡା ଉଃତିତଣ୍ଡ୍‌ ? 25 ଅଣ୍ଡ୍‌ ବାତେ ବୁମ୍‌ତେ ପରୁତ୍‌ପାକେ ସାମାନ୍‌ ମାଡ଼୍‌ତେ ପେର୍କେ ଗୁଡିଜୀରା ଜାଲିଇୱଣ୍ଡ୍‌ ନୁ ଜୀରା ୱିତଣ୍ଡ୍‌ ନୁ ଲାଇନ୍‌ ଲାଇନ୍‌ ମାଡ଼ି ଗହମ୍‌, ତିଆର୍‌ ମାଡ଼୍‌ତେ ପଡ଼ିୟେତାଗ୍‌ ଏଣ୍ଡ୍‌ ଜନା ନୁ ୱାୟେତେ ଚାନ୍ଦିତାଗ୍‌ ବାତେ ଜନା ୱିତଣ୍ଡ୍‌ ? 26 ବାତେଙ୍କ୍‌ଇତ୍କେ, ତାନ୍‌ ପରମେଶ୍ୱର୍‌ ଆଦିଙ୍କ୍‌ ଲେକେତ୍‌ ବୁଦ୍‌ ଇଦ୍‌ତଣ୍ଡ୍‌ ନୁ ଅଣ୍ଡ୍‌ ଆଦିଙ୍କ୍‌ ନାଡ଼ସ୍ପିତଣ୍ଡ୍‌। 27 ବେଲାନ୍‌ ଗୁଡିଜୀରା ବାତେବା ସୁଜେ ମାନ୍ଦାନ୍‌ ଜିନିଷ୍‌ତେ ୱିସାନାଦ୍‌ ଆୟ, କି ଜୀରା ପରୁ ଉଡାନ୍‌ ବାଣ୍ଡ୍‌ ଉଡ଼୍‌ସ୍ପଡ଼୍‌; ମାତର୍‌ ଗୁଡିଜୀରା ଟେଙ୍ଗେତେ ନୁ ଜୀରା ତଲ୍‌କାନାଙ୍କ୍‌ ୱେରେ ୱିର୍‌ସ୍ପିତଡ଼୍‌। 28 ରୁଟିତେ ଶସ୍ୟ ଗୁଣ୍ଡାଲ୍‌ ମାଡ଼ାନାଦ୍‌; ବାତେଙ୍କ୍‌ଇତ୍କେ ଆଦ୍‌ ସରେଦିନା ଆୱିଙ୍କ୍‌ ୱିସଡ଼୍‌; ମେଣ୍ଡେ, ଯଦିବା ଆଦିନ୍‌ ଉଡାନ୍‌ ବାଣ୍ଡ୍‌ ଚେକା ନୁ ଆଦିନ୍‌ ଗୁରାକ୍‌ ଆଦ୍‌ ୱେରେୱେରେ ମାଡ଼ିତା, ଆଗେକ୍‌ବା ଆଦ୍‌ ଗୁଣ୍ଡାଲ୍‌ ଆୟ। 29 ଇଦ୍‌ଏକେ ସାରେତିଙ୍କ୍‌ ବେଡ଼୍‌ୟନ୍‌ ସଦାପ୍ରବୁନାଗାଙ୍କ୍‌ ଆଦ୍‌ତେ, ଅଣ୍ଡ୍‌ ବାବ୍‌ନାତେ ଆଶ୍ଚର୍ଯ୍ୟ ନୁ ଜ୍ଞାନ୍‌ତେ ମହାନ୍‌।