1 ବେନଡ଼ ସାହାଯ୍ୟ ମାଇଦିଙ୍କ୍‌ ମିସର୍‌ତା ଆଦ୍‌ତଡ୍‌ ନୁ ଗୁରାକିନ୍‌ ପରୁ ଆଶେ ମାଡିତଡ଼୍‌ ନୁ ରତ ନାର୍ଗେ ଆୟିନାଙ୍କ୍‌, ମେଣ୍ଡେ ଗୁରାକ୍‌ ଗାଟି ଶକ୍ତିତାୱୁ ଆୟିନାଙ୍କ୍‌ ଆୱିନ୍‌ ପରୁ ବିଶ୍ୱାସ୍ ମାଡ଼ିତଡ୍; ମାତର୍‌ ଇସ୍ରାଏଲ୍‌ତେ ଦର୍ମକିଙ୍କ୍‌ ପର ଉଡ଼କଟ, କି ସଦାପ୍ରବୁନ୍‌ ପେର୍କେ ଆନଡ଼୍‌, ଅଡ଼୍‌ ଦଣ୍ଡ୍‌ତେ ନାରୁଡ଼୍‌ ! 2 ଆଗେକ୍‌ବା ଅଣ୍ଡ୍ ମିକା ଜ୍ଞାନ୍‌ଦେନଣ୍ଡ୍‌ ନୁ ଅଣ୍ଡ୍ ବିପଦ୍‌ ମାଡ଼୍‌ନଣ୍ଡ୍‌, ମେଣ୍ଡେ, ଅନାଦ୍‌ ବାକ୍ୟ ୱେରେ ମାଡ଼ଣ୍ଡ୍‌; ମାତର୍‌ ଅଣ୍ଡ୍‌ ପିନ୍ଦ୍‌ଇଲ୍‌ୱାଦ୍‌ ପାଡ଼ିୟିଦେ ପିଲୁଡ୍‌ତେ ପାକେ ନୁ ଅଦର୍ମକାଡ଼ିକ୍‌ ସାହାଯ୍ୟ ମାଡାନଡ୍‌ ପାକେ ତେଦିତଡ଼୍‌। 3 ମିସ୍ରୟଡ଼୍‌ ନାରୁଡ଼୍‌ ମାତର୍‌, ପରମେଶ୍ୱର୍‌ ଆୟଡ଼୍‌ ନୁ ଅଡ଼ାୱୁ ଗୁରାକ୍‌ ଆୱୁଙ୍ଗିନ୍‌ ଲେକାମ୍‌, ଆତ୍ମା ଆୟ; ମେଣ୍ଡେ, ସଦାପ୍ରବୁ ତାନ୍‌ କାଇ ଆତ୍‌ତଣ୍ଡ୍, ସାହାଯ୍ୟ ମାଡ଼ାନଡ଼୍‌ ତାଲ୍‌ଗି ରାଲିତିଡ଼୍‌ ନୁ ସାହାଯ୍ୟ ଆର୍‌କେ ରାଲିତିଡ଼୍‌, ମେଣ୍ଡେ ଇର୍‌ୱୁଡ଼୍‌ ଅଣ୍ଡୟ୍‌ଦାମ୍‌ ନଷ୍ଟ ଆଦ୍‌ତେ।

4 ବାତେଙ୍କ୍‌ଇତ୍କେ ସଦାପ୍ରବୁ ମିକିଙ୍କ୍‌ ଇଦ୍‌ଗଟ୍ କେତ୍‌ତଣ୍ଡ୍‌, "ବେଲାନ୍‌ ସିଂହଡୁୱ୍‌ ନୁ ଲେୟେ ସିଂହଡୁୱ୍‌ ତାନ୍‌ ଶିକାର୍‌ତେ ପର ଲେଙ୍ଗ୍‌ ମାଡ଼ିତ୍‌, ନାର୍ଗେ ନାର୍ଗେ ମେଣ୍ଢା ମେୟ୍‌ତାନଡ଼୍‌ ଆଦିନ୍‌ ବିରୁଦ୍ଧତେ କାର୍‌ଙ୍ଗ୍‌କେ କେ ଅଣ୍ଡ୍‌ ଅଡ଼୍‌ ଲେଙ୍ଗ୍‌ତେ ୱେଦ୍‌ୱେଦା ଆୟଣ୍ଡ୍‌, କି ଅଡ଼୍‌ ରାମ୍‌କିନାଗ୍‌ ନିଜେତିଙ୍କ୍‌ କାଲ୍‌ପଣ୍ଡ୍‌, ଆଦ୍‌ଲେକାମ୍‌ ସାରେତିଙ୍କ୍ ବେଡିୟେ, ସଦାପ୍ରବୁ ସିୟୋନ୍‌ ମେଟେତାକ୍‌ ନୁ ଆୱିନ୍‌ ବେଡ଼ିୟେ ମେଟାନାଗ୍‌ ଯୁଦ୍‌ ମାଡ଼ାନଙ୍କ୍‌ ଡିଗି ୱାଦ୍‌ତଡ଼୍‌। 5 ବେଲା କି ପିଟେକି ପାର୍ସ ପାର୍ସ ଗେଲ୍‌ସ୍ପିତା, ଆଦ୍‌ଲେକାମ୍‌ ସାରେତିଙ୍କ୍ ବେଡିୟେ ସଦାପ୍ରବୁ ଯିରୁଶାଲାମ୍‌ତିଙ୍କ୍‌ ରକ୍ଷା ମାଡ଼ିତଣ୍ଡ୍‌; ଅଣ୍ଡ୍‌ ତାହାକିଙ୍କ୍‌ ରକ୍ଷା ମାଡ଼ି ଗେଲ୍‌ସ୍ପିତଣ୍ଡ୍‌, ଅଣ୍ଡ୍‌ ଆଦିଙ୍କ୍‌ ମୁକ୍ତି ମାଡ଼ି ରକ୍ଷା ମାଡ଼ିତଣ୍ଡ୍‌।

6 ସଦାପ୍ରବୁ କେତ୍‌ତଣ୍ଡ୍ ହୋ ଇସ୍ରାଏଲ୍‌ତେ ପିଲାନଡ୍‌, ମିଡ଼୍‌ ଇଦ୍‌ଲେକାମ୍‌ ନାର୍ଗେପାପ୍‌ ମାଡ଼ି ବେନନାଗାଙ୍କ୍‌ ୱେର୍‌ଆସ୍‌ ମିନ୍ଦେଡ଼ି, ଅନାକଞ୍ଜ୍‌ ମାଲ୍‌ସ୍‌ ୱାଡ଼ାଟ୍‌ 7 ବାତେଙ୍କ୍‌ଇତ୍କେ ଆ ଦିନାତେ ମିୟାକଞ୍ଜ୍‌ ବେସର୍‌ ଜାନ୍ ନିଜର୍‌ ନିଜର୍‌ କାଇ ତିଆର୍‌ ରୁପାତେ ମୂର୍ତ୍ତି ନୁ ସୁନାତେ ମୂର୍ତ୍ତି ଲେକାମ୍‌ ପାପାମ୍‌ତେ ଜିନିଷ୍‌ ୱାଟିତଡ଼୍‌। 8 ଆ ସମୟତେ ଅଶୂରିୟ କଡ୍‌ଗତେ ମିସ୍‌ ଆଦ୍‌ତିଡ଼୍‌, ମାତର୍‌ ନାରୁଡ଼୍‌ ଚୁର୍‌ତେ ଆୟ; ମେଣ୍ଡେ, ଆଦ୍ କଡ଼୍‌ଗ ଗ୍ରାସ ମାଡ଼ିତ୍‌, ମାତର୍‌ ନାରୁଡ଼୍ ଚୁର୍‌ତେ ଆୟ; ମେଣ୍ଡ, ଅଣ୍ଡ୍ କଡ଼୍‌ଗ ମୁନେ ମିରିତା ନୁ ତାନ୍ ଲେୟଡ଼୍ ଦାସ ଆଦ୍‌ତଡ଼୍। 9 ମେଣ୍ଡେ, ୱେର୍‌ତାନ୍‌ ଆଦିନ୍‌ କାଲାକ୍‌ ଶେଷ ଆୟିନା ହେବ ନୁ ତାନ୍‌ ଅଦିପତିନଡ଼୍‌ ପତ୍‌କା ଉଡ଼ି ୱେର୍‌ତଡ଼୍‌," ସିୟୋନ୍‌ତେ ବେନନାଦ୍‌ କିସ୍‌ ନୁ ଯିରୂଶାଲାମ୍‌ତାଗ୍‌ ବେନାଦ୍‌ କିସ୍‌ ଗୁଇନ୍ଦେ ମିନ୍ଦେ, ଅଣ୍ଡ୍ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌।