1 ସଦାପ୍ରବୁ ଅଣ୍ଡ୍‌ ହେଞ୍ଚ୍‌ତେ ନାରୁଙ୍କ୍‌, ଇତ୍କେ, କୋରସ୍‌ତେ ବିଷୟତେ ଇଦ୍‌ ଗଟ୍‌ କେତିତଣ୍ଡ୍‌, ମାମେ ଆଦିନ୍‌ ମୁନେ ୱେରେ ୱେରେ ଗୋଷ୍ଠକିଙ୍କ୍‌ ଆରାମାଡ଼ାନ୍‌ ସେଙ୍ଗେ ଆଦ୍‌ ତିନ୍ଦେକାଇଦାଗ୍‌ ପୟିସ୍‌ ମିନ୍ଦେମ୍‌ ନୁ ମାମେ ରାଜାନଡ଼୍‌ ପାଡ଼େତାଗ୍‌ ତଃତାଦ୍‌ ଲେତିକାଡ଼୍‌; ମାମେ ଆଦିନ୍‌ ମୁନେ କାପାଟ୍‌ସାରେ ଟେଣ୍ଡିକାଡ଼୍‌ ନୁ ନଗର୍‌ତେ ଆର୍‌ସାରେ ବନ୍ଦ ଆୟ; 2 "ମାମେ ମି ମୁନେ ମୁନେ ଆଦ୍‌ତମ୍‌, ମେରାକ୍‌ ପଡ଼ିୟାସାରେ ସମାନ୍‌ ମାଡ଼ିକାଡ଼୍‌; ମାମେ ପିତ୍ତଲ୍‌ତେ କାପାଟ୍‌ସାରେ ଉଃସ୍‌ ଦୁଡ଼ା ଦୁଡ଼ା ମାଡ଼ିକାଡ଼୍‌ ନୁ ଲୁଆ ଗେଡ଼ାସାରେ କଇଦିକାଡ଼୍‌; 3 ମେଣ୍ଡେ, ମାମେ ଇକାଡ଼୍‌ତାୱୁ ଦନ୍‌ ବାକ୍‌ଡେତାଗ୍‌ ନୁ ମିଞ୍ଚିସ୍ପି ନେଃସ୍‌ ମାନ୍ଦାନ୍‌ ସମ୍ପତ୍ତିସାରେ ମିକିଙ୍କ୍‌ ଇଦ୍‌ତମ୍‌, ଆସୁଙ୍କ୍‌ ମିୟାଦ୍‌ ପୟିସ୍‌ କାର୍ଙ୍ଗାନମ୍‌ ମାମେ ଯେ ସଦାପ୍ରବୁ, ଇସ୍ରାଏଲ୍‌ତେ ପରମେଶ୍ୱର୍‌ ଆଦ୍‌ତମ୍‌, ଇଦ୍‌ ମାମେ ପୁନ୍ଦ୍‌ତମ୍‌। 4 ମା ଦାସ ଯାକୁବ ନୁ ମାମେ ହେଞ୍ଚିମାନ୍ଦାନ୍‌ ଇସ୍ରାଏଲ୍‌ତେ ସେଙ୍ଗେ ମାମେ ମିୟାଦ୍‌ ପେଦେର୍‌ ପୟିସ୍‌ ମିକିଙ୍କ୍‌ କାର୍ଙ୍ଗିମିନ୍ଦେମ୍‌; ନିମେ ମାକିଙ୍କ୍‌ ପୁନ୍‌ୱେ ମାତ୍‌କେ ମିକା ମାମେ ମିକିଙ୍କ୍‌ ପଦ୍‌ ଇସ୍‌ମିନ୍ଦେମ୍‌। 5 ମାମେ ସଦାପ୍ରବୁ, ନା ଲେକାମ୍‌ ୱେରେ ବେନ ଇଲାଣ୍ଡ୍‌; ମାକ୍‌ ୱିଡ଼୍‌ସି ମେଣ୍ଡେ ପରମେଶ୍ୱର୍‌ ଇଲାଣ୍ଡ୍‌; ନିମେ ମାକିଙ୍କ୍‌ ପୁନ୍‌ୱେ ମାତ୍‌ତ୍କେ ମିକା ମାମେ ମିକିଙ୍କ୍‌ ଶକ୍ତି ଇଦ୍‌ତମ୍‌; 6 ଆସୁଙ୍କ୍‌ ମାକ୍‌ ୱିଡ଼୍‌ସି ଯେ ବେନ ଇଲାଣ୍ଡ୍‌, ଇଦ୍‌ ପଡ଼ଦ୍‌ପେୟିତାନ୍‌ ପଡ଼ିୟେତାଗାଙ୍କ୍‌ ପଶ୍ଚିମ୍‌ ଆଦାନ୍‌ ହେୱୁନା ନାରୁଡ଼୍‌ ପୁନ୍ଦ୍‌ତଡ଼୍‌; ନାନେ ସଦାପ୍ରବୁ, ମେଣ୍ଡେ ବେନ ଇଲାଣ୍ଡ୍‌। 7 ମାମେ ୱେଇସ୍‌ ତିଆର୍‌ ମାଡ଼ିତମ୍‌ ନୁ ମାମେ ଇକାଡ଼୍‌ ତିଆର୍‌ ମାଡ଼ିତମ୍‌; ମାମେ ଶାନ୍ତିଦାତା ମାଡ଼ିତମ୍‌, ବିପଦ୍‌ ତିଆର୍‌ ମାଡ଼ିତମ୍‌; ନାନେ ସଦାପ୍ରବୁ ଇୱୁସାରେ ତିଆର୍‌ ମାଡ଼ିତମ୍‌। 8 ହୋ ମାବ୍‌ମୟ୍‌ଲ୍‌, ମିଡ଼୍‌ ପରୁଙ୍କ୍‌ ୱାନେ ମେର୍ସା, ମାବ୍‌ ଦାର୍ମିକ୍‌ତେ ୱାର୍‌ସାମ୍‌ ମାଡ଼ିକାଡ଼୍‌; ବେଦ୍‌ଲେକାମ୍‌ ପରିତ୍ରାଣ ପେୟିତିତ୍‌, ଆଦିନ୍‌ ସେଙ୍ଗେ ପୃତିବୀ ଅସାର୍‌ ଆୟି ନୁ ଅଣ୍ଡ୍‌ ଦାର୍ମିକତା ଅଣ୍ଡୟ୍‌ଦାମ୍‌ ମଡ଼୍‌ସ୍ପିତମ୍‌; ମାମେ ସଦାପ୍ରବୁ ଇଦ୍‌ ତିଆର୍‌ ମାଡ଼ିମିନ୍ଦେମ୍‌।

9 ବେନ ନିଜେ ସୃଷ୍ଟିକର୍ତ୍ତାନ୍‌ ସାଙ୍ଗେ ରାମ୍‌କ ମାଡ଼ିତଣ୍ଡ୍‌, ଅଣ୍ଡ୍‌ ଦୁଃକାମ୍‌ ନାରୁଣ୍ଡ୍‌ ! ପୃତିବୀତେ କପରା କିନାଗ୍‌ ସୁଦୁର୍‌ କପରା ମାତର୍‌ ! ମୃର୍ତ୍ତିଲେକା ବାତ୍‌ତେ ଆଦିନ୍‌ ତିଆର୍‌ ମାଡ଼ାନ୍‌ କୁମାଙ୍କ୍‌ କେତିତଣ୍ଡ୍‌, ନିମେ ବାତ୍‌ତେ ତିଆର୍‌ ମାଡ଼ିମିନ୍ଦେନି ? କି ନିୟାଦ୍‌ କାମ୍‌ ବାତ୍‌ତେ କେତିତିନ୍‌, ଅନାଦ୍‌ କାୟି ଇଲ୍‌ଲେ ? 10 ବେନ ୟାୟବାବାଙ୍କ୍‌ କେତିତଣ୍ଡ୍‌, ନିମେ ବାତ୍‌ତେ ଜନ୍ମମାଡ଼୍‌ତିନ୍‌, କି ନାଟାଡ଼୍‌ତିଙ୍କ୍‌ କେତିତେ, ନିମେ ବାତ୍‌ତେ ଜନମ୍‌ ମାଡ଼ୁତିନ୍‌ ? ଅଣ୍ଡ୍‌ ଦଣ୍ଡ୍‌ ଆଦାନ୍‌ ନାରୁଣ୍ଡ୍‌ ! 11 ସଦାପ୍ରବୁ, ଇସ୍ରାଏଲ୍‌ତେ ପବିତ୍ର ଇଶ୍ୱର୍‌ ନୁ ତାନ୍‌ ତିଆର୍‌ ତେ କର୍ତ୍ତାଲ୍‌ ଇଦ୍‌ ଗଟ୍‌ କେତିତଣ୍ଡ୍‌, ମୁଲେତ୍‌ ତିଆର୍‌ତେ ବିଷୟ ମାକିଙ୍କ୍‌ ପଚ୍ରାମାଡ଼୍‌ଡ଼େ; ମିଡ଼୍‌ ମା ପିଲାକିନ୍‌ ବିଷୟ୍‌ତେ ନୁ ମା କାଇଦେ କାମ୍‌ ବିଷୟ୍‌ତେ ମାକିଙ୍କ୍‌ ଆଦେଶ୍‌ ଇମ୍‌। 12 ମାମେ ପୃତିବୀ ତିଆର୍‌ ମାଡ଼ିମିନ୍ଦେମ୍‌ ନୁ ଆସୁଙ୍କ୍‌ ମେଣ୍ଡେ ନାରୁଣ୍ଡ୍‌ ତିଆର୍‌ ମାଡ଼ିମିନ୍ଦେଣ୍ଡ୍‌; ମାମେ, ମା କାଇ ମାବ୍‌ମୟଲ୍‌ ଏକାମ୍‌ ମାଡ଼ିମିନ୍ଦେଣ୍ଡ୍‌ ନୁ ଆଗେତ୍‌ ସାରେ ବିଷୟତିଙ୍କ୍‌ ମାମେ ଆଦେଶ୍‌ ଇସ୍‌ମିନ୍ଦେମ୍‌। 13 ମାମେ ଦର୍ମତେ ଆଦିଙ୍କ୍‌ ମେଣ୍ଡେ ତିଆର୍‌ ମାଡ଼ିମିନ୍ଦେମ୍‌ ନୁ ମାମେ ଅନାଦ୍‌ ସାରେ ଆର୍‌ ସାୟେ ମାଡ଼ିକାଡ଼୍‌; ଅଣ୍ଡ୍‌ ମା ନଗର୍‌ ତିଆର୍‌ ମାଡ଼ିତଣ୍ଡ୍‌ ନୁ ଅଣ୍ଡ୍‌ ମାନ୍‌ ବନ୍ଦି ନାରୁଡ଼୍‌କିଙ୍କ୍‌ ୱିଡ଼୍‌ସିଦ୍‌ତଣ୍ଡ୍‌, ଦାମ୍‌ ସେଙ୍ଗେ କି ପୁରସ୍କାର୍‌ ସେଙ୍ଗେ ଆୟ," ଇଦ୍‌ ସାରେତିଙ୍କ୍‌ ବେଡ଼ିୟେ ସଦାପ୍ରବୁ କେତିତଣ୍ଡ୍‌।

14 ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, "ମିସର୍‌ତେ ବେପାରିଡ଼୍‌, କୂଶତେ ପାହେମ୍‌ ଆସ୍‌ମାନ୍ଦାନ୍‌ କାୟେ ନୁ ଡେଙ୍ଗ୍‌ ଡେଙ୍ଗ୍‌ ନାରୁଡ଼୍‌ ମିଇ ପାକେ ୱାଦ୍‌ତଡ଼୍‌ ନୁ ମିୱଡ଼୍ ଆଦ୍‌ତଡ଼୍‌; ଅଡ଼୍‌ ମି ଗାରେତଡ଼୍‌ ଆଦ୍‌ତଡ଼୍‌; ଇକ୍‌ଲେମ୍‌ତଡ଼୍‌ ତଃସ୍‌ ଅଡ଼୍‌ ୱାଦ୍‌ତଡ଼୍‌; ମେଣ୍ଡେ, ଅଡ଼୍‌ ମିକିଙ୍କ୍‌ ମଡ଼୍‌କିତଡ଼୍‌ ନୁ କାର୍ଙ୍ଗି କେତିତଡ଼୍‌, ନିଜାମ୍‌ ପରମେଶ୍ୱର୍‌ ମିୟାଗେ ମିନ୍ଦେଡ଼୍‌; ଅଙ୍କ୍‌ ୱିଡ଼୍‌ସି ମେଣ୍ଡେ ବେନ ଇଲାଣ୍ଡ୍‌, ମେଣ୍ଡେ ବେନ ପରମେଶ୍ୱର୍‌ ଇଲାଣ୍ଡ୍‌।" 15 ହୋ ତ୍ରାଣକର୍ତ୍ତା, ଇସ୍ରାଏଲ୍‌ତେ ପରମେଶ୍ୱର୍‌, ନିମେ ନିଜାମ୍‌ ଆତ୍ମାମିଞ୍ଚସ୍ପାନ୍‌ ପରମେଶ୍ୱର୍‌ ଆଦ୍‌ତିନ୍‌। 16 ଅଡ଼୍‌ ସିଗ୍‌ ଆଦ୍‌ତଡ଼୍‌, ହଁ, ଅଡ଼୍‌ ସାରେତଡ଼୍‌ ଦାନ୍ଦେ ଆଦ୍‌ତଡ଼୍‌; ମୂର୍ତ୍ତି ତିଆର୍‌ ମାଡ଼ାନଡ଼୍‌ ସାରେତଡ଼୍‌ ଅଣ୍ଡୟଦାମ୍‌ ଅପ୍‌ମାନ୍‌ ଆଦ୍‌ତଡ଼୍‌। 17 ମାତର୍‌ ଇସ୍ରାଏଲ୍‌, ସଦାପ୍ରବୁନ୍‌ତଡ଼୍‌ ସାରେଦିନାତ୍‌ ପରିତ୍ରାଣ ପାହେମ୍‌ ଆଦ୍‌ତଣ୍ଡ୍; ମିଡ଼୍‌ ଯୁ‌ଗ୍‌ଯୁଗ୍‌ତେ ସେଙ୍ଗେ ସିଗ୍‌ ବା ଦାନ୍ଦେ ଆୟିୱିଡ଼୍‌। 18 ବାତେଙ୍କ୍‌ଇତ୍କେ ମାବ୍‌ମୟଲ୍‌ତେ ସୃଷ୍ଟିକର୍ତ୍ତାଲ୍‌ ସଦାପ୍ରବୁ ଇଦ୍‌ଲେକାମ୍‌ କେତିତଣ୍ଡ୍‌; ଅଣ୍ଡ୍‌ ପରମେଶ୍ୱର୍‌ ଆଦ୍‌ତଣ୍ଡ୍‌; ଅଣ୍ଡ୍‌ ପୃତିବିତିଙ୍କ୍‌ ତିଆର୍‌ମାଡ଼ି ତିଆର୍‌ ମାଡ଼୍‌ତଣ୍ଡ୍‌; ଅଣ୍ଡ୍‌ ଆଦ୍‌ ମାଡ଼୍‌ତଣ୍ଡ୍‌, ଅଣ୍ଡ୍‌ ଆଦ୍‌ ତିଆର୍‌ ମାଡ଼ି, ଅଣ୍ଡ୍‌ ଆଦ୍‌ ଶୂନ୍ୟ ମାଡ଼ି ତିଆର୍‌ ମାଡ଼କଟ୍‌ ମାନ୍ଦାନ୍‌ ପଡ଼ିୟେ ଆଦାନ୍‌ ସେଙ୍ଗେ ତିଆର୍‌ ମାଡ଼୍‌ତଣ୍ଡ୍‌, ମାମେ ସଦାପ୍ରବୁ, ମେଣ୍ଡ୍‌ ବେନ ଇଲାଣ୍ଡ୍‌। 19 ମାମେ ମିଞ୍ଜି ଇକାଡ଼୍‌ତେ ଦେଶ୍‌ତେ ବେନେବା ପଡ଼ିୟେତାଗ୍‌ ବେନ ଇଲାଣ୍ଡ୍‌; ମିଡ଼୍‌ ବିଶ୍ୱାସ୍‌ତେ ମାକିଙ୍କ୍‌ ମେଃକାଟ୍‌, ଇଦ୍‌ ମାମେ ଯାକୁବ୍‌ତେ ପିଲୁଡ଼୍‌ତିଙ୍କ୍‌ କେଲ୍‌ଲମ୍‌, ମାମେ ସଦାପ୍ରବୁ ସତ୍‌ କେତିତମ୍‌, ମାମେ ସାୟେତ୍‌ ଗଟି କେତିତମ୍‌।

20 ହୋ ସାରେ ଗୋଷ୍ଟିନାଗାଙ୍କ୍‌ ରକ୍ଷା ଆସ୍‌ମାନ୍ଦାନ୍‌ ନାରୁଡ଼ି, ମିଡ଼୍‌ ଅଣ୍ଡୟ୍‌ଆସ୍‌ ୱାଡ଼ାଟ୍‌, ଅଣ୍ଡୟ୍‌ଦାମ୍‌ ଇଗେ ୱାଡ଼ାଟ୍‌; ବେନଡ଼୍‌ ମିକିଙ୍କ୍‌ ତିଆର୍‌ ମାଡ଼୍‌ତେ ମୂର୍ତ୍ତି ୱେର୍‌କି କାଞ୍ଜି ଉଡ଼ିତଡ଼୍‌ ନୁ ପରିତ୍ରାଣ ମାଡ଼ାନଙ୍କ୍‌ ସାରେ ଦେୟାକିନ୍‌ ପାକେ ପ୍ରାତନା ମାଡ଼ିତଡ଼୍‌, ଅଡ଼ାୱୁ ବାତେ ଆଦେଶ୍‌ ଇଲେ। 21 ମିଡ଼୍‌ କେଲ୍‌ମୁଟ୍‌ ନୁ ଆଦ୍‌ ଗାରେ ତାଡ଼ାଟ୍‌; ହଁ, ଅଡ଼୍‌ ନିଜେ ନିଜେ ମନ୍ତ୍ରଣା ମାଡ଼ିଡ଼୍‌; ମୁନେତ୍‌ କାଲାମ୍‌କଞ୍ଜ୍‌ ବେନ ଇଦ୍‌ କେସ୍‌ମିନ୍ଦେଣ୍ଡ୍‌ ? ମାମେ ସଦାପ୍ରବୁ କି ଇଦ୍‌ ମାଡ଼୍‌ୱାଡ଼୍‌ ? ମାନାଙ୍କ୍‌ ୱିଡ଼୍‌ସି ୱେରେ ପରମେଶ୍ୱର୍‌ ଇଲାଣ୍ଡ୍‌, ମାନ୍‌ ଦର୍ମତେ ପରମେଶ୍ୱର୍‌ ନୁ ତ୍ରାଣକର୍ତ୍ତାଲ୍; ମା‌କ୍‌ ୱିଡ଼୍‌ସି ମେଣ୍ଡେ ବେନ ଇଲାଣ୍ଡ୍‌। 22 ହୋ ପୃତିବିତାଗ୍‌ ମାନ୍ଦାନ୍‌ ସାରେତଡ଼ି, ମିଡ଼୍‌ ମା ସେଙ୍ଗେ ଉଡ଼ି ପରିତ୍ରାଣ ପାହେମ୍‌ ଆୟିମୁଟ୍‌; ବାତେଙ୍କ୍‌ଇତ୍କେ ମାମେ ପରମେଶ୍ୱର୍‌, ନାକିଙ୍କ୍‌ ୱିଡ଼୍‌ସି ବେନ ଇଲାଣ୍ଡ୍‌। 23 ମାମେ ନିଜେତ୍‌ ପେଦେର୍‌ ଅସ୍‌ ଶପଥ ମାଡ଼୍‌ତମ୍‌ ନୁ ସତ୍ୟତେ ବାକ୍ୟ ମା ମକମ୍‌ତାଗାଙ୍କ୍‌ ପେଇସ୍‌ ମିନ୍ଦେ, ଆଦ୍‌ ବେସୁଙ୍କ୍‌ ମାୟ, ମା ମୁନେ ସାରେତଡ଼୍‌ ମର୍‌ମିଣ୍ଡା ଉଃସିତଡ଼୍‌, ସାରେ ୱାଞ୍ଜେରି ଶପଥ ମାଡ଼ିତା। 24 ନାରୁଡ଼୍‌ ମା ଲେକାମ୍‌ କେତିତଡ଼୍‌ ମାତର୍‌ ସଦାପ୍ରବୁନାଗେ ଦାର୍ମିକ୍‌ ନୁ ଶକ୍ତି ମିନ୍ଦେ; ଅନ୍‌ ପାକେ ନାରୁଡ଼୍‌ ୱାଦ୍‌ତଡ଼୍‌, ନେଣ୍ଡେ ବେନଡ଼୍‌ ଅନ୍‌ପାକେ କପାମ୍‌ ଆତ୍‌କେ, ଅଡ଼୍‌ ସାରେତଡ଼୍‌ ସିଗ୍‌ ଆଦ୍‌ତଡ଼୍‌। 25 ଇସ୍ରାଏଲ୍‌ତେ ସାରେ ପିଲୁଡ଼୍‌ ସଦାପ୍ରବୁନାଗେ ଦାର୍ମିକ୍‌ତଡ଼୍‌ ଆଦ୍‌ତଡ଼୍‌ ନୁ ବଡ଼୍‌ପନ୍‌ ମାଡ଼ିତଡ଼୍‌।