1 ମାୟାଦ୍‌ କାବୁର୍‌ ବେନ ବିଶ୍ୱାସ୍‌ ମାଡ଼ିମିନ୍ଦେଣ୍ଡ୍‌ ? ନୁ ସଦାପ୍ରବୁନ୍‌ କାଇ ବେନନ୍‌ ପାକେ ପ୍ରକାଶ୍ ଆସ୍‌ମିନ୍ଦେ ? 2 ବାତେଙ୍କ୍‌ଇତ୍କେ ଅଣ୍ଡ୍‌ ତାନ୍‌ କଣ୍ଡେତେ ପାଲ୍‌ଲେ ଲେକାମ୍‌ ନୁ ୱାସ୍ତେ ବୁମ୍‌ତାଗାଙ୍କ୍‌ ପେୟିତେ ପଦ୍ଲେ ଲେକାମ୍‌ ପେର୍ସ୍‌କେ; ଆଦିନ୍‌ ମକମ୍‌ ବାତେ ତିଆର୍‌ ଇଲେ; ମେଣ୍ଡେ, ଆଦିଙ୍କ୍‌ ଉଡ଼୍‌କେ, ମାମେ ଯେ ସାର୍ଦେ ମାଡ଼ିକାଡ଼୍‌, ଅନାଦ୍‌ ଇଦ୍‌ଲେକାମ୍‌ ସୁନ୍ଦର୍‌ ଇଲ୍ଲେ। 3 ଅଣ୍ଡ୍‌ ମଣ୍ଡି ନୁ ନାରୁଡ଼୍‌ ୱିଡ଼୍‌ସ୍ତେନଡ଼୍‌; ଦୁଃକାମ୍‌ ନାରୁଡ଼୍‌ ନୁ ଚିନ୍ତେତେ ମାନ୍ଦାନଡ଼୍‌, ମେଣ୍ଡେ ନାରୁଡ଼୍‌ ବେନନାଗାଙ୍କ୍‌ ମକମ୍‌ ହେଞ୍ଚିମିନ୍ଦେଣ୍ଡ୍‌, ଇଦ୍‌ ଲେକେତ୍‌ ନାରୁଣ୍ଡ୍‌ ଲେକାମ୍‌ ଅଣ୍ଡ୍‌ ମଣ୍ଡି ଆତ୍‌କେ, ମେଣ୍ଡେ ମାମେ ଅଂକିଙ୍କ୍‌ ମାନେମ୍‌ ଆୟମ୍‌। 4 ନିଜାମ୍‌ ନୁ ମାୟାୱୁ ତିପାଲ୍‌ ପୁଞ୍ଜ୍‌ମିନ୍ଦେଡ଼ି ନୁ ମାୟାୱୁ କଷ୍ଟସାରେ କାଞ୍ଜିମିନ୍ଦେଡ଼୍‌। ଆଗେକ୍‌ବା ମାମେ ଅଙ୍କ୍‌ ଜିୱେ ନୁ ପରମେଶ୍ୱର୍‌ତଡ଼୍‌ ଦେବ୍‌ବେ ତିତ୍‌ତେନଣ୍ଡ୍‌ ନୁ ଦୁଃକାମ୍‌ ଆତ୍‌ତଣ୍ଡ୍‌ ଇଞ୍ଜ୍‌ ମାନେମ୍‌ ଆଦୁତମ୍‌। 5 ମାତର୍‌ ଅଣ୍ଡ୍‌ ମାନ୍‌ ଅଦର୍ମ ସେଙ୍ଗେ ଦେବେ ଚିହ୍ନା ଆତ୍‌ତଣ୍ଡ୍‌ ନୁ ମାନ୍‌ ଅପରାଦ୍‌ ସେଙ୍ଗେ ଗୁଣ୍ଡାଲ୍‌ ଆତ୍‌ତଣ୍ଡ୍‌; ମାନାଦ୍‌ ଶାନ୍ତିତେ ସାରେ ଶାସ୍ତି ଅନ୍‌ ପରୁ ଆତ୍‌ତେ ନୁ ଅନାଦ୍‌ ଦେବେତେ ମାନାଡ଼୍‌ ସୁସ୍ଥ ଆତ୍‌ତାଡ଼୍‌। 6 ମାନାଡ଼୍‌ ସାରେତଡ଼୍‌ ମେଃକାନଡ଼୍‌ ଲେକାମ୍‌ ବୁଲ୍‌କା ଆର୍‌ଦାଗ୍‌ ଆଦାନଡ଼୍‌ ଆସ୍‌ମିନ୍ଦେଡ଼୍‌; ମାନାଡ଼୍‌ ସାରେତଡ଼୍‌ ନିଜେ ନିଜେ ଆର୍‌ଦାକ୍‌ ମାଲ୍‌ସ୍‌ ମିନ୍ଦେଡ଼୍‌; ମେଣ୍ଡେ, ସଦାପ୍ରବୁ ମାନ୍‌ ସାରେତଡ଼୍‌ ଦଷ୍‌ ଅନ୍‌ ପରୁ ଅତ୍‌ତଣ୍ଡ୍‌। 7 ଅଣ୍ଡ୍‌ ବେଡ଼ିୟେ ଜିନିଷ୍‌ ପାହେମ୍‌ ଆତ୍‌ତଣ୍ଡ୍‌, ଆଗେକ୍‌ବା ଅଣ୍ଡ୍‌ ନିଜେତିଙ୍କ୍‌ ଶାନ୍ତିମାଡ଼ି ନିଜେତ୍‌ ମକମ୍‌ତେ କେଲ୍‌ଲଣ୍ଡ୍; ଡଲାନ୍‌ ପଡ଼ିୟେତାଗ୍‌ ଅଦାନ୍‌ ମେକାପିଲେ ଲେକାମ୍‌, ତଲ୍‌କେ ନାଡ଼୍‌କାନ୍‌ନଡ଼୍‌ ମୁନେ କଟ ମାନ୍ଦାନ୍‌ ମେକା ଲେକାମ୍‌ ଆସ୍‌ ଅଣ୍ଡ୍‌ ନିଜେତେ ମକମ୍‌ତେ ଉତ୍ତର୍‌ ଇୱଣ୍ଡ୍‌ ଆତ୍‌ତଣ୍ଡ୍‌। 8 ଅଣ୍ଡ୍‌ କାରାପ୍‌ ନୁ ବିଚାର୍‌ତଡ଼୍‌ ଅଙ୍କ୍‌ ଅତ୍‌ତଡ଼୍‌; ମେଣ୍ଡେ, ଅଣ୍ଡ୍‌ ଯେ ଜିୱେ ନାରୁଡ଼୍ ଦେଶ୍‌ତାଗାଙ୍କ୍‌ ଦୁରାମ୍‌ ଆତ୍ତଣ୍ଡ୍‌, ଇଦ୍‌ ଅନାଦ୍‌ ସମୟତେ ନାରୁଡ଼୍‌ ଲୋପେ ବେନ ଏର୍କେ ମାଡ଼୍‌ତଣ୍ଡ୍‌ ? ମା ନାରୁଡ଼୍‌ ଦଷ୍‌ତେ ସେଙ୍ଗେ ଅଣ୍ଡ୍‌ ଦେବ୍‌ବେ ତିତ୍‌ତଣ୍ଡ୍‌। 9 ମେଣ୍ଡେ, ଅଣ୍ଡ୍‌ ବାତେବା କାରାପ୍‌ ମାଡ଼କ୍‌ ବା ନୁ ଅନ୍‌ ମକମ୍‌ତାଗ୍‌ ବାତେବା ବୁଚା ଇଲ୍‌ୱେ ମାତ୍‌କେ ବା ନାରୁଡ଼୍‌ ଦୁଷ୍ଟନଡ଼୍‌ତଡ଼୍‌ ଅନାଦ୍‌ କାବୁର୍‌ ତିଆର୍‌ ମାଡ଼୍‌ତଡ଼୍‌ ନୁ ଡଲ୍‌ତେ ପେର୍କେ ଅଙ୍କ୍‌ ସାୱୁକାର୍‌ନଡ଼୍‌ତଡ଼୍‌ ସମାଦି ଇଦ୍‌ତଡ଼୍‌। 10 ଆଗେକ୍‌ବା ଅଙ୍କ୍‌ ଗୁଣ୍ଡାଲ୍‌ ମାଡ଼ାନଙ୍କ୍‌ ସଦାପ୍ରବୁନ୍‌ ମାନ୍‌ ଆତ୍‌ତେ; ଅଣ୍ଡ୍‌ ଅଙ୍କ୍‌ ଦୁଃକାମ୍‌ତଣ୍ଡ୍‌ ମାଡ଼ିମିନ୍ଦେଣ୍ଡ୍‌; ମିଡ଼୍‌ ଅନ୍‌ ଜିଉତିଙ୍କ୍‌ ପାପତେ ବଳି ମାଡ଼୍‌ତିଡ଼୍‌, ଅଣ୍ଡ୍‌ ତାନ୍‌ ପିଲୁଡ଼୍‌ ଉଡ଼ିତଣ୍ଡ୍‌, ଅଣ୍ଡ୍‌ ସାରେଦାମ୍‌ ମାନ୍ତତଣ୍ଡ୍‌ ନୁ ଅନ୍‌ କାଇଦେ ସଦାପ୍ରବୁନ୍‌ ଇଚ୍ଛା ପୁରା ଆଦ୍‌ତେ। 11 ଅଣ୍ଡ୍‌ ତାନ୍‌ ଡଲାନାଦ୍‌ କାୟେ ଉଡ଼ି ସାର୍‌ଦେ ଆଦ୍‌ତଣ୍ଡ୍‌; ମାୟାଦ୍‌ ଦାର୍ମିକ୍‌ ଦାସ ନିଜେତ୍ ଜ୍ଞାନ୍‌ତଡ଼୍‌ ନାର୍ଗେନାରୁଡ଼୍‌କ୍‌ ଦାର୍ମିକ୍‌ ମାଡ଼ିତଣ୍ଡ୍‌ ନୁ ଅଣ୍ଡ୍‌ ଅଡ଼୍‌ ଦଷ୍‌ କାଞ୍ଜିତଣ୍ଡ୍‌। 12 ଆଦିଙ୍କ୍‌ ମାମେ ବେଡ଼ିୟଡ଼ାଗ୍‌ ଅଙ୍କ୍‌ ପଡ଼ିୟେ ଇଦିକାଡ଼୍‌ ନୁ ଅଣ୍ଡ୍‌ ପରାକ୍ରମିନଡ଼୍‌ ତଡ଼୍‌ ଡଙ୍ଗ୍‌ଆତ୍‌ତେ ବଗ୍‌ତେ ଲେକାମ୍‌ ମାଡ଼ି ଅଦ୍‌ତଣ୍ଡ୍‌; ବାତେଙ୍କ୍‌ଇତ୍କେ ଅଣ୍ଡ୍‌ ଡଲାନ୍‌ ମକମ୍‌ତାଗ୍‌ ନିଜେତ୍‌ ଜିୱେ ତସିତ୍‌ତଣ୍ଡ୍‌; ନୁ ଅଦାର୍ମିକ୍‌ନଡ଼୍‌ ତଡ଼୍‌ ଲେକା ଆତ୍‌ତଣ୍ଡ୍‌; ଆଗେକ୍‌ବା ଅଣ୍ଡ୍‌ ନାର୍ଗେ ନାରୁଡ଼୍‌ ପାପ୍‌ତେ କାଞ୍ଜ୍‌ତଣ୍ଡ୍‌ ନୁ ଅଦାର୍ମିକ୍‌ନଡ଼୍‌ ସେଙ୍ଗେ ପ୍ରାତନା ମାଡ଼୍‌ତଣ୍ଡ୍‌।