1 ପ୍ରବୁ ସଦାପ୍ରବୁନ୍ ‌ଆତ୍ମା ନାୟାଗେ ୱାସ୍‌ ମିନ୍ଦେ; ବାତେଙ୍କ୍‌ଇତ୍କେ ନମ୍ର ନାରୁଡ଼୍‌ ପାକେ ସୁସମାଚାର୍‌ ପ୍ରଚାର୍‌ ମାଡ଼ାନ୍‌ ସେଙ୍ଗେ ସଦାପ୍ରବୁ ନାକିଙ୍କ୍‌ ହେଞ୍ଚିମିନ୍ଦେଣ୍ଡ୍‌; ଅଣ୍ଡ୍‌ ଉର୍ଙ୍ଗ୍‌ତେ ଲେକେତ୍‌ ନାରୁଡ଼୍‌ ପୁଣ୍ଡ୍‌ତିଙ୍କ୍‌ ତଃସିଦ୍‌ତଣ୍ଡ୍‌, ବନ୍ଦୀ ନାରୁଡ଼୍‌ ପରୁ ମୁକ୍ତି ନୁ ଜିଲ୍‌ତାଗ୍‌ ମାନ୍ଦାନ୍‌ ନାରୁଡ଼୍‌କିଙ୍କ୍‌ ପରୁ ଜଇଲ୍‌ତାଗ୍‌ ମୁକ୍ତ ଆଦାନ୍‌ ଗଟ୍‌ ପ୍ରଚାର୍‌ ମାଡ଼ାନଙ୍କ୍‌; 2 ସଦାପ୍ରବୁନ୍‌ ୱିଡ଼୍‌ସ୍ତେ ବର୍ଷ ନୁ ମାନ୍‌ ପରମେଶ୍ୱର୍‌ତେ ବଦ୍‌ଲା ଦିନାମ୍‌ କେତାନଙ୍କ୍‌; ଦୁଃକାମ୍‌ତେ ନାରୁଡ଼୍‌କିଙ୍କ୍‌ ସାନ୍ୱନା ମାଡ଼ାନଙ୍କ୍‌; 3 ସିୟୋନତେ ଦୁଃକାମ୍‌ ନାରୁଡ଼୍‌ ସେଙ୍ଗେ ତିଆର୍‌ ମାଡ଼ାନଙ୍କ୍‌, ଇତ୍କେ, ନିର୍‌ଦେ ବାଦୁଲ୍‌ତେ ସଜ୍‌ ଆଦ୍‌ତେ, ଦୁଃକାମ୍‌ତେ ବାଦୁଲ୍‌ ସୁକତେ ଲେକେତ୍‌ ନିୟ୍‌, ଦୁର୍ବଲ୍‌ ଆତ୍ମା ବାଦୁଲ୍‌ତେ ପ୍ରଶଂସାଲେକାତ୍‌ ଚକା କେର୍‌ଦାନଙ୍କ୍‌ ଅଣ୍ଡ୍‌ ନାକିଙ୍କ୍‌ ରସ୍‌ମିନ୍ଦେଣ୍ଡ୍‌; ଆସୁଙ୍ଗ୍ ସଦାପ୍ରବୁ ବେଲାନ୍‌ ଗୌରବ୍‌ ଆଦ୍‌ତଣ୍ଡ୍‌, ଆଦିଙ୍କ୍‌ ଅଡ଼୍‌ ଅଲୋନ୍‌ ମାଡ଼େ ଲେକାତ୍‌ ନୁ ତାନ୍‌ ବଗିଚା ଇଞ୍ଜ କେତାନଙ୍କ୍‌ ଆଦ୍‌ତେ। 4 ମେଣ୍ଡେ, ଅଡ଼୍‌ ପାଃନ୍ତେ ଦଂସ ଆତ୍‌ତେ ପଡ଼ିୟାସାରେ ତିଆର୍‌ ମାଡ଼ିତଡ଼୍‌, ମୁନେତ୍‌ କାଲାମ୍‌ତେ ନଷ୍ଟ ଆତ୍‌ତେ ପଡ଼ିୟାସାରେ ତେଃତିତଡ଼୍‌, ମେଣ୍ଡେ ଅଡ଼୍‌ ଦଂସ ଆତ୍‌ତାୱୁ ନୁ ନାର୍ଗେ ମାନେଇ ନିୟମ୍‌ ନଷ୍ଟ ନଗର୍‌ସାରେ ପୁଃନାୱୁ ମାଡ଼ିତଡ଼୍‌। 5 ମେଣ୍ଡେ, ପୁନ୍‌ୱେ ଜିୱାକ୍‌ ମାୟିତାନଙ୍କ୍‌ ନିତ୍‌ତଡ଼୍‌ ନୁ ବିଦେଶିନଡ଼୍‌ ମିଇ ଶସ୍ୟୱାୟେତାଗ୍‌ ନୁ ଅଙ୍ଗୁର୍‌ୱାୟେତେ ଚାଷିଡ଼୍‌ ଆଦ୍‌ତଡ଼୍‌। 6 ମାତର୍‌ ମିଡ଼୍‌ ସଦାପ୍ରବୁନ୍‌ ଯାଜକ୍‌ ଇଞ୍ଜ ଲେକା ଆଦ୍‌ତିଡ଼୍‌; ନାରୁଡ଼୍‌ ମିକିଙ୍କ୍‌ ମାନ୍‌ ପରମେଶ୍ୱର୍‌ତେ ନାରୁଡ଼୍‌ ଇଞ୍ଜ କାର୍ଙ୍ଗିତଡ଼୍‌; ମିଡ଼୍‌ ୱେରେ ଦେଶୀୟନଡ଼୍‌ ସମ୍ପତି ପାହେମ୍‌ ଆଦ୍‌ତିଡ଼୍‌ ନୁ ଅଡ଼୍‌ ସମ୍ପତିତଡ଼୍‌ ମିଡ଼୍‌ ଗର୍ବ ମାଡ଼ିତିଡ଼୍‌। 7 ମିଡ଼୍‌ ସିଗ୍‌ତେ ବାଦୁଲ୍‌ତେ ରେଣ୍ଡ୍‌ ଗୁଣ ସମ୍ମାନ୍‌ ପାହେମ୍‌ ଆଦ୍‌ତିଡ଼୍‌; ମେଣ୍ଡେ, ଅପ୍‌ମାନ୍‌ ବାଦୁଲ୍‌ତେ ଅଡ଼୍‌ ନିଜେ ନିଜେ ଅଦିକାର୍‌ତେ ୱେଡ଼୍‌କେ ମାଡ଼ିତଡ଼୍‌; ଆଦିନ୍‌ ସେଙ୍ଗେ ଅଡ଼୍‌ ନିଜେତ୍‌ ଦେଶ୍‌ତାଗ୍‌ ରେଣ୍ଡ୍‌ ଗୁଣ୍‌ ବାଗ୍‌ ପାହେମ୍‌ ଆଦ୍‌ତଡ଼୍‌; ଅଡ୍‌ ସାରେଦିନାମ୍‌ତାଦ୍‌ ୱେଡ଼୍‌କେ ଆଦ୍‌ତଡ଼୍‌। 8 ବାତେଙ୍କ୍‌ଇତ୍କେ ମାମେ ସଦାପ୍ରବୁ ନ୍ୟାୟବିଚାର୍‌ ବଲ୍‌ ପାହେମ୍‌ ଆଦ୍‌ତମ୍‌, ମାମେ କାରାପ୍‌ କାମ୍‌ ସାରେ ପାସ୍‌କି ତମ୍‌; ମେଣ୍ଡେ, ମାମେ ନିଜାମ୍‌ତେ ଅଡ଼୍‌କିଙ୍କ୍‌ ମାଡ଼୍‌ତେ କାୟେ ଇଦ୍‌ତମ୍‌ ନୁ ଅଡ଼୍‌ତଡ଼୍‌ ସାରେଦାମ୍‌ ଇଦ୍‌ ନିୟମ୍‌ ମାଡ଼ିକାଡ଼୍‌। 9 ମେଣ୍ଡେ, ଅଡ଼୍‌ ପିଲୁଡ଼୍‌ ୱେରେ ଦେଶ୍‌ତେନଡ଼ାଗ୍‌ ନୁ ଅଡ଼୍‌ ପିଲାକି ପିଲାକିନ୍‌ ସାରେତଡ଼୍‌ ଲପେ ବାଡ଼ିୟାଦ୍‌ ଆଦ୍‌ତେ; ଅଡ଼୍‌ ସଦାପ୍ରବୁନ୍‌ ଆଶିର୍ବାଦ ପାହେମ୍‌ ଆତ୍‌ତେ ପିଲୁଡ଼୍‌ ଇଞ୍ଜ ଅଡ଼୍‌କିଙ୍କ୍‌ ଉଡ଼ାନ୍‌ ନାରୁଡ଼୍‌ ସାରେତଡ଼୍‌ କେତିତଡ଼୍‌। 10 ନାନେ ସଦାପ୍ରବୁନାଗେ ଅଦିକ୍‌ ନାର୍ଗେ ୱେଡ଼୍‌କେ ମାଡ଼ିତାନ୍‌; ନାୟାଦ୍‌ ଜିୱେ ନା ପରମେଶ୍ୱର୍‌ତାଗ୍‌ ୱେଡ଼୍‌କେ ମାଡ଼ିତ୍‌; ବାତେଙ୍କ୍‌ଇତ୍କେ ପେଣ୍ଡୁଲ୍‌ ପେକାଲ୍‌ ବେଲାନ୍‌ ଚକା କେର୍ସ୍‌ ନିଜେତ୍‌ତିଙ୍କ୍‌ ବର ଆଦ୍‌ତଣ୍ଡ୍‌ ନୁ ପେଣ୍ଡୁଲ୍‌ କକଡ଼୍ ବେଲାନ୍‌ ନିଜେତ୍‌ ନେଡ଼େକ୍‌ କେର୍ସ୍‌ ନିଜେତିଙ୍କ୍‌ କକଡ଼୍ ଆଦ୍‌ତେ, ଆଦ୍‌ ଲେକାମ୍‌ ଅଣ୍ଡ୍‌ ପରିତ୍ରାଣ ଲେକେତ୍‌ ସିଲେନେ ନାକିଙ୍କ୍‌ କେର୍ସିପିସ୍‌ ମିନ୍ଦେଡ଼୍‌ ନୁ ଦର୍ମିକ ଲେକାମ୍‌ ରାଜାନ୍‌ ସିଲେନେ ନାକିଙ୍କ୍‌ କେର୍ସପିସ୍‌ ମିନ୍ଦେଡ଼୍‌। 11 ବାତେଙ୍କ୍‌ଇତ୍କେ ବୂମ୍‌ ବେସୁଙ୍କ୍‌ କଞ୍ଜ୍‌ ନିଜେତିଙ୍କ୍‌ ଗାଜେ ପେସ୍ପିତ୍‌ ନୁ ଉଦ୍ୟାନ୍‌ ବେଲାନ୍‌ ନିଜେତାଗ୍‌ ୱିତାନ୍‌ ଜିନିଷ୍‌ସାରେ ମଡ଼୍‌ସ୍ପିତ୍‌, ଆଦ୍‌ଲେକାମ୍‌ ପ୍ରବୁ ସଦାପ୍ରବୁ ସାରେ ଦେଶ୍‌ତେନଡ଼୍‌ ପାକେ ଦର୍ମିକ ନୁ ପ୍ରଶଂସା ଗାଜା ମଡ଼୍‌ସ୍ପିତେ।