1 Wee kenaŋ nɛ,

Degbeŋgyoo waa mo ɔ yoosila,

keŋ kɛɛ bee, ka kerɛɛ te ke dana gyakoloŋ nɛ,

wɔŋ Lewiyatan, dom ŋon ɔ dana ɔsaa,

Lewiyatan, dom ŋon ɔ ne bɔɔ nɛ deŋele,

waa ko ɛpo man wonembukum ŋon.

2 Wee kenaŋ,

<<Ɛ kpee nɔɔneŋ lee gerepo wɔɔ keŋ kɛɛ se bia nɛ wose man nyiaa,

3 Maŋ, Degbeŋgyoo ne gyeena ke,

mɛɛ do ke loŋ debaŋ kamasɛ,

mɛɛ gyee ke nelim na ka weese,

na kolo be nyiŋ yɛɛ ke ya.

4 Me ta gyeŋ baŋ ya.

Nyi kpalamse na kpaŋkpaŋkorolose deŋ tuuwɔ ke man nɛ,

nafɔ maa mo yoo gyu botɔɔ,

maa too ŋa pou.

5 Na mena ya na baa yeu kaa gyoo maŋ,

na daa na wɔ ke kyaa wosefɛɛreŋ man,

ayi, daa na wɔ ke kyaa wosefɛɛreŋ man.>>

6 Debaŋ daale ne kɔŋ keŋ Yakɔbe waa baŋ lila,

Iserae waa lese tombia na waa yɛɛ kyeŋkyeŋkɔɔse,

na ke bia ke lɛɛ tɛɛle keŋ pou.

7 Degbeŋgyoo gyɔɔ Iserae,

ŋgba mena keŋ ɔ be gyɔ baŋ bɔɔ gyɔ wɔ nɛ?

Yaa ɔ koe wɔ

ŋgba mena keŋ ɔ ba koe baŋ bɔɔ koe wɔ nɛ?

8 N wɔŋa ba deŋele, yela be kyaŋa wɔ yoogbeŋa,

n moo baŋ gegi wɔ,

ŋgba weese dɛɛlee feliŋ kegyɔ wee nɛ.

9 Gbɛɛ kei dɔɔ te baa sola fa Yakɔbe dukum kamokyɛɛ,

keŋ gyae ka wola nyi be ta mo ɔ dukum pou kyɛɛ e yɛna nyi,

waa yɛlɛɛ kedeesaboya ŋan pou,

waa naŋ ŋa ŋgba hiree nɛ,

waa tekerii bane alo Asera daase, na oliifi kedeesaboya ŋan,

ŋɔɔ tekaa seŋ botɔɔ bela ya.

10 Donɔɔ dinaa keŋ bɔɔ baŋ dekyaŋ kilisi ke nɛ doo yakaa,

balaŋ dekyae ta bese donɔɔ keŋ bɔɔ tina ke yela, ba te bɛɛ ke ŋgba depampaa nɛ,

botɔɔ te nunkyue bia ne dii,

botɔɔ te bee tisi doo,

bɛɛ tao daase tombia ŋan kerekere.

11 Nyi ŋe tombia da wolo na, ŋee tekerii yala,

na ala te kaa tɔɔsee ŋa ka do boalaŋ.

Be yɛɛ balaŋ baŋ bɔɔ ne nyii nombia man ya,

mena dɔɔ ŋon ɔ be yɛɛ wɔ bee wii wɔ ya,

te ŋon ɔ be ma wɔ bɛɛ boele wɔ ya.

12 Wee kenaŋ Degbeŋgyoo waa tɔɔsee ɔ balaŋ lee Eferatese boo man kelii Igyipite boŋobii nɔɔman, na waa ta tɔɔse ɛmɛɛ Iseraetena dokoloŋ dokoloŋ.

13 Wee kenaŋ baa wola kaberɛ keŋkeŋ. Baŋ bɔɔ dɔɔ Asiriya bɛɛ kaa na baŋ be kyaa gbeŋiri man Igyipite nɛ baa kɔŋ kaa som Degbeŋgyoo bula fereŋkyeŋ keŋ dɔɔ Yerusalɛm.