1 Ao Ariɛle, Ariɛle,

donɔɔ dinaa keŋ man Dawide be kyaa, laako,

ɛ kyaa di ɛ kulutoo nɔɔkedi keŋ,

kulutoo kamasɛ.

2 Maa tɔ Ariɛle do,

waa di waraŋsa na waa muutii,

waa yɛɛ ŋgba kedeesa kosɔ nɛ me nyiŋmaa man.

3 Maa kilisi ɛ popou yenaŋ kamasɛ,

maa baŋ dekagyase kilisi ŋon,

na maa mo abɔɔ burum tɔ ŋon gbɛɛ.

4 Baa lɔ neŋ tɛɛle man, na n ke kolosi lee tɛɛle man,

akuŋkuŋ man te baa nyi n woya lee

baa nyii n woya lee tɛɛle man ŋgba woo nɛ,

n ke kolosi adadawoya man lee akuŋkuŋ man

5 N kɔlara burum baŋ baa yɛɛ ŋgba akuŋkuŋ nɛ,

nyeeman doŋtena burum baŋ baa yɛɛ ŋgba wura ŋan feliŋ ne gyɔɔ nɛ,

Nombii kei gyae ke kɔŋ karatetee deboman.

6 Degbeŋgyoo Dekpataakpere ŋon,

waa mo ɔga kefae na tɛɛle kewosi na yeesa dinaa,

na feliŋ kegyɔ na feliŋkum na boalaŋ degyapaa kɔŋ n gyaŋ.

7 Na tɛɛlese ŋan pou ne yoo Ariɛle,

baŋ bɔɔ koro seŋ tia ŋon na ɔ dekagyase te bɔɔ tɔ wɔ do nɛ,

baa yɛɛ ŋgba dosɛɛ,

yaa keŋ bɔɔ naa nɛ.

8 mena keŋ ŋon tanam na ko e de doosi nyi ɔ ne dii,

mɔna ɔ fom na tanam sɛɛ na ko e,

yaa ŋon loŋboaneŋ na ko e de doosi nyi ɔ ne nyɔɔ loŋ,

mɔna ɔ fom na ɔ ne gbalase, te loŋboaneŋ na ko e nɛ,

mena te tɛɛlese ŋan pou ne yoo,

Siyɔn bula nɛ baa yɛɛ.

9 Ɛ sia dɛɛ yɛɛ ŋon fulaa na gyakoloŋ ka gyoo ŋon,

ɛ kyaŋ ɛ sia wuu, na ɛ sia ke yɛlɛɛ,

ɛ dɛɛse, mɔna na waen kedɛɛse ya,

ɛ ta kpaŋte, mɔna na soloŋ doŋte wui ya.

10 Nawolo nyi Degbeŋgyoo ta mo kedooyeŋ do ɛ man,

Ɔ te tɔ ɛ sia, (gbalara baŋ),

ɔ te wuu ɛ nyeeya, (baŋ bɛɛ naa nɛ).

11 Nombiakena kɛŋa pou te kaa yɛɛ ŋon ŋgba tɔne keŋ bɔɔ tɔ ke nɔɔ nɛ man nombia. Nyi ba mo ke fa ŋon waa tale kala nyi, <<Waase kala ke,>> nɛ, waa yako nyiaa, <<Mɔɔ tale ya, ba te tɔ ke nɔɔ.>>

12 Te akpaa n mo tɔne keŋ fa ŋon ɔ be tale kala ya nyi, <<Waase kala ke,>> nɛ waa yako nyiaa, <<Mɔɔ gyeŋ kekala ya.>>

13 Degbeŋgyoo kpa nyiaa,

<<Balaŋ kɛwɔ na mo be nɔɔ bo kɔŋ me gyaŋ,

te bɛɛ mo be nɔɔwoya bo do maŋ obuo,

mɔna be konɔɔse dana lem lee me gyaŋ.

Bɔ ɔsom keŋ bɛɛ som maŋ nɛ,

yɛɛ keŋ bɔɔ kasee lee denibalaŋ gyaŋ te bɔɔ kyam do ba nyeeya man.

14 Mena dɔɔ maa bese yela balaŋ kɛwɔ wose ke gbirisi wɔ,

maa yɛɛ gyakoloŋ nombia gyakaa dɔŋa dɔɔ,

siakekara gyae ke kɔŋ ɔto,

nombia gyeŋara nombiaman kagyeŋ gyae ke ŋaalaa.

15 Baŋ bɛɛ mo ba nyeeman kebake

weese Degbeŋgyoo,

baŋ bɛɛ yɛɛ ba tom detiŋtɛɛ man te bɛɛ gyueŋ nyi,

<<Amɔte ne naana daa? Amɔte ne gyaela waa gyeŋ?>> nɛ baa laako

16 Ɛ ne tulii abɔɔ,

ɛ ne kɛɛ saabu maare ŋgba tɛɛle nɛ?

Kpene keŋ bɔɔ maa nɛ, gyae ke tale yako maare ŋon nyiaa

<<Na nyaŋ maana maŋ>> yee?

Saabu gyae ke tale yako maare ŋon nyiaa,

<<N ba gyaŋ daale>> yee?

17 Be gyae kedi weeya ya, na Lebanɔn ka bese tɛɛle kpaakpaa,

na tɛɛle kpaakpaa keŋ ka bese laa yee?

18 Wee kenaŋ nɛ, deŋela atɔɔsatena baa nyii tɔne keŋ man nombia,

na siayɛlɛɛsatena ke naa,

botɔɔ keŋ yɛɛ fulaa na detiŋtɛɛ man.

19 Baŋ bɛɛ yɔkɔse ba wose nɛ baa nyaŋee Degbeŋgyoo man,

na baŋ bɔɔ dana kolo ya nɛ ke nyaŋee lee Iserae fereŋkyeŋte ŋon man.

20 Tɔɔman ŋantena baa ŋaalaa,

baŋ bee kulu balaŋ baa yo,

na baa lese baŋ bɛɛ bake nombiakumɛɛ nɛ pou.

21 Baŋ ne kɛrɛɛna balaŋ nɔɔse nombia dedii man,

baŋ ne nyɔɔna nombiadiiri kɔta nombia dedii man,

na be te di adansɛɛkum bu ŋon ɔ nombia dei nɛ fɔɔ.

22 Mena dɔɔ keŋ Degbeŋgyoo ŋon ɔ be lɛɛ Aberaham nyee be yako Yakɔbe duuluŋmantena yɛna nyiaa,

<<Desɛŋ be gyae ke kyaŋ Yakɔbe bela ya,

be sia be gyae ka yeŋ bela ya.

23 Akpaa be naa be bia,

baŋ mɔɔ mo me nyiŋmaa yɛɛ wɔ be man nɛ,

baa yɛɛ ma yele fereŋkyeŋ,

baa yɛɛ Yakɔbe fereŋkyeŋte ŋon fereŋkyeŋ,

na baa yee Iserae Wurubuarɛ ŋon.

24 Baŋ be yɛɛ behuhoonawɔ Wurubuarɛ Feliŋ man nɛ baa nyii nombia man,

te baŋ bɛɛ toroŋ nɛ baa lɛɛ nombia kawola do.>>