1 Ŋon ɔ tenɛɛ ne munu,

te ŋolo be famenɛ ya,

balaŋ kpaakpaa na yem,

te ŋolo bee nyii ke man,

nyi ŋon ɔ tenɛɛ na yem baa,

na ka lese e lee dukum man ya.

2 Baŋ be dɔŋ katenee gbɛɛ,

na gyoo wosefɛɛreŋ man,

nyi ba yem na, bee nyiŋ kefɛɛfo.

3 <<Mɔna ɛmɛɛ yola bia, ɛ kɔŋ

ɛmɛɛ kafoŋtena na futoolitena duuluŋman bia,

4 Amɔte yaa ɛ ne kulu?

te amɔte yaa ɛ wola ɛ nɔɔ tee,

te ɛ wɔŋa ɛ laakem lese mena?

Ɛ te yɛɛ baŋ bɛɛ koro seŋ tia balaŋ,

na akɛrɛɛtena duuluŋman biawɔ yee?

5 Ɛmɛɛ baŋ ɛ dana lookum, te ɛ ne doona dɔŋa kpeli daŋ

na daŋ keŋ ke dana wuluŋ nɛ tɛɛ,

ɛ na mo ɛ bia deesi detaŋgyase man,

na kpanaŋse tɛɛ

6 Ɛ dedii yɛna bɛɛneŋ baŋ be doo boya akyalasesa na detaŋgyase ŋan man nɛ,

ŋan yɛna ɛ dedii,

Ayi, baŋ te ɛ woli soloŋ fa,

te ɛ yɛɛ weenɛɛ kedeesa fa.

Kɛŋa pou wɔle na, maa nyiŋ konɔɔ?

7 N lɔɔ n dofoŋoŋ bulabii keŋ ka korɛɛ nɛ nyeeman,

botɔɔ te n gyeŋawɔ gyu ke yɛɛ n kedeesase.

8 N moo n bɛɛneŋ abɔɔ,

see nya asima na asima daase wɔle.

N te bɛɛ maŋ te n lese n wose deteŋteli,

n gyeŋawɔ doo ke dɔɔ te n fɛlɛɛ ke,

n yɛɛ nɔɔna baŋ n ne gyae wɔ dedoi nɛ,

te n mo n lookum kɛɛ be deteŋteli.

9 N moo nuŋ gyu *Molɛke

te n yelaa n nuŋ ofoŋnyiŋan boowɔ.

N kpila n kpilara gyu * lemlem,

te n tisiwɔ gyu keliinaŋ woya dɛɛ.

10 N tɛɛwɔ kyeŋgbeŋ mena dɔɔ n te kaa,

mɔna n te yako nyi,<<Kɔɔ dana tɔnɔɔ ya.>>

N ta bese nyiŋ wosedoŋ bela,

mena dɔɔ n te gbalase ya.

11 <<Amɔte ŋmaasena neŋ te n yeewɔ,

beiŋ keŋ n te yako maŋ anokoare ya,

te n te tɔɔse maŋ

yaa n ka gyueŋ me nombia ya?

Na keŋ mɔɔ yɛɛ yididi kyare dɔɔ

te n bee yee maŋ yee?

12 Maa lese n katenee na n tomse debɔɔ,

te ŋɔɔ gyae ke yɛɛ tɔnɔɔ fa neŋ ya.

13 Nyi akpaa n fae yeesa nyi baa kyɔ neŋ nɛ,

yela n bɛɛneŋ baŋ n be yilaa see nɛ kaa lɛɛ neŋ!

Feliŋ gyae kegyɔ mo wɔ pou laŋ,

weesɛɛ pampa gyae ka moo wɔ laŋ.

Mɔna ŋon ɔ yeu kaa gyoo maŋ na,

waa mo tɛɛle keŋ bese ɔ dedii,

na waa mo me bula fereŋkyeŋ keŋ bese ɔ wui.>>

14 Degbeŋgyoo waa yako nyiaa,

<<Ɛ fara, ɛ fara, ɛ desina gbɛɛ keŋ!

Ɛ lese abɔɔ ŋan ne tɔ gbɛɛ nɛ lee me balaŋ gbɛɛneŋ man.>>

15 Nawolo nyi nnɛ yaa ŋon ɔ kerɛɛ te bɔɔ gyina e adido nɛ ne yako,

ŋon ɔ kyaa kekpaakekpaa te ɔ yele yɛna Fereŋkyeŋ nɛ.

<<Me kyaa adido na botɔɔ keŋ yɛɛ Fereŋkyeŋ,

mɔna me kyaa kpuna ŋon ɔ dukum ba wee e, te ɔ be yɔkɔse ɔ wose nɛ.

nyi maa do ŋon ɔ be yɔkɔse ɔ wose nɛ doŋ,

na maa do baŋ be dukum ba wee wɔ nɛ doŋ bela.

16 Mɔɔ gyae maa kalana wɔ kekpaakekpaa,

yaa maa gyeŋ baŋ do wɔ debaŋ kamasɛ ya.

Na mena ya na balaŋ baŋ maŋ gbagba be yɛɛ nɛ

baa gbalase lee maŋ dɔɔ.

17 Ma gyeŋa baŋ do wɔ lee be sibiikum dɔɔ,

me wɔŋa ba deŋele te ma moo me sia weese wɔ lee me baŋ man.

mɔna be gyakaa be dɔŋ be gbɛɛneŋ kumɛɛ dɔɔ.

18 Maa te naa be gbɛɛneŋ, mɔna maa kyɔ wɔ be kaweese.

Maa wola wɔ gbɛɛ na maa bese fɛɛ Iseraetena baŋ bee di waraŋsa nɛ wɔe.

19 Maa mo yele kalese do be nɔɔse man.

Wosefɛɛreŋ, wosefɛɛreŋ dɛɛ kyaana baŋ ba benaa na baŋ be kyaa lemlem>>

Degbeŋgyoo yakola,

<<Na maa kyɔ wɔ be kaweese.>>

20 Mɔna akpanyanyaŋtena wɔɛ ŋgba ɛpo dɔɔ feliŋ,

keŋ be tale fɛɛfo ya,

te ke feliŋ ne gyɔɔ lese woŋsila na ayimɛɛ see yenaŋ nɛ.

21 Me Wurubuarɛ kpa nyiaa, <<Wosefɛɛreŋ be doo fa akpanyanyaŋte ya.>>