1 Manase yabaye umwami afise imyaka cumi n’ibiri, aganza imyaka mirongo itanu n’itanu ari i Yerusalemu. 2 Manase akora ivyo Uhoraho abona ko ari bibi mu nyonga ziwe, agendera mu bizira vy’ubuyobe vyakorwa n’amahanga Uhoraho yari yarirukanye imbere y’Abisirayeli. 3 Asubira kwubaka ibibanza vyo gusengeramwo, ku mataba y’imisozi, ivyo se Hezekiya yari yarasambuye; yongera kwubaka ibicaniro vya Bayali, ashinga n’inkingi za Ashera. Yunamira ibinyenyeri vyose vyo kw’ijuru arabisenga. 4 Yubaka ibicaniro mu Ngoro y’Uhoraho, iyo Uhoraho yari yaravuzeko ati: "Izina ryanje rizoba i Yerusalemu ibihe vyose." 5 Mu rugo rwose rw’Ingoro y’Uhoraho ahubaka ibicaniro vy’ibinyenyeri vyose vyo kw’ijuru. 6 Agera n’aho atanga abahungu biwe kw’ibimazi vyo guturirwa mu kiyaya ca Beni-Hinomu, agendera mu bupfumu n’amareba, akoresha abahamagara imizimu na ba kamenyi. Akora ibibi vyinshi mu nyonga z’Uhoraho, bimutera kuraka.

7 Afata inkingi ya Ashera yabazishije, ayishira mu Ngoro, imwe Imana yari yabwiye Dawidi n’umuhungu wiwe Salomo iti: "Muri iyi Ngoro n’i Yerusalemu ni ho natoranije mu yindi miryango yose ya Isirayeli, ngo hitirirwe izina ryanje ibihe vyose. 8 Sinzosubira gutuma Abisirayeli bakura ikirenge hasi ngo bave mu gihugu nahaye ba sekuruza, nibitwararika gukora ivyo nabategetse vyose, bagakurikiza ivyagezwe vyanje vyose, amabwirizwa n’amategeko nabahaye ncishije ku musavyi wanje Mose." 9 Ariko Manase azimiza Abayuda n’ab’i Yerusalemu bose, bituma bakora ibibi birengeye ivy’amahanga Uhoraho yari yarahonereje imbere y’Abisirayeli.

10 Uhoraho aburira Manase n’abantu biwe, ariko ntibavyitaho. 11 Nuko Uhoraho abateza abakuru b’ingabo z’umwami w’i Ashuri, bafata Manase bamugira imbohe, bacisha igera mu zuru ryiwe, bamubohesha iminyororo y’ubutare bw’umwakaka, maze bamujana i Babiloni. 12 Abonye ko ari mu mubabaro mwinshi, arondera Uhoraho Imana yiwe, yicisha bugufi cane imbere y’Uhoraho Imana ya ba sekuruza. 13 Atakambiye Uhoraho, na we aterwa n’akagongwe yumva ugutakamba kwiwe; maze amugarukana i Yerusalemu no mu bwami bwiwe. Nuko Manase amenya ko Uhoraho ari Imana.

14 Inyuma y’ivyo aca yubaka uruzitiro rw’inyuma y’Igisagara ca Dawidi, mu burengero bw’umugezi Gihoni mu kiyaya, gushika kw’Irembo ry’Amafi, no kuzunguruka umusozi wa Ofeli; arongera arugira rurerure cane. Ashiraho abatwara ingabo mu bisagara vyose bizitijwe inzitiro vy’i Buyuda.

15 Akuraho imana z’abanyamahanga, akuraho na ca gishushanyo mu Ngoro y’Uhoraho, n’ibicaniro vyose yari yarubatse ku musozi w’Ingoro n’i Yerusalemu; abiterera inyuma y’igisagara. 16 Hanyuma asana igicaniro c’Uhoraho agitangirako ibimazi vy’ishimwe n’ibimazi vyo gukenguruka, aca abwira Abayuda ngo bakorere Uhoraho, Imana y’Abisirayeli. 17 Ariko abantu bakomeza gutangira ibimazi ku bicaniro vyo ku mataba y’imisozi, mugabo babishikanira Uhoraho Imana yabo gusa.

18 Ibindi vyabaye ku ngoma ya Manase, harimwo n’isengesho yasenze Imana yiwe, amajambo aberekwa bamubwiye mw’izina ry’Uhoraho Imana y’Abisirayeli, vyanditswe mu bitabu bidonda ivyagenda biraba ku ngoma z’abami b’Abisirayeli. 19 Isengesho ryiwe n’uburyo Imana yamugiriye ikigongwe kubera gutakamba kwiwe hamwe n’ibibi vyose yakoze, n’uguta ubwizigirwa, n’ahantu hose yubatse ibibanza vyo gusengeramwo ku misozi, akongera agashiramwo inkingi za Ashera n’ibigirwamana yunamira, vyose vyanditswe mu bitabu vy’aberekwa. 20 Nuko Manase arapfa; ahamvya ba sekuruza ahambwa ku kirimba iwe. Amoni umuhungu wiwe amusubirira ku ngoma.

21 Amoni yari afise imyaka mirongo ibiri n’ibiri igihe yimikwa ngo abe umwami, aca aganza imyaka ibiri ari i Yerusalemu. 22 Akora ivyo Uhoraho abona ko ari bibi mu nyonga ziwe, nk’uko se Manase yakoze. Amoni asenga kandi atanga ibimazi ku bigirwamana Manase yari yaracurishije. 23 Ariko ntiyicisha bugufi imbere y’Uhoraho nk’uko se Manase yakoze; Amoni arushaho gukora ibibi.

24 Nuko abaganwa biwe baja inama yo kumugirira nabi, maze bamugandagurira mu ngoro iwe. 25 Ariko abantu bo muri ico gihugu baca bafata abishe umwami Amoni barabica, bimika Yosiya umuhungu wiwe, aba ari we amusubirira ku ngoma.