Salmos 10

Awulae ne mɔɔ bua ɛtanevolɛma ndɛne la

1 Duzu ati a wɔde ɛ nwo wɔhɔ moamoa ɛ, O Nana Nyamenle? Duzu ati a ɛfea ɛ nwo wɔ mekɛ mɔɔ yɛwɔ ɛmianlɛ nu la ɛ?

2 Amumuyɛvoma anye sɔ bɛ nwo, na bɛteetee ehyiavolɛma; maa ngane mɔɔ bɛzuozua la ɛhye bɛdabɛ mumua ne. 3 Ɔluakɛ amumuyɛvonli di fɛlɛko wɔ ye ninyɛndane nwo; adidikpokuvo kpo Nana Nyamenle, na ɔfa Ye duma ɔka ndane mgbane mgbane.

4 Atisesebɛvolɛ ɛnva Awulae ɛnyɛ ɛhwee; ɔdwenle wɔ ye nu dahuu kɛ, "Nyamenle biala ɛnle ɛkɛ." 5 Atiakunlutanevolɛ ko tɔ zo wɔ debie biala anu; ɔngola ɔnde Nana Nyamenle ndɛnebualɛ ne abo ɛlɛ; ye kpɔvolɛma ɛdeɛ, dahuu ɔsi bɛ amgbu. 6 Wɔ ye ninyɛndaneyɛlɛ nu ɔse ɔ nwo kɛ: "Debie biala ɛnrɛkputi me ahonle ɛlɛ; wɔ ɛbɛlabɔlɛ nu, menrɛhɔ ɛfonlanlɛ nu kenlebie."

7 Ɔ nloa edwɛkɛ le amowalɛ, adalɛ ɔ nee ɛnwunlonwunlanlɛ ngome; dahuu ɔtendɛ ɛkpɔlɛ nee atisesebɛ nu ala. 8 Ɔdi bu-sa wɔ sua zo awozileka ne mɔ; na ɔyɛ anwomoalɛ kɛ ɔkɛhu bɛdabɛ mɔɔ bɛnze nwole bie na bɛpɛ nu la, na ɔnea bɛ tɔbelɛ. 9 Ɔdie ebia wɔ ye fealeka kɛ awenade la, na ɔsiezie ɔ nwo ɔkendɛ ehyiavolɛma. Ɔsua bɛ ngane ɔkye bɛ na ɔtwenle bɛ aze. 10 Ɛdawɔ mɔɔ ɛ nwo anyɛ moavolɛ, mɔɔ ɛkɛdɔ ye ɛhane ne anu la, ɛnee wɔ gyakɔ; ɔluakɛ ɔ nwo yɛ se tɛla awie biala. 11 Atiakunlutanevolɛ dwenle wɔ ye ahonle nu kɛ: "Debie biala ɛnvale Nana Nyamenle anwo! Yemuomua ɔ nye amu nwiɔ, ɔti ɔnrɛnwu me ɛlɛ kenlebie maanle nu!"

12 Dwazo, O Awulae; bɛlɛ amumuyɛvoma ɛhye mɔ aze! O Nana Nyamenle, maa ɛ sa ɛnlomboɛ ne zo, na kakye bɛdabɛ mɔɔ bɛlɛdi nyane la! 13 Duzu ati a amumuyɛvonli kola kpo Nyamenle bɔkɔɔ, na ɔsi ye ɛbolɛ ɔka kɛ: "Ɔnrɛhola ɔnrɛdea me" ɛ? 14 O Awulae, ɛdawɔ ɛ nye dua ɛhye; ɛdawɔ ɛze nyane nee amaneɛ mɔɔ bɛtwe bɛba la amuala. Na dahuu noko ɛyɛ anwomoalɛ kɛ ɛkɛboa. Wɔmɔ ala yɛɛ ehyiavolɛma anye la ɛ nwo zo a. Wɔmɔ yɛɛ ɛboa bɛdabɛ mɔɔ bɛnlɛ boavolɛ biala la a. 15 Bubu amumuyɛvoma ɔ nee atiakunlutanevolɛma asa gua; tea bɛ wɔ bɛ ninyɛmunli mɔɔ bɛyɛ la anwo, kɔkpula kɛ bɛnrɛyɛ zɔ bieko a.

16 Nana Nyamenle di belemgbunli wɔ mekɛ mɔɔ ɔnlɛ awieleɛ; bɛdabɛ mɔɔ bɛsonle awozonle gyɛne la amuala, bɛbaye bɛ bɛavi azɛlɛ ye azo. 17 O Nana Nyamenle, tie bɛlɛvoma nzɛlɛlɛ; maa bɛ akɛnrazilɛ ɛgyinla ye kpundii. Gua ɛ nzo aze, 18 na tie bɛdabɛ mɔɔ menli sisi bɛ, ɔ nee nrisa bɛ ɛzunlɛ. Bua ndɛne kɔ bɛ afoa, amaa sonla dasanli mɔɔ le ɛva nee nzonle la angola anwunlonwunla bɛ bieko.