1 Me ɛkɛla, ye Nana Nyamenle ayɛlɛ! O Awulae, me Nyamenle, nea kɛ ɛle bedevinli bie a! Enililɛ nee anyunlunyia ɛheda wɔ ɛdanlɛ. 2 Wɔmɔ yɛɛ ɛfa wienyi ɛkeda ɛ nwo zo kɛ ɛdanlɛ a. Wɔrɛlɛ ewiade amuala kɛ asawu, 3 na wɔva wɔ azua ne mɔ ɛlawolɛ wɔheda azule zo. Wɔmɔ ɛfa amungu ɛyɛ wɔ konle ehwili, na ɛtɛnla zolɛ wɔ ahumu nu ɛfa ɛtu wɔ adenle.

4 Wɔmɔ ɛfa anwoma ne mɔ ɛyɛ wɔ ɛzoavolɛma, yɛɛ senle nee sendɔlɛra le wɔ azonvolɛ, 5 Wɔdo azɛlɛ ye abo kpundii, ammaa debie biala angola amkpusu ye. 6 Ɛvale nyevile ɛhedale ye kɛ ɛdanlɛ la, na azule ne mɔ yiyile hedale awoka ne mɔ azo. 7 Ɛhwile azule ne mɔ anyunlu wɔ ɛyavalɛ nu la, bɛ muala bɛnriandinle; ɛdeanle nu na bɛdele ɛ ne la, bɛ muala bɛguale ɛbɔ nu. 8 Awoka ne mɔ dwazole memaanle bɛ nwo zo, yɛɛ mbɔnza ne mɔ noko hɔle azɛlɛ nwo kɛmɔ ɛhyehyɛle bɛ ala la. 9 Ɛmaanle bɛ ɛweɛne mɔɔ ɔnle kɛ bɛtɛla ye a, ammaa bɛandɛlɛ bɛanva azɛlɛ ne amuala bieko.

10 Ɛmaa nzule vi azɛlɛ bo finde wɔ mbɔnza ne mɔ anu, na azundenle tenrɛ se wɔ awoka ne mɔ avinli. 11 Ɛhye maa nyɛmoa mɔɔ wɔ ɛbɔ nu la nyia nzule; na ɛkɛ ne yɛɛ nane nane mɔɔ nzuhɔne ku bɛ la bɛdabɛ bɛbano nzule a. 12 Wɔ mbaka mɔɔ gyigyi bɛ nwo la azo, yɛɛ nloma yɛ bɛ adunli nee bɛ sane, na bɛto bɛ edwɛne wɔ ngane ne mɔ anu a. 13 Ɛvi wɔ anwuma tɛnlabelɛ ne ɛtɔ nzule ɛgua awoka ne mɔ azo, na azɛlɛ ye akunlu dwo wɔ gyima gyima mɔɔ ɛdi la anwo. 14 Ɛmaa ndile fifi ɛmaa nlankɛ nyia bie di, yɛɛ ɛmaa sonla so ɛya, amaa yeahola yealua ye aleɛ aleɛ wɔ nu, 15 yeanyia nza mɔɔ ɔbava yealielie ɔ nye, ɔlivi nwole mɔɔ ɔbava yeakpokpa ɔ nwo abɔ evuanlɛ mukumuku, ɔ nee aleɛ mɔɔ ɔbali yeanyia anwosesebɛ la. 16 Nana Nyamenle tɔ nzule gua mbaka muala anwo zo, bɔbɔ Lɛbanɔn sida, mɔɔ ɔdaye Awulae ɔluoluale la. 17 Bɛ nu yɛɛ nloma ne mɔ yɛ bɛ sane a; yɛɛ nloma mgbole noko bɛyɛ bɛ adunli a. 18 Awoka ndendenle ne mɔ azo le adidileka maa mboane ne mɔ; yɛɛ awolɛ ne mɔ le fealeka maa bɛ.

19 Wɔbɔ siane mɔɔ kile mekɛ a; ewia noko ze ye mekɛ mɔɔ ɔfa ɔtɔ a. 20 Wɔbɔ awozinli, noko akee ɔle aledwolɛ; nɔɔzo yɛɛ nyɛmoa anwo ɛzulolɛ kpokpoti finde a. 21 Awenade ngakula su ɛhɔne, bɛkulu bɛkpondɛ bɛ aleɛ bɛfi Nyamenle ɛkɛ. 22 Saa ewia ne tudu a, bɛsia bɛ nzi bɛkɔ na bɛkɔgua bɛ adunli nu. 23 Akee dasanli noko finde kɔyɛ ye gyima, na ɔkɔ zo ɔyɛ ye gyima kɔkpula nɔsolɛ.

24 O Nana Nyamenle, nea ɛ sa anloa gyima dɔɔnwo bie! Nrɛlɛbɛ zo yɛɛ ɛlua wɔyɛ ɛhye mɔ amuala a! Wɔ abɔndeɛ ɛyi aleɛabo amuala. 25 Nyevile totohyia, tɛtɛtɛlɛlɛ ne a la nehane, mɔɔ ninyɛne mɔɔ ɛtia a ɛnnwu ɔ nloa la ɛyi ye tɛkɛɛ la, anyewɔzo ninyɛne mgbole nee ngyikyi. 26 Meli ne mɔ di zolɛ akɔneaba, na nuhua yɛɛ Lɛveatan di ye agole a, nyevizonle ne mɔɔ ɛdawɔ ɛbɔle la. 27 Ɛhye mɔ amuala maa bɛ nye zo nea wɔ, kɛ ɛkɛmaa bɛ aleɛ wɔ mekɛ mɔɔ fɛta la anu. 28 Ɛfa ɛmaa bɛ, na bɛdabɛ noko bɛdi; ɛmaa bɛ aleɛ, na bɛ kunlu dwo nwolɛ. 29 Saa ɛye ɛ nyunlu ɛfea bɛ a, ɛnee bɛ rɛle ɛbɔ zɛhae; saa ɛye wɔ ɛnwomenle ne ɛfi bɛ nu a, ɛnee bɛwuwu; na bɛsia bɛkɔ bɛ ɛva nu. 30 Noko akee saa ɛsoa wɔ sunsum ne ɛmaa ɔba bɛ nu a, ɛnee bɛyɛ abɔndeɛ fofolɛ; na ɛkakyi azɛlɛ nye ɛyɛ ye fofolɛ.

31 Maa Nana Nyamenle anyunlunyia ne ɛdɛnla ɛkɛ ne wɔ mekɛ mɔɔ ɔnlɛ awieleɛ! Maa Awulae ɛli fɛlɛko wɔ ɔ sa anloa gyima nwo! 32 Ɔto ɔ nye ɔnea ewiade, na azɛlɛ kpusu; ɔtenrɛ ɔ sa ɔsɔ awoka ne mɔ anu, na bɛkpu esike.

33 Mebado edwɛne meahanvo Nana Nyamenle, wɔ melɛ ala mɔɔ mede ngoane nu la; mebado edwɛne meaye me Nyamenle ayɛlɛ, wɔ mekɛ ala mɔɔ mede aze la. 34 Maa me ahonle nu nzɛlɛlɛ ɛzɔ ɔ nye, ɔluakɛ me anyelielɛ vi Awulae ɛkɛ. 35 Maa bɛyela ɛtanevolɛma bɛvi azɛlɛ ye azo; na maa atisesebɛvoma abo zo ɛminli bɔkɔɔ. O me ɛkɛla, ye Awulae ayɛlɛ! Ye Nana Nyamenle ayɛlɛ!