1 Bɛye Nana Nyamenle ayɛlɛ! Mebava me ahonle kpokpoti meayɛ Awulae mo, wɔ ye tenlenema ayiaku ne anu. 2 Nea kɛ Nana Nyamenle asa anloa gyima ne mɔ le nwanwane bie a! Menli mɔɔ anye die nwolɛ la kulo kɛ bɛkɛzukoa na bɛkɛde ɔ bo. 3 Enililɛ nee belemgbunlililɛ kpalɛ da ɔ sa anloa gyima ne mɔ ali; na ye tenleneyɛlɛ ne wɔ ɛkɛ kɔdwu mekɛ mɔɔ ɔnlɛ awieleɛ.

4 Nana Nyamenle ɛmmaa yɛ rɛle ɛnvi ye nwanwane gyima ne mɔ; Awulae maa ɛlolɛ, na ɔse anwunvɔne. 5 Ɔmaa bɛdabɛ mɔɔ bɛdi ye eni la asa kɔ bɛ nloa; ɔ rɛle ɛnvi ye ɛwɔkɛ ne mɔɔ ɔbɔle la ɛlɛ. 6 Yemaa ye menli ɛnwu tumi mɔɔ wɔ ye gyima ne anu la, wɔ Yizilayɛ agyapandeɛ ne mɔ mɔɔ yeva yemaa bɛ la anu. 7 Ɔ sa anloa gyima biala le nɔhalɛ nee pɛlɛpɛle; na ye ngyehyɛlɛ muala di munli bɔkɔɔ. 8 Ye mɛla ne mɔ wɔ ɛkɛ ne mekɛ mɔɔ ɔnlɛ awieleɛ; ɔluakɛ bɛyɛle bɛ wɔ nɔhalɛlilɛ nee tenleneyɛlɛ nu. 9 Ɔkpɔnenle ye menli ɔvile ɛzonlenlɛ bo; ɔ nee bɛ yɛle damɛnlangoate ngyehyɛlɛ. Nea kɛ ɔle Nwuanzanwuanza na ye duma yɛ ɛzulolɛ bie a!

10 Kɛ ɔkɛyɛ na sonla dasanli anwu nrɛlɛbɛ ɛ? Adenle kokye mɔɔ bɛdua zo la a le kɛ, bɛkɛli Nana Nyamenle eni; ɔluakɛ ɔbua ndɛne fɔɔnwo ɔkɔ bɛdabɛ mɔɔ bɛdi ye mɛla ne mɔ azo la afoa. Bɛye ye duma ne ayɛlɛ wɔ mekɛ mɔɔ ɔnlɛ awieleɛ.