Salmos 122

Gyɛlusalɛmma bɛ Abotane

1 Me nye liele wɔ mekɛ mɔɔ bɛhanle bɛhilele me kɛ, "Maa yɛhɔ Nana Nyamenle sua nu" la. 2 Na kɛkala noko mɔɔ yɛwɔ ɛke la, yɛ gyakɛ ɛlɛdi akɔneaba wɔ Gyɛlusalɛm nlenkɛ mgbole ne mɔ anu! 3 Gyɛlusalɛm le suakpole, mɔɔ bɛnyia alagye bɛkyekye, na bɛhye bane bɛlie nwo kɛnlɛma bie a. 4 Ɛkɛ yɛɛ aneɛ eku eku kpokpoti vi ba a, aneɛ mɔɔ le Nana Nyamenle deɛ, mɔɔ bɛhyehyɛle bɛmaanle Yizilayɛ, kɛ bɛva moyɛlɛ bɛmaa Awulae duma la. 5 Ɛkɛ ne yɛɛ Yizilayɛ arelemgbunli liele bɛ mbia, na bɛbuale bɛ menli ne mɔ ndɛne a.

6 "Bɛzɛlɛ anzondwolɛ bɛmaa Gyɛlusalɛm. Bɛmaa bɛdabɛ mɔɔ bɛlɛ Gyɛlusalɛm anwo ɛhulolɛ la ɛhɔ ye boɛ dahuu. 7 Wɔ mbane ne mɔ mɔɔ bɛlie la anu, yɛɛ anzondwolɛ ɛdɛnla a, na boɛyɛlɛ ɛdɛnla wɔ Arane ne mɔ anu." 8 Ɔlua me mediema nee me gɔnwo mɔ ati, mese Gyɛlusalɛm kɛ, "Anzondwolɛ ɛdɛnla wɔ nu!" 9 Ɔlua Awulae yɛ Nyamenle ye Aako ne ati, mebakpondɛ wɔ boɛyɛlɛ nee ngɔzo.