1 Nyilalɛ ɛha Nana Nyamenle, me Bodane! Yemɔ yɛɛ ɔkilehile me konle nu agyibadolɛ na ɔsiezie me ɔsie ɔmaa konle a. 2 Ɔle me sinzavolɛ ɔ nee me nwo banebɔvolɛ, me feabelɛ ɔ nee me ngoanedievolɛ; ye nuhua yɛɛ mefa me rɛle mewula amaa yeava me yeazie a. Ɔbɛlɛ maanle maanle muala aze, na ɔfa bɛ ɔwula me bo.

3 O Nana Nyamenle, sonla dasanli bɔbɔ a le duzu, mɔɔ ɔwɔ kɛ ɛbu ɔ nwo mgbonda; sonla gyɛne ala mɔɔ ɔwɔ kɛ ɛdwenledwenle ɔ nwo a? 4 Sonla dasanli le kɛ ɛnwomenle mɔɔ yɛgu la; ye mekɛ le kɛ ɛlawolɛ mɔɔ ɛlɛpɛ nu aze la.

5 O Nana Nyamenle, ɛvi wɔ anwuma maanle ne anu dwu azɛlɛ nwo! Fa ɛ sa ka awoka ne mɔ, na maa bɛkpu esike! 6 Kpakyekpakye ɛsɛlɛmanye nu, na bɔ wɔ kpɔvolɛma ne mɔ kponde; to wɔ ɛda mbaka ne mɔ na ka bɛ gua ɛbɔ nu.

7 To ɛ sa fi anwuma nehane bɛla azɛlɛ nwo die me, na ye me fi azukuma ne anu; die me ngoane fi nyɛvolɛ nyɛvolɛ tumi bo, 8 bɛmɛ mɔɔ bɛnga nɔhalɛ, na bɛbɔ adalɛ wɔ mekɛ bɔbɔ mɔɔ bɛli amonle la.

9 O Nana Nyamenle, mebado edwɛne fofolɛ meamaa wɔ; mebabɔ getae azo nyɛma bulu na meado edwɛne meamaa wɔ. 10 Wɔmɔ yɛɛ ɛfa konimlilɛ ɛmaa arelemgbunli, na ɛye wɔ sonvolɛ Devidi ɛfi munzule nu a. 11 Die me fi me agbɔvolɛ atisesebɛvoma asa anu; pepɛ die me fi nyɛvolɛ nyɛvolɛ tumi bo, bɛmɛ mɔɔ bɛnga nɔhalɛ na bɛbɔ adalɛ wɔ mekɛ bɔbɔ mɔɔ bɛli amonle la. 12 Maa yɛ mra mrenyia anwo ɛyɛ ɛsesebɛ wɔ bɛ mgbavolɛ nu; maa bɛyɛ kɛ mbaka mɔɔ nyi kɔ anwuma la. Maa yɛ mra mraalɛ ɛyɛ ngɛnlɛma ngɛnlɛma kɛ ahanle sika ne mɔ mɔɔ bɛva bɛziezie belemgbunli aako nu la. 13 Maa aleɛ dɔɔnwo ɛyiyi yɛ bonwolo ne mɔ fefetee zɛhae ala. Maa mboane ne mɔ mɔɔ ɛlɛdidi wɔ ɛya ne mɔ anu la ɛwo mralɛ apenle apenle mɔnwo mɔnwo. 14 Maa yɛ nlankɛ ne mɔ ɛwo dɔɔnwo, mɔɔ bɛmkpɔne mralɛ anzɛɛ bie ɛmminli a. Mmamaa yɛte nyane ɛzunlɛ biala wɔ yɛ awɔlɔne ne mɔ azo. 15 Ahomeka a le menli ne mɔ mɔɔ nyilalɛ zɛhae mɔ tɔ gua bɛ nwo zo la! Ahomeka a le menli ne mɔ mɔɔ bɛ Nyamenle a le Nana Nyamenle la!