1 O Awulae, me Nyamenle, wɔmɔ a ɛle me sinzavolɛ a; pepɛ die me, na die me ngoane fi bɛdabɛ mɔɔ bɛpepɛ me gyakɛ anzi la asa anu. 2 Mmamaa metɔ agye, na bɛanwulu bɛandɔ me kɔme zo kɛ awenade, bɛandwenle me aze bɛantete me nu nzokɛnzonka. 3 O Awulae, me Nyamenle, saa mevo awie, saa meye agɔnwolɛ bie memaa, anzɛɛ 4 meva ɛtane medua awie kpalɛ mɔɔ yeyɛ la kakɛ a, 5 yemɔ maa me kpɔvolɛma ɛkpo me gyakɛ abo zo na bɛhye me. Maa bɛtietia me nwo zo bɛhu me kpatalakpa bɛdo me lɔ, mɔɔ mendwazo bieko a.

6 Dwazo wɔ wɔ ɛyavalɛ nu, O Nana Nyamenle! Kɛha ɛ nwo na kotia me kpɔvolɛma bɛ ɛyavalɛ ne. Bɔzɔ ɛ nwo na baboa me, O me Nyamenle! Ɔluakɛ wɔmɔ ɛkulo kɛ pɛpɛlilɛ kɛyɛ ye gyima. 7 Maa aleɛabo amra kpokpoti ɛhuohua bɛ nloa wɔ ɛ nyunlu; na akee tɛnla wɔ tumililɛ ebia ne azo bua bɛ ndɛne. 8 Wɔmɔ yɛɛ ɛle ewiade kpokpoti ndɛnebuavolɛ a. Nea me tenleneyɛlɛ nwo na bua me ndɛne, O Nana Nyamenle; ɔluakɛ ɛdawɔ mumua ne ɛze kɛ menze nwolɛ bie. 9 Maa amumuyɛvoma bɛ atisesebɛyɛlɛ kpokpoti ɛrɛla awieleɛ; na yila bɛdabɛ mɔɔ bɛfa bɛ adwenle nee bɛ ahonle muala bɛsonle wɔmɔ tenlene Nyamenle ne la.

10 Nana Nyamenle a le me sinzavolɛ a; yemɔ yɛɛ ɔdie bɛdabɛ mɔɔ bɛ ahonle nu te la ngoane a.

11 Nana Nyamenle le tenlene ndɛnebuavolɛ; ɔle Nyamenle mɔɔ dahuu ɔbua amumuyɛvoma ndɛne wɔ ye ɛyavalɛ nu a. 12 Saa bɛangakyi bɛ sa anloa a, Nana Nyamenle bazi ye adabɛlaka ne. Yeva ye atwɛ ne na yeyɛ anwomoalɛ. 13 Yeva ye konlendeɛ ɛzulolɛ ɛzulolɛ ne mɔ, na yezua ye ɛda mbaka ne mɔ noko yewie.

14 Atiakunlutanevolɛma dwenle adwenle ɛtane; ɛtaneyelɛ nee adalɛbɔlɛ ɛyi bɛ tɛkɛɛ. 15 Bɛpɛ ahuma na bɛbobɔ adoba bɛgua nu; noko akee bɛdabɛ mumua ne a bɛtɔ bɛ ngane ne mɔ anu a. 16 Bɛ munzudeɛ ne bɔ bɛdabɛ bɛ ti mgbandanlama ne mɔ azo; na mɔɔ bɛsuzu bɛmaa bɛ gɔnwo mɔ la kakyi ba bɛdabɛ bɛ nwo zo.

17 Mebava moyɛlɛ mɔɔ fɛta Nana Nyamenle tenleneyɛlɛ ne la meamaa ye; mebado ayɛlɛyelɛ edwɛne meamaa Awulae mɔɔ wɔ anwuma anwuma la.