Salmos 80

Nzɛlɛlc mɔɔ bɛyɛ bɛmaa Yizilayɛ maanle ne ye Ngoanelielɛ la

1 Yɛ ɛnzolɛ tie yɛ, O Yizilayɛ Boaneneavolɛ; wɔmɔ mɔɔ ɛdedɛ Gyekɔbo kɛmɔ bɛdedɛ adɔma bɛ sa zo la! Wɔmɔ mɔɔ bɛmaa wɔ zo bɛdɛnla anwumabɔvolɛma tɛnlabelɛ a. 2 Da ɛ nwo ali kile Yifelaem, ɔ nee Bɛngyaman, ɔ nee Manasɛ abusua eku eku ne mɔ! Maa ɛ nwo zo wɔ wɔ anwosesebɛ ne anu; na bɛla balie yɛ!

3 O Nana Nyamenle, maa yɛzia yɛhɔ yɛ gyinlabelɛ dɛba ne anu. Maa wɔ anwunvɔnezelɛ ne ɛrɛla yɛ nwo zo, amaa ɔlua zo bɛalie yɛ ngoane! 4 O Nana Nyamenle mɔɔ ɛle Ɛlɔne Nyamenle a, kɔkpula mekɛ boni yɛɛ ɛkɛva ɛya kɛ ɛkɛdie wɔ menli nzɛlɛlɛ a? 5 Wɔmaa nyane ɛyɛ bɛ aleɛ mɔɔ bɛdi a; wɔmaa monle ɛhakyi bɛ nzule mɔɔ bɛno a. 6 Wɔmɔ ɛmaa yɛyɛ amgbuzilɛ baka yɛmaa yɛ gɔnwo mɔ; na yɛ kpɔvolɛma tɔ aholoba gua yɛ nwo zo.

7 O Awulae mɔɔ ɛle Ɛlɔne Nyamenle a, maa yɛzia yɛhɔ yɛ gyinlabelɛ dɛba ne anu. Maa wɔ anwunvɔnezelɛ ne ɛrɛla yɛ nwo zo, amaa ɔlua zo bɛalie yɛ ngoane! 8 Wɔmɔ yɛɛ ɛvale nwanye baka ɛvile Yigyibiti ɛrale a; ɛvoanle maanle gyɛne gyɛne na ɛluale baka ne wɔ azɛlɛ ne azo. 9 Ɛzieziele azɛlɛ ne gyɛlɛɛnye ɛmaanle baka ne; ɔti ɔzɔle ndinli na ɔnyinli ɔvale ɛkɛ ne azɛlɛ ne amuala. 10 Ɔyɛle alubo ɔmaanle awoka kpokpoti; na ye ngane ne mɔ hedale sida mbaka mgbole mgbole ne mɔ amuala anwo zo. 11 Ye ngane ngane ne mɔ bie denrɛdenrɛle hɔle Mɛdetɛlenia Nyevile tandane ne anu, yɛɛ ye ndinli ne mɔ noko hɔle moa kɛ Azule Yufileti la. 12 Duzu ati a akee wɔbubu ye mbane ne mɔ wɔgua azɛlɛ nwo, na menli mɔɔ pɛ nuhua la amuala tete ye ma ne mɔ a? 13 Ɛbɔ nu nyɛmoa mgbole mgbole tietia zo sɛkye bɛ, na abɔdeɛ kpokpoti mɔɔ wɔ ɛbɔ nu la fa ye bɛ aleɛ di.

14 Sia bɛla, O Ɛlɔne Nyamenle! To ɛ nye fi anwuma maanle ne anu nea; na fa ɛbulɛ maa nwanye baka ye. 15 Bɛla na balie nwanye baka ɛhye, mɔɔ ɛdawɔ ɛluale la ngoane; baka adɔma ɛhye mɔɔ ɛmaanle ɔnyinle anwosesebɛ nu la! 16 Bɛva senle bɛyela ye, na bɛpɛ ye bɛdo aze. Twi bɛ nyunlu wɔ ɛyavalɛ nu, na maa bɛ bo zo ɛminli bɔkɔɔ. 17 Emomu maa ɛ sa ɛnlomboɛ ne ɛwa sonla ne mɔɔ de ɛ sa fema zo la anwo zo. Sonla Ra ne mɔɔ ɛdawɔ wɔwula ye anwosesebɛ wɔmaa ɛdawɔ ɛ nwo la. 18 Zɔhane yɛɛ yɛnrɛhakyi yɛ nzi yɛnrɛzi wɔ bieko a; maa yɛnyia ngoane, na yɛbabɔ wɔ duma dahuu!

19 O Nana Nyamenle mɔɔ ɛle Ɛlɔne Nyamenle a, maa yɛzia yɛhɔ yɛ gyinlabelɛ dɛba ne anu. Maa yɛzia yɛhɔ yɛ gyinlabelɛ dɛba ne anu, amaa ɔlua zo bɛalie yɛ ngoane.