1 O bɛdo edwɛne fofolɛ bɛmaa Nana Nyamenle; bɛdo edwɛne bɛmaa Awulae, ewiade amra amuala! 2 Bɛdo edwɛne bɛmaa Nana Nyamenle, bɛhanvo ye duma ne! Bɛbɔ ye ngoanelielɛ ne anwo ɛlawule alehyenlɛ biala. 3 Bɛla ye anyunlunyia ne ali wɔ maanle maanle avinli, ɔ nee ye nwanwane gyima ne mɔ wɔ menli muala anu!

4 Nana Nyamenle le bedevinli, na ɔfɛta ayɛlɛyelɛ kpole; ɔwɔ kɛ bɛsulo ye bɛtɛla awozonle muala. 5 Ɔluakɛ awozonle kpokpoti le sonla sa anloa gyima; na emomu, Nana Nyamenle yɛɛ abɔle anwuma maanle ne, ɔ nee nuhua ninyɛne kpokpoti a. 6 Anyunlunyia nee enililɛ le ye deɛ; tumi nee anwosesebɛ muala vi ye Aako nu.

7 Bɛye Nana Nyamenle ayɛlɛ, O bɛmɛ aleɛabo abusua eku eku, bɛhanvo ye anyunlunyia ne ɔ nee ye anwosesebɛ ne. 8 Bɛva anyunlunyia mɔɔ fɛta Nana Nyamenle duma ne la bɛmaa ye; bɛva bɛ ahyɛlɛndeɛ bɛrɛla, na bɛrawolo ye Asɔne Sua Nwuanzanwuanza ne anu! 9 Bɛva nwuanzanwuanzayɛlɛ bɛzonle Nana Nyamenle; bɛmaa ewiade amra kpokpoti ɛva ɛzulolɛ ɛrɛla ɔ nyunlu! 10 Bɛha ye wɔ maanle maanle muala azo kɛ, "Nana Nyamenle di belemgbunli! Ɛhɛe! Ɔdaye yɛɛ ɔbɔle ewiade kpundii a; ɔti debie biala ɛnle ɛkɛ mɔɔ kɛhola kɛkpusu ye a; ɔbava pɛpɛlilɛ yeabua menli ne mɔ ndɛne."

11 Bɛmaa anwuma maanle ne ɛnyia ahomeka; na bɛmaa azɛlɛ ye azo amra ɛli fɛlɛko. Bɛmaa nyevile ɛkpudwu, ɔ nee ninyɛne mɔɔ wɔ ye nuhua la kpokpoti. 12 Bɛmaa ɛya ɛli fɛlɛko, ɔ nee ninyɛne mɔɔ wɔ nuhua la amuala! Ɛhye yɛɛ bamaa ɛbɔ nu mbaka muala ado edwɛne wɔ anyelielɛ nu, 13 wɔ Nana Nyamenle anyunlu a. Ɔluakɛ ɔlɛba; ɔlɛba yearabua aleɛabo amra amuala ndɛne. Ɔbava tenleneyɛlɛ yeabua ewiade amra ndɛne, na yeava ye nɔhalɛlilɛ ne yeabua menli mɔɔ wɔ nuhua la ndɛne.