1 ଯିହୁଦାରେନ୍‌ ରାଜା ଉଜ୍ଜିୟ, ଯୋଥାମ୍‌, ଆହାସ୍‌ ଓଡ଼ୋଃ ହିଜିକିୟରାଃ ଦିଶୁମ୍‌ ରାଇଜ୍‌ତାନ୍‌ ପାରିୟାରେ, ଆମୋସ୍‌ରାଃ ହନ୍ତେକଡ଼ା ଯିଶାୟ ଯିହୁଦା ଓଡ଼ୋଃ ଯୀରୁଶାଲେମ୍‌ ବିଷାଏରେ କୁମୁତେ ଦାର୍‌ଶାନ୍‌ ନାମ୍‌କେଦାଏ।

2 "ହେ ସିର୍ମାରେୟାଃ ସବେନାଃ ଓଡ଼ୋଃ ଅତେଦିଶୁମ୍‌ ଆୟୁମେପେ, ଚିୟାଃଚି ପ୍ରାଭୁ ପାର୍‌ମେଶ୍ୱାର୍‌ କାଜିକାଦା, ଆଇଙ୍ଗ୍‌ ହନ୍‌କକେ ଆସୁଲ୍‌ ଓଡ଼ୋଃ ଜଗାଅ କାଦ୍‌କଆଇଙ୍ଗ୍‌, ମେନ୍‌ଦ ଇନ୍‌କୁ ଆଇଁୟାଃ ବିରୁଧ୍‌ରେ କାମି ରିକାକାଦାକ। 3 ଉରିକ୍‌ ଆୟାଃ ଗମ୍‌କେକେ ସାରିୟାଃ ଓଡ଼ୋଃ ଗାଧା ଆୟାଃ ଗମ୍‌କେରାଃ ଡାଡାକା ସାରିୟାଃଏ। ମେନ୍‌ଦ ଇସ୍ରାଏଲ୍‌ ଆଇଙ୍ଗ୍‌କେ କାଏ ସାରିୟାଃ, ଆଇଁୟାଃ ହଡ଼କ ଆଟ୍‌କାର୍‌ ଉରୁମ୍‌ କାକ ଦାଡ଼ିୟାଃ।"

4 ହାଏ, ପାପ୍‌ କାଜିରେ ତାଇନ୍‌ତାନ୍‌ ଝୁଣ୍ଡ୍‌ ହଡ଼କ, କା ଧାର୍‌ମାନ୍‌ ହାମ୍ବାଲ୍‌ କାମି ରିକାତାନ୍‌ ହଡ଼କ, ଏତ୍‌କାନ୍‌ କାମି ରିକାତାନ୍‌ କିଲିକ ଓଡ଼ୋଃ ହସଡ଼ରେନ୍‌ ହନ୍‌କ। ନେ ସବେନ୍‌କ ପ୍ରାଭୁକେ ବାଗିକିୟାକ, ଇସ୍ରାଏଲ୍‌ରେନ୍‌ ପାବିତାର୍‌ ନିଃକେ କାକ ମାନାତିଙ୍ଗ୍‌କିୟା ଓଡ଼ୋଃ ଇନ୍‌କୁ ଇନିଃତାଃଏତେ ସାଙ୍ଗିନ୍‌ତେ ସେନ୍‌ ରୁହାଡ଼ାକାନାକ। 5 ଆପେ ପୁରାଃତେ ପୁରାଃ ବିରୁଧ୍‌ ରିକା ନାଙ୍ଗ୍‌ ଚିନାଃମେନ୍ତେ ଆପେ ପୁରାଃଗି ଦାଲଃଆପେ ? ଆପେୟାଃ ବହଃ ଘାଅତେ ପେରେୟାକାନା ଓଡ଼ୋଃ ମନ୍‌ସୁରୁଦ୍‌ ଦୁକୁତେ ପେରେୟାକାନା। 6 କାଟାଏତେ ବହଃ ଜାକେଦ୍‌ ଆପେୟାଃ ହଡ଼୍‌ମ ବୁଗି ବାନଆଃ, ହାଦାକାନ୍‌ ଓଡ଼ୋଃ ଦାଗିକାନ୍‌ ଘାଅକ ମେନାଃ, ଏନାରେ ସନ୍ଦ୍ର ଏସ୍‌କାର୍‌ ପେରେୟାକାନା। ଓଡ଼ୋଃ ଏନ୍‌ ସବେନାଃ ସାଫା ବାନଆଃ ଚାଏ କା ତଲାକାନା ଚାଏ ସୁନୁମ୍‌ତେ ଏନାକେ ଲେବେଃ କା ରିକାକାନା।

7 ଆପେୟାଃ ଦିଶୁମ୍‌ ହାଦୁଡ଼୍‌କାନା, ଆପେୟାଃ ନାଗାର୍‌ ସବେନାଃ ସେଙ୍ଗେଲ୍‌ତେ ଅଣ୍ଡର୍‌କାନା, ଆପେ ତାଇନ୍‌କେଦ୍‌ତେ ଏଟାଃ ବାହାରି ଦିଶୁମ୍‌ରେନ୍‌ ହଡ଼କ ଆପେୟାଃ ଅତେକେ ରେଃକ୍‌ ଇଦିତାନାକ, ଏନା ଏଟାଃ ଦିଶୁମ୍‌ରେନ୍‌ ହଡ଼କ ହରାତେ ଜିୟନ୍‌ ଠାୟାଦ୍‌ ଲେକା ଜିୟନ୍‌କାନା। 8 ଓଡ଼ୋଃ ସିୟୋନ୍‌ରେନ୍‌ କୁଡ଼ିହନ୍‌ ଲେକା, ଏନାଦ ଦାଖ୍‌ବାକ୍‌ଡ଼ିରେ ତାଇନ୍‌ତାନ୍‌ କୁମ୍ବା ଲେକା, ତାହେର୍‌ ପିଡ଼ିରେୟାଃ ମାଚା ଲେକା ଓଡ଼ୋଃ ସବେନ୍‌ସାଃରେ କେସେଦ୍‌ ବିୟୁରାକାନ୍‌ ନାଗାର୍‌ ଲେକା ହବାକାନା। 9 ସବେନାଃଏତେ ପେଡ଼େୟାନ୍‌ ପ୍ରାଭୁ ପାର୍‌ମେଶ୍ୱାର୍‌ ଆବୁଆଃ ଚିମିନ୍‌ କିଲିକକେ କାଏ ବାଞ୍ଚାଅ କାକରେଦ, ଆବୁଆଃ ଦାସା ସଦୋମ୍‌ ଓଡ଼ୋଃ ଗମ୍‌ରାରେନ୍‌ ହଡ଼କ ଲେକା ହବାକାନ୍‌ତେୟାଃ।

10 ହେ ସଦୋମ୍‌ରେନ୍‌ ରାଇଜ୍‌ ଚାଲାଅକ, ପ୍ରାଭୁଆଃ ବାଚାନ୍‌ ଆୟୁମେପେ, ହେ ଗମ୍‌ରାରେନ୍‌ ହଡ଼କ, ଆପେ ପାର୍‌ମେଶ୍ୱାର୍‌ଆଃ ଆନ୍‌ଚୁ ଆୟୁମେପେ। 11 "ପ୍ରାଭୁ ନେଆଁ କାଜିତାନାଏ, ଆପେୟାଃ ଉରୁବ୍‌ଦାଣେଁ ଆଇଁୟାଃ ନାଗେନ୍ତେ ଚିକାନ୍‌ କାମିତାନାଃ ?" ଆଇଙ୍ଗ୍‌ଦ ମିଣ୍ଡିକଆଃ ଉରୁବ୍‌ ଦାଣେଁ ଓଡ଼ୋଃ ଜାଁତୁକଆଃ ଇତିଲ୍‌ତେ ପେରେଃ କାନାଇଙ୍ଗ୍‌। କିରିକାନ୍‌ ବାଛା ଚାଏ ମିଣ୍ଡି ଚାଏ ମେରମ୍‌କଆଃ, ମାୟୋମ୍‌ତେ କାଇଙ୍ଗ୍‌ ସୁକୁଃତାନା। 12 ଆପେ ଚିମ୍‌ତାଙ୍ଗ୍‌ ଆପେୟାଃ ମେଦ୍‌ମୁହାଁଡ଼୍‌କେ ଆଇଙ୍ଗ୍‌କେ ଉଦୁବ୍‌ ନାଙ୍ଗ୍‌ ହିଜୁଃଆପେ, ଇମ୍‌ତା ଆଇଁୟାଃ ରାଚାକେ କାଟାତେ ତିକା ରେସେଦ୍‌ ନାଙ୍ଗ୍‌, ଆପେତାଃଏତେ ଅକଏ ସାନାଙ୍ଗ୍‌ତାନା ? 13 ନେ ସବେନ୍‌ ସାମା ସାମାରେ ଦାନ୍‌ ଆଲପେ ଆଉଇୟା, ଧୁଆନ୍‌ ଆଇଙ୍ଗ୍‌କେ ହିଲାଙ୍ଗ୍‌ଇଁୟା। ଆମାସ୍‌, ରୁଡ଼ୁନ୍‌ ହୁଲାଙ୍ଗ୍‌ ଓଡ଼ୋଃ ସାଭାରାଃ ଉନୁଦୁବ୍‌, ଆପେୟାଃ ନେ କା ଧାର୍‌ମାନ୍‌ ମାରାଙ୍ଗ୍‌ ସାଭା ଆଇଙ୍ଗ୍‌ କାଇଙ୍ଗ୍‌ ସାହାତିଙ୍ଗ୍‌ ଦାଡ଼ିତାନା। 14 ଆପେୟାଃ ଆମାସ୍‌ ଓଡ଼ୋଃ ଠାହାରାଅକାନ୍‌ ପାରାବ୍‌କକେ ଆଇଁୟାଃ ଜୀଉ ହିଲାଙ୍ଗ୍‌ ତାନାଏ। ଏନ୍‌ ସବେନାଃ ଆଇଁୟାଃ ନାଗେନ୍ତେ ହାମ୍ବାଲ୍‌ ବାହାରମ୍‌ ଲେକା ହବାକାନା ଓଡ଼ୋଃ ଆଇଙ୍ଗ୍‌ ଏନାକକେ ଗଅଃ ନାଙ୍ଗ୍‌ ଲାଗାକାନାଇଙ୍ଗ୍‌।

15 "ଆପେ ବିନ୍ତି ନାଙ୍ଗ୍‌ ଆପେୟାଃ ତିଃଇ ଜିଲିଙ୍ଗ୍‌ ଇମ୍‌ତା, ଆଇଙ୍ଗ୍‌ ଆପେକେ କାଇଙ୍ଗ୍‌ ନେଲ୍‌ପେୟା। ଆପେ ପୁରାଃଗି ବିନ୍ତି ତାନ୍‌ରେୟଗି ଆଇଙ୍ଗ୍‌ କାଇଙ୍ଗ୍‌ ଆୟୁମେୟା। ଚିଆଃଚି ଆପେୟାଃ ତିଃଇ ମାୟୋମ୍‌ତେ ପେରେଜାକାନା 16 ଆପେ ଆବୁଙ୍ଗ୍‌ ଓଡ଼ୋଃ ଫାର୍‌ଚିନ୍‌ପେ, ଆପେୟାଃ ଏତ୍‌କାନ୍‌ କାମିକ ଆଇଁୟାଃ ସାମ୍‌ନାଙ୍ଗ୍‌ ହେତେ ସାଙ୍ଗିନେପେ ଓଡ଼ୋଃ ଏତ୍‌କାନ୍‌ କାମି ରିକାଏତେ ହକାଅଃପେ। 17 ବୁଗିନ୍‌ କାମି ନାଙ୍ଗ୍‌ ଇତୁନ୍‌ପେ ଓଡ଼ୋଃ ବିଚାର୍‌ ନାଙ୍ଗ୍‌ ଚିହୁଟ୍‌ ତାଇନ୍‌ପେ, ବାଞ୍ଚାଅ କା ଦାଡ଼ିୟଃତାନ୍‌ ହଡ଼କକେ ଦେଙ୍ଗାକପେ, ଟୁଆର୍‌ ହନ୍‌କ ନାଗେନ୍ତେ ବୁଗିନ୍‌ ବିଚାର୍‌ ରିକାଏପେ ଓଡ଼ୋଃ ରାଣ୍ଡିକଆଃ ନାଗେନ୍ତେ ତିଙ୍ଗୁନ୍‌ପେ।

18 "ପ୍ରାଭୁ ପାର୍‌ମେଶ୍ୱାର୍‌ କାଜିତାନାଏ, ନାହାଁଃ, ହିଜୁଃପେ ଆବୁ ଜାଗାର୍‌ ରିକାଏୟାବୁ, ଆପେୟାଃ ପାପ୍‌ ସିନ୍ଦୁର୍‌ ଲେକା ଆରାଃ ତାଇନ୍‌ରେୟଗି ଆରିଲ୍‌ ଲେକା ପୁଣ୍ଡି ହବାଅଃଆ, ଏନ୍‌ଲେକାଗି ଗାଢ଼ା ଆରାଃ ରାଙ୍ଗ୍‌ ଲେକା ତାଇନ୍‌ରେୟଗି ମିଣ୍ଡିରାଃ ପୁଣ୍ଡି ଉବ୍‌ ଲେକା ହବାଅଃଆ। 19 ଆପେ ଆଇଁୟାଃ ବାଚାନ୍‌ ଲେକାତେପେ ସେସେନ୍‌ ରେଦ ଓଡ଼ୋଃ ମାନାତିଙ୍ଗ୍‌ ରିକାଏ ରେଦ ଦିଶୁମ୍‌ରେ ବୁଗିନ୍‌ ବୁଗିନ୍‌ ବିଷାଏପେ ଜମେୟାଁ। 20 ମେନ୍‌ଦ ଆପେ କାପେ ମାନାତିଙ୍ଗ୍‌ ରିକାୟା ଓଡ଼ୋଃ ବିରୁଧ୍‌ ରିକାଏ ରେଦ ତାରାଉଡ଼ିତେ ଜିଅନଃଆପେ, ଚିଆଃଚି ନେ କାଜି ପ୍ରାଭୁ ପାର୍‌ମେଶ୍ୱାର୍‌ କାଜିକାଦା।"

21 ନେଲେମେ, ନେ ପାତିୟାର୍‌ରଃ ନାଗାର୍‌ ଚିଲ୍‌କାତେ ବେଶ୍ୟା ହବାୟାନା ? ମିସା ବୁଗିନ୍‌ ବିଚାର୍‌ତେ ପେରେୟାକାନ୍‌ ତାଇକେନା, ଏନାରେ ଧାର୍‌ମାନ୍‌ ତାଇନଃତାନ୍‌ ତାଇକେନା, ମେନ୍‌ଦ ନାହାଁଃ ନେଆଁ ହଡ଼ ଗଗଏଃ ଠାୟାଦ୍‌ତେ ପେରେୟାକାନା। 22 ଯୀରୁଶାଲେମ୍‌, ଆମ୍‌ ରୁପା ଲେକା ତାଇକେନାମ୍‌ ମେନ୍‌ଦ ନାହାଁଃ ମୁର୍‌ଚାକାନା ଓଡ଼ୋଃ ଆମାଃ ଦାଖ୍‌ରାସି ବୁଗିନ୍‌ ତାଇନ୍‌କେନା, ମେନ୍‌ଦ ନାହାଁଃ ଦାଆଃ ମେସାକାନା। 23 ଆମାଃ ହାକିମ୍‌କ ହାଲାଗୁଲା ରିକାଏତାନା ଓଡ଼ୋଃ କୁମ୍ବୁଡୁ ହଡ଼କଲଃ ଗାତି ହବାଅଃତାନା। ହସଡ଼ କାମିକ ରିକା ନାଗେନ୍ତେ ଇନ୍‌କୁ ଉକୁକେଦ୍‌ତେ ଟାକା ଇଦିତାନାକ ଓଡ଼ୋଃ ଦାନ୍‌ ନାମ୍‌ ନାଙ୍ଗ୍‌ ହାୟା ହଡ଼କ ତାନ୍‌କ। ଇନ୍‌କୁ ଟୁଆର୍‌ ହନ୍‌କକେ ଦୁଲାଡ଼୍‌ କାକ ରିକାଃ ଚାଏ ରାଣ୍ଡିକଆଃ କାଜିଗରଙ୍ଗ୍‌ ଇନ୍‌କୁତାଃ କା ସେଟେରା।

24 ଏନାମେନ୍ତେ ପ୍ରାଭୁ, ପୁରାଃ ପେଡ଼େୟାନ୍‌ ପ୍ରାଭୁ ପାର୍‌ମେଶ୍ୱାର୍‌, ପୁରାଃ ପେଡ଼େୟାନ୍‌ନିଃ ତାନିଃ। ଇସ୍ରାଏଲ୍‌ରେନ୍‌ ପେଡ଼େୟାନ୍‌ ପାର୍‌ମେଶ୍ୱାର୍‌ ନେୟାଁ କାଜିତାନାଏ, "ଆୟୁମେପେ, ଆଇଁୟାଃ ବିରୁଧ୍‌ ରିକାତାନ୍‌ ହଡ଼କ ଚେତାନ୍‌ରେ ଖିସ୍‌ ହବାଅଃଆ ଓଡ଼ୋଃ ଆଇଙ୍ଗ୍‌ ଆଇଁୟାଃ ବାଇରି କତାଃଏତେ ବାଦ୍‌ଲା ଇଦିୟାଇଙ୍ଗ୍‌। 25 ଆଇଙ୍ଗ୍‌ ଆମାଃ ବିରୁଧ୍‌ରେ ତିଃଇ ଜିଲିଙ୍ଗ୍‌କେଦ୍‌ତେ ଆମାଃ ମୁର୍‌ଚା ତେୟାଃକ ପୁରା ଫାର୍‌ଚି ରିକାୟାଇଙ୍ଗ୍‌ ଓଡ଼ୋଃ ସବେନ୍‌ ସତ୍‌ରାତେୟାଃ ସାଙ୍ଗିନ୍‌ ରିକାୟାଇଙ୍ଗ୍‌। 26 ଆଇଙ୍ଗ୍‌ ସିଦା ଲେକା ଆମାଃ ରାଇଜ୍‌ ଚାଲାଅତାନ୍‌ ହଡ଼କକେ ଓଡ଼ୋଃ ମୁନୁରେ ଲେକା ଆମାଃ କାଜି ଉଦୁବ୍‌ ହଡ଼କକେ, ଏନ୍‌ ଲେକାଗି ନାହାଁଃହଁ ଆଡଃମିସା ସାଲାକଆଇଙ୍ଗ୍‌। ଏନ୍ତେ ଆମ୍‌ ଧାର୍‌ମାନ୍‌ ଓଡ଼ୋଃ ସାର୍‌ତି ନାଗାର୍‌ ମେନ୍ତେମ୍‌ ନୁତୁମଃଆ।"

27 ସିୟୋନ୍‌ ନ୍ୟାୟ ବିଚାର୍‌ତେ ଓଡ଼ୋଃ ଏନ୍ତାଃରେନ୍‌ ହଡ଼କ ଧାର୍‌ମାନ୍‌ ହରାତେ ବାଞ୍ଚାଅ ନାମେୟାଁକ। 28 ମେନ୍‌ଦ ବିରୁଧ୍‌ ରିକାତାନ୍‌କ ଓଡ଼ୋଃ ପାପି ହଡ଼କ ଜିୟନଃଆ ଓଡ଼ୋଃ ଅକନ୍‌କ ପ୍ରାଭୁକେ ବାଗିୟାକ, ଇନ୍‌କୁ ଜିୟନଃଆକ।

29 ଇମ୍‌ତାଙ୍ଗ୍‌ ଇନ୍‌କୁ ଆପେୟାଃ କେଟେଃ ଅଲୋନ୍‌*1:29 ଇସ୍ରାଏଲ୍‌ରାଃ ଦାକ୍ଷିଣ୍‌ସାଃରେ ନେ ଦାରୁକ ମେନାଃ ନୁତୁମ୍‌ ଦାରୁ ସେୱାତାନ୍‌ ହରାତେ ଗିହୁଗଃଆପେ ଓଡ଼ୋଃ ଆପେ ଆପେୟାଃ ସାଲାକାନ୍‌ ପାବିତାର୍‌ ବାଗାଇଚା ନାଗେନ୍ତେ ନାରାଜଃଆପେ। 30 ଚିୟାଃଚି ଆପେ କେଟେଃ ଅଲୋନ୍‌ ଦାରୁଏତେ ରହଡ଼୍‌ ସାକାମ୍ ନୁର୍‌କାନ୍‌ ଲେକା ଓଡ଼ୋଃ ଦାଆଃ କା ତାଇନ୍‌ତାନ୍‌ ବାଗାଇଚା ଲେକାପେ ହବାଅଃଆ। 31 ଓଡ଼ୋଃ ପେଡ଼େୟାନ୍‌ ହଡ଼କ ସାନାଇ ଝାଟା ଲେକା ଓଡ଼ୋଃ ଆକଆଃ କାମିକ ସେଙ୍ଗେଲ୍‌ରେୟାଃ ଆଙ୍ଗରା ଲେକା ହବାଅଃଆ, ଏନା ମିସାତେ ଜୁଲଃଆ ଓଡ଼ୋଃ ଏନାକେ ଇଣିଁଃ ନାଙ୍ଗ୍‌ ଜେତାଏ କାକ ତାଇନାଃ।