କୋରସ୍କେ ପ୍ରାଭୁ ସାଲାକିୟା
1 ପ୍ରାଭୁ ଆୟାଃ ସାଲାକାନ୍ନିଃ ମେନ୍ଲେରେ କୋରସ୍ ବିଷାଏରେ ନେ କାଜି କାଜିତାନା,
"କିଲିକକେ ଆୟାଃ ଆୟାର୍ରେ ଆକ୍ତେୟାର୍କ ନାଗେନ୍ତେ, ରାଜାକଆଃ ମାୟାଙ୍ଗ୍ରାଃ ତନଲ୍ ରାଡ଼ା ନାଗେନ୍ତେ
ଓଡ଼ୋଃ ଦୁହାର୍କ ଚିଲ୍କା କା ହାଣ୍ଡେଦଃଆ ଏନାମେନ୍ତେ ଇନିୟାଃ ଆୟାର୍ରେ ନାଗାର୍ରେୟାଃ ଦୁହାର୍ ସବେନାଃ ନିଃକ୍ଗି ତାଇନଃ ନାଗେନ୍ତେ ଆଇଙ୍ଗ୍ ଆୟାଃ ଜମ୍ତିଃଇ ସାବ୍ କାଦାଇଙ୍ଗ୍।
2 ଆଇଙ୍ଗ୍ ଆମାଃ ଆୟାର୍ ଆୟାର୍ ସେନାଇଙ୍ଗ୍, ସବେନ୍ ଗାଡା ଢିପା ଠାୟାଦ୍କେ ମିଦ୍ସାମାନ୍ ରିକାୟାଇଙ୍ଗ୍।
ପିତ୍ତାଲ୍ରେୟାଃ ଦୁହାର୍କ ସବେନାଃ ଟୁକ୍ଡ଼ା ଟୁକ୍ଡ଼ା ରିକାଅଃଆ ଓଡ଼ୋଃ ମେଡ଼େଦ୍ରାଃ ଅର୍ଗଡ଼୍ ସବେନାଃ ହାଦେୟାଇଙ୍ଗ୍।
3 ଆଇଙ୍ଗ୍ ଆମ୍କେ ନୁବାଃରେ ତାଇକାନ୍ ତେୟାଃକ
ଓଡ଼ୋଃ ଉକୁକେଦ୍ତେ ହୁଣ୍ଡିୟାକାନ୍ ଖୁର୍ଜି ସବେନାଃ ଏମାମେୟା,
ଆମାଃ ନୁତୁମ୍ ସାବ୍କେଦ୍ତେ କେଡ଼ାନିଃ ଆଇଙ୍ଗ୍ ଯେ ପ୍ରାଭୁ ଇସ୍ରାଏଲ୍ରେନ୍ ପାର୍ମେଶ୍ୱାର୍ ତାନିଙ୍ଗ୍, ଏନା ଆପେ ସାରି ଦାଡ଼ିୟାପେ।
4 ଆଇଁୟାଃ ଦାସି ଯାକୁବ୍ ଓଡ଼ୋଃ ସାଲାକାନ୍ ଇସ୍ରାଏଲ୍ ହରାତେ ଆଇଙ୍ଗ୍ ଆମାଃ ନୁତୁମ୍ ସାବ୍କେଦ୍ତେ କେଡ଼ା କାଦ୍ମେୟାଁ।
ଆମ୍ ଆଇଙ୍ଗ୍କେ କା ସାରିକାଦ୍ ରେହ ଆଇଙ୍ଗ୍ ଆମ୍କେ ମାରାଙ୍ଗ୍ କାଦ୍ମେୟାଁ।
5 "ଆଇଙ୍ଗ୍ ପ୍ରାଭୁ ତାନିଙ୍ଗ୍ ଆଇଙ୍ଗ୍କେ ବାଗିକେଦ୍ତେ ଏଟାଃ ପାର୍ମେଶ୍ୱାର୍ ମେନ୍ତେ ଜେତାଏ ବାଙ୍ଗାଇୟାଃ।
ଆମ୍ ଆଇଙ୍ଗ୍କେ କା ସାରି ରେହ ଆମ୍କେ ପେଡ଼େଃ ଏମାମେୟାଇଙ୍ଗ୍,
6 ଏନାତେ ସିଙ୍ଗିତୁରଃ ସାଃଏତେ ସିଙ୍ଗି ହାସୁର୍ସାଃ ଜାକେଦ୍ ସବେନ୍ ହଡ଼କ ସାରି ଦାଡ଼ିୟାଃକ ଯେ,
ଆଇଙ୍ଗ୍କେ ବାଗିକେଦ୍ତେ ଏଟାଃ ପ୍ରାଭୁ ପାର୍ମେଶ୍ୱାର୍ ଜେତାଏ ବାଙ୍ଗାଇୟା।
7 ଆଇଙ୍ଗ୍ ମାସ୍କାଲ୍କେ ବାଇୟାଃ ଓଡ଼ୋଃ ନୁବାଃକେ ହଁ ବାଇୟାଃ,
ଆଇଙ୍ଗ୍ ସୁକୁ ଆଉୱାଃଏ ଓଡ଼ୋଃ ନକ୍ସାନ୍ ହଁ ଆଉୱାଃଏ,
ଆଇଙ୍ଗ୍ଦ ପ୍ରାଭୁ ତାନିଙ୍ଗ୍, ଆଇଙ୍ଗ୍ଗି ସବେନାଃ ରିକାଏତାନା।
8 ହେ ସିର୍ମାରେୟାଃ ସବେନାଃ, ଆମ୍ ଚେତାନ୍ ଏତେ ଧାର୍ମାନ୍ ଗାମାଏ, ଏନାଦ ରିମିଲ୍ ଏତେ ଗାମାଏକା।
ଅତେ ମେଲାଅଃକା, ଏନାଏତେ ପାରିତ୍ରାଣ୍ ସିର୍ଜାଅଃକା ଓଡ଼ୋଃ ଏନ୍ ହରାତେ ଧାର୍ମାନ୍ ପସା ଇଦିୟଃକା।
ଚିୟାଃଚି ନେଆଁଦ ପ୍ରାଭୁ ବାଇୟାକାଦାଏ।"
ପ୍ରାଭୁ ବାବାଇନିଃ ଓଡ଼ୋଃ ଆୟାଃ ଇତିହାସ୍
9 ଅକଏ ଆପାନ୍ ବାବାଇନିଃଲଃ କାପ୍ଜି ରିକା ଇନିୟାଃ ଜୀୱାନ୍ ଧିକ୍ ହବାଅଃକା,
ଚିୟାଃଚି ଇନିଃଦ ଅତେରେ ଉୟୁଗାକାନ୍ ମିଆଦ୍ ଖାପ୍ରା ଲେକାନିଃ ତାନିଃ।
ଚିୟାଃ ହାସା କୁମ୍ଭାର୍କେ କୁଲି ଦାଡ଼ିୟା, ଚିନାଃମ୍ ବାଇୟେତାନା ?
ଚିୟାଃ ଆମାଃ କାମି କୁଲି ଦାଡ଼ିୟାଏ, ଆମାଃ ତିଃଇ ବାନଆଃ ?
10 ଚିୟାଃ, ଜେତାଏ ଆୟାଃ ଆପୁତେକେ କାଜି ଦାଡ଼ିୟା,
"ଆମ୍ ଚିୟାଃ ଜାନାମ୍କାଦିୟାଁମ୍ ? ଚାଏ ଜେତାଏ ଏଙ୍ଗାତେକେ କୁଲି ଦାଡ଼ିୟାଃ, ଆମ୍ ଅକେୟାଃ ଏଙ୍ଗା ତାନ୍ମେ ?" ଇନିଃ ଧିକ୍ !
11 ଇସ୍ରାଏଲ୍ରେନ୍ ପାବିତାର୍ ପାର୍ମେଶ୍ୱାର୍ ଓଡ଼ୋଃ ଇନିୟାଃ ବାବାଇନିଃ ପ୍ରାଭୁ କାଜିତାନାଏ,
"ଚିୟାଃ ଆପେ ହନ୍କଆଃ ହିଜୁଃ ଦିପିଲି ରେୟା କାଜିକ ସାରି ନାଗେନ୍ତେ ଆଇଙ୍ଗ୍କେ କୁଲି ତାନାପେ ?
ଚାଏ ଆଇଁୟାଃ ତିଃଇ ରେୟା କାମି ନାଗେନ୍ତେ ଚିୟାଃ ଆପେ ହୁକୁମ୍ ଏମାଇଁୟା ?
12 ଆଇଙ୍ଗ୍ଗି ଅତେକେ ବାଇୟାକାଦାଇଙ୍ଗ୍ ଓଡ଼ୋଃ ଏନାରେ ହଡ଼କେ ବାଇ କାଇୟାଃ।
ଆଇଁୟାଃ ଆପ୍ନାଃ ତିଃଇରେ ସିର୍ମା ରେୟା ସବେନାଃକେ ପାସ୍ରାଅ କାଦା।
ଏନାରାଃ ସବେନ୍ ବିଷାଏକେ ଆଇଙ୍ଗ୍ ହୁକୁମାକାଦାଇଙ୍ଗ୍।
13 ଆଇଙ୍ଗ୍ ଆଇଁୟାଃ ଧାର୍ମାନ୍ତେ ଇନିଃକେଇଙ୍ଗ୍ ମାରାଙ୍ଗ୍କାଇଜା
ଓଡ଼ୋଃ ଇନିୟାଃ ହରାକ ସିଧା କାଦାଇଙ୍ଗ୍।
ଇନିଃ ଆଇଁୟାଃ ନାଗାର୍କେ ଆଡଃମିସା ବାଇରୁହାଡ଼େଆ
ଓଡ଼ୋଃ ଆଇଁୟାଃ ତଲାକାନ୍ ହଡ଼କକେ ରାଡ଼ାକଆ,
ଇନିଃ ଜେତାନ୍ ଗନଙ୍ଗ୍ ଚାଏ ନାଲା ନାମେ ନାଗେନ୍ତେ ନେ କାମି କାଏ ରିକାୟା,
ସବେନାଃତେ ପେଡ଼େୟାନ୍ ପ୍ରାଭୁ ନେ କାଜି କାଜିକାଦା।"
ପ୍ରାଭୁ ଏସ୍କାର୍ ବାଞ୍ଚାଅନିଃ
14 ଇସ୍ରାଏଲ୍ରେନ୍ ପ୍ରାଭୁ ନେ କାଜି କାଜିତାନାଏ,
"ମିସାର୍ ଦିଶୁମ୍ରେ ନାମଃତାନ୍ ଜିନିଷ୍କ ଓଡ଼ୋଃ କୁଶ୍ରେୟାଃ କିରିଙ୍ଗ୍ ଆଖ୍ରିଙ୍ଗ୍ ଜିନିଷ୍କ,
ଓଡ଼ୋଃ ସେବାୟିୟରେନ୍ ସାଲାଙ୍ଗି ହଡ଼କ ଆମାଃତାଃ ହିଜୁଃଆକ ଓଡ଼ୋଃ ଆମାଃ ହବାଅଃଆକ।
ଇନ୍କୁ ସିକିଡ଼ିତେ ତଲାକାନ୍କ ଲେକା ତଲ୍କେଦ୍ତେ ଆମାଃ ଦୟା ଦୟା ସେନାଃକ।
ଇନ୍କୁ ଆମାଃ ଆୟାର୍ରେ ଇକ୍ଡ଼ୁମ୍ କେଦ୍ତେ ଜହାର୍ତାନ୍ଲଃ ବିନ୍ତିକେଦ୍ତେ କାଜିମେୟାଁକ,
‘ସାର୍ତିଗି ପାର୍ମେଶ୍ୱାର୍ ଆମାଲଃ ମେନାଇୟା,
ଇନିଃକେ ବାଗିକେଦ୍ତେ ଏଟାଃ ଜେତାଏ ବାଙ୍ଗାଇୟା, ଓଡ଼ୋଃ ଜେତାଏ ପାର୍ମେଶ୍ୱାର୍ ବାଙ୍ଗାଇୟା।’
15 ହେ ଇସ୍ରାଏଲ୍ରେନ୍ ପାର୍ମେଶ୍ୱାର୍ ଓଡ଼ୋଃ ଜୀଉବାଞ୍ଚାଅନିଃ,
ସାର୍ତିଗି ଆମ୍ ଆପାନ୍କେ ଉକୁଇତାନ୍ ପାର୍ମେଶ୍ୱାର୍ ତାନ୍ମେ।
16 ମୁରୁତ୍ ବାଇତାନ୍ ସବେନ୍ ଖୋଦାକାମି ହଡ଼କ ଗିହୁଗଃଆକ
ଓଡ଼ୋଃ ନିନ୍ଦାଅଃଆକ ଏନ୍ତେ ଇନ୍କୁ ସବେନ୍ ମିସାତେ ଆକ୍ଚାକାଅଃୱାକ।
17 ମେନ୍ଦ ପ୍ରାଭୁଆଃ ହରାତେ ଇସ୍ରାଏଲ୍ ବାଞ୍ଚାଅ ନାମେୟାଁଏ।
ଆପେ ସବେନ୍କ ଜାନାଅ ଜାନାଅ ଜାକେଦ୍ ପାରିତ୍ରାଣ୍ପେ ନାମେୟାଁ
ଓଡ଼ୋଃ କାପେ ଗିହୁଗଃଆ ଚାଏ ନିନ୍ଦା କାପେ ନାମେୟାଁ।"
18 ଚିୟାଃଚି ସିର୍ମାରେୟା ସବେନାଃ ବାବାଇନିଃ ପ୍ରାଭୁ ନେ’ଲେକା କାଜିତାନାଏ,
ଇନିଃ ପାର୍ମେଶ୍ୱାର୍ ତାନିଃ,
ଇନିଃ ଅତେକେ ବାଇକେଦ୍ତେ ସବେନ୍ ବିଷାଏକେ ବୁଗିଲେକାଏ ବାଇ ସେକାଡ଼୍କେଦା।
ଓଡ଼ୋଃ ଏନାକେ ସାମାଗି କା ବାଇକେଦ୍ତେ ଏନ୍ତାଃରେ ଚିଲ୍କା ତାଇନ୍ ଦାଡ଼ିୟଃଆ ଏନାମେନ୍ତେ ଏନାକେ ବାଇକେଦା।
ଇନିଃ କାଜିତାନା, "ଆଇଙ୍ଗ୍ ପ୍ରାଭୁ, ଆଇଙ୍ଗ୍କେ ବାଗିକେଦ୍ତେ ଓଡ଼ୋଃ ଜେତାଏ ବାଙ୍ଗାଇୟା।
19 ଆଇଙ୍ଗ୍ ଉକୁଃକେଦ୍ତେ ନୁବାଃ ଦିଶୁମ୍ରେୟାଃ ଜେତାନ୍ ଠାୟାଦ୍ ଏତେ କାଇଙ୍ଗ୍ କାଜି,
ଆଇଙ୍ଗ୍ ଯାକୁବ୍ଆଃ କିଲିକକେ କାଇଙ୍ଗ୍ କାଜି, ‘ଆପେ ସାମାରେ ଆଇଙ୍ଗ୍କେ ଦାଣାଁଇଙ୍ଗ୍ ତାନାପେ।’
ଆଇଙ୍ଗ୍ ପ୍ରାଭୁ, ଆଇଙ୍ଗ୍ ସାର୍ତି କାଜିତାନାଇଙ୍ଗ୍,
ଅକଆଃ ଲାଗାତିୟାଃଁ ଏନା ଆଇଙ୍ଗ୍ ନ୍ୟାୟ ଧାର୍ମାନ୍ରେ କାଜିୟାଇଙ୍ଗ୍।"
ପ୍ରାଭୁ ଓଡ଼ୋଃ ବାବିଲୋନ୍ରେନ୍ ମୁରୁତ୍
20 ପ୍ରାଭୁ କାଜିତାନାଏ,
"ହେ ସବେନ୍ ରାଇଜ୍ରେନ୍ କିଲିକ,
ଆପେ ସବେନ୍କ ମିଦ୍ତାଃରେ ହୁଣ୍ଡିକେଦ୍ତେ ଆଇଁୟାଃତାଃତେ ହିଜୁଃପେ।
ଅକନ୍କ ଦାରୁ ରେୟାଃ ଖଦାକାନ୍ ମୁରୁତ୍କକେ ସାବ୍କେଦ୍ତେ ହନରାଃକ
ଓଡ଼ୋଃ ବାଞ୍ଚାଅଃ ନାଗେନ୍ତେ ପେଡ଼େଃ ବାନଃଆ, ଇନ୍କୁତାଃରେ ବିନ୍ତି ରିକାକ।
ଇନ୍କୁଆଃ ଜେତାନ୍ ସେଣାଁ ବାନଃଆ।
21 ଆପେ କାଜିପେ ଓଡ଼ୋଃ ଉଦୁବେପେ, ଇନ୍କୁ ଆପାନ୍ ଆପାନ୍ରେ ଉହାଟ୍ ରିକାଃକ,
ସିଦା ଦିପିଲିରେ ନେ କାଜି ଅକଏ କାଜିୟାକାଦା ? ପୁରାଃ ସିଦା ନେ କାଜି ଅକଏ ଉଦୁବାକାଦା ?
ଆଇଙ୍ଗ୍ ପ୍ରାଭୁ, ଚିୟାଃ ନେ କାଜି କାଇଙ୍ଗ୍ କାଜି ?
ଆଇଙ୍ଗ୍କେ ବାଗିକେଦ୍ତେ ଏଟାଃ ପାର୍ମେଶ୍ୱାର୍ ବାଙ୍ଗାଇୟା,
ଆଇଙ୍ଗ୍ ଧାର୍ମାନ୍ ପାର୍ମେଶ୍ୱାର୍ ଓଡ଼ୋଃ ବାଞ୍ଚାଅନିଃ, ଆଇଙ୍ଗ୍କେ ବାଗିକେଦ୍ତେ ଏଟାଃନିଃ ଜେତାଏ ବାଙ୍ଗାଇୟା।
22 "ହେ ଅତେ ଦିଶୁମ୍ରାଃ ଟୁଣ୍ଡୁ ଜାକେଦ୍ ତାଇନ୍ତାନ୍ ସବେନ୍କ,
ଆପେ ସବେନ୍, ଆଇଁୟାଃତାଃତେ ରୁହାଡ଼୍ କେଦ୍ତେ ଜୀଉ ବାଞ୍ଚାଅପେ ନାମେକା।
ଚିୟାଃଚି ଆଇଙ୍ଗ୍ ପାର୍ମେଶ୍ୱାର୍ ତାନିଙ୍ଗ୍, ଆଇଙ୍ଗ୍କେ ବାଗିକେଦ୍ତେ ଏଟାଃନିଃ ଜେତାଏ ବାଙ୍ଗାଇୟା।
23 ଆଇଙ୍ଗ୍ ଆପ୍ନାଃ ନୁତୁମ୍ ସାବ୍କେଦ୍ତେ କିରିୟାକାଦା
ଓଡ଼ୋଃ ଆଇଁୟାଃ ମଚା ଏତେ ଅକ ଧାର୍ମାନ୍ କାଜି ଅଡଙ୍ଗ୍ୟାନା, ଏନା ଚିଉଲାହ କା ସାମା ଏଣ୍ଡାଗଃଆ।
ସବେନ୍କ ଆଇଁୟାଃ ଆୟାର୍ରେକ ଇକ୍ଡ଼ୁମେଆ
ଓଡ଼ୋଃ ସବେନ୍ ଆଲାଙ୍ଗ୍ ଆଇଁୟାଃ ନୁତୁମ୍ତେ କିରିୟା ରିକାୟା।
24 "ଇନ୍କୁ ଆଇଁୟାଃ ବିଷାଏରେ କାଜିୟା,
‘ପ୍ରାଭୁତାଃରେ ଏସ୍କାର୍ ଧାର୍ମାନ୍ ଓଡ଼ୋଃ ପେଡ଼େଃ ମେନାଃ।
ଅକନ୍କ ଇନିଃତାଃରେ ଖିସ୍କାନ୍ ତାଇକେନାକ, ଇନ୍କୁ ସବେନ୍କ ଗିହୁଗଃଆକ ଓଡ଼ୋଃ ହିଜୁଃରୁହାଡ଼ାକ।
25 ମେନ୍ଦ ଇସ୍ରାଏଲ୍ରେନ୍ ସବେନ୍ କିଲି, ପ୍ରାଭୁତାଃରେ ଧାର୍ମାନ୍ ମେନ୍ତେ ସାର୍ତି କାଜିୟଃଆକ
ଓଡ଼ୋଃ ପୁରାଃ ରାସ୍କା ରିକାଏୟାକ।’"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)