1 ପ୍ରାଭୁ ପାର୍‌ମେଶ୍ୱାର୍‌ଆଃ ଆତ୍ମା ଆଇଙ୍ଗ୍‌ରେ ମେନାଇୟାଃ,

ଚିୟାଃଚି ପ୍ରାଭୁ ଆଇଙ୍ଗ୍‌କେ ସୁକୁକାଜି ଉଦୁବ୍‌ ନାଗେନ୍ତେ ଆଭିଷେକ୍‌କାଦିୟାଁ।

ଓଡ଼ୋଃ ଆଇଙ୍ଗ୍‌କେ ନେଆଁ ନାଗେନ୍ତେ କୁଲ୍‌କେଦିୟାଁ,

ଚିଲ୍‌କା ଲେବେଃ ମନ୍‌ରେନ୍‌ ହଡ଼କତାଃରେ ସୁକୁ ଏମ୍‌ଦାଡ଼ିୟା,

ତଲାକାନ୍‌ କତାଃରେ ରାଡ଼ାରେୟାଃ କାଜି

ଓଡ଼ୋଃ ଜେହେଲାକାନ୍ କତାଃରେ ଜେହେଲ୍ ଏତେ ବାହାରିତେ ଅଡଙ୍ଗ୍‌ରେୟାଃ କାଜି ଉଦୁବେ ନାଗେନ୍ତେ କୁଲ୍‌କେଦିୟାଁ।

2 ପ୍ରାଭୁଆଃ ଲିନିବୁଇ ବାରାଷ୍‌ ଓଡ଼ୋଃ ଆବୁଆଃ ପାର୍‌ମେଶ୍ୱାର୍‌ଆଃ ସାଜାଇ ଏମ୍ ଦିପିଲିକେ ଉଦୁବ୍‌ ନାଗେନ୍ତେ

ଓଡ଼ୋଃ ଏୟମ୍‌ତାନ୍‌ ହଡ଼କକେ ଜୀଉରାଡ଼େଃ ଏମ୍ ନାଗେନ୍ତେ ଆଇଙ୍ଗ୍‌କେ କୁଲାକାଦିୟାଁ।

3 ସିୟୋନ୍‌ରେ ରାଆଃତାନ୍ ହଡ଼କକେ, ତରେକ୍‌ ବାଦ୍‌ଲାରେ ମୁକୁଟ୍‌,

ଦୁକୁରେୟାଃ ବାଦ୍‌ଲାରେ ସୁନୁମ୍,

ଆସ୍ରା ବାନଃ ଆତ୍ମା ବାଦ୍‌ଲାରେ ମାଇନାନ୍ ରେୟା ଲିଜାଃ ଏମାକ ନାଗେନ୍ତେ

ଇନିଃ ଆଇଙ୍ଗ୍‌କେ କୁଲ୍‌କେଦିୟାଁ।

ଏନାତେ ପ୍ରାଭୁ ଚିଲ୍‌କା ମାଇନାନ୍ ନାମେୟା, ଏନାନାଗେନ୍ତେ ଇନ୍‌କୁ ଧାର୍‌ମାନ୍ ରେୟାଃ ଦାରୁ

ଓଡ଼ୋଃ ଇନିୟାଃ ବାଗାନ୍‌ ମେନ୍ତେ କାଜିୟଃଆକ।

4 ଓଡ଼ୋଃ ଇନ୍‌କୁ ହାଦୁଡ଼ାକାନ୍‌ ଠାୟାଦ୍‌କକେ ବାଇରୁହାଡ଼େୟା,

ସିଦା ଦିପିଲିରେ ହାଦୁଡ଼ାକାନ୍‌ ଠାୟାଦ୍‌କ ବିରିଦ୍ ରିକାୟା।

ଓଡ଼ୋଃ ଇନ୍‌କୁ ଜିୟନ୍‌କାନ୍‌ ଓଡ଼ୋଃ ପୁରାଃ ସିର୍ମାରେୟାଃ ପୁର୍‌ଖାକଆଃ ହାଦୁଡ଼ାକାନ୍‌ ନାଗାର୍ ସବେନାଃକେ ଆଡଃମିସା ବାଇରୁହାଡ଼େୟା।

5 କା ସାରିୟାକାନ୍‌ ହଡ଼କ ଆପେୟାଃ ଜାଁତୁକଆଃ ଗୋଟ୍‌କକେ ଆତିଙ୍ଗ୍‌ ନାଙ୍ଗ୍‌ ତିଙ୍ଗୁଃଆକ

ଓଡ଼ୋଃ ଏଟାଃ ବାହାରି ଦିଶୁମ୍‌ରେନ୍ ହଡ଼କ ଆପେୟାଃ ଜ ପିଡ଼ିରେୟାଃ

ଓଡ଼ୋଃ ଦାଖ୍‌ବାକ୍‌ଡ଼ିରାଃ ନାଲା ରିକାତାନ୍‌କ ହବାନାଃ।

6 ମେନ୍‌ଦ ଆପେ ପ୍ରାଭୁଆଃ ଯାଜାକ୍‌କ ମେନ୍ତେ କାଜିନାଃ,

ପାର୍‌ମେଶ୍ୱାର୍‌କେ ସେୱା ରିକାତାନ୍‌କ ମେନ୍ତେ ହଡ଼କ ଆପେକେ କାଜିୟା।

ଆପେ ଏଟାଃ ଦିଶୁମ୍‌ରେନ୍ କିଲିକଆଃ ଖୁର୍ଜିକେ ନାମେୟା

ଓଡ଼ୋଃ ଇନ୍‌କୁଆଃ ମାନାରାଙ୍ଗ୍‌ରେୟାଃ ପେଡ଼େଃରେ ଆପେ ମାରାଙ୍ଗ୍‌ୟେଁନ୍‌।

7 ଆପେ କା ଗିହୁଃକେଦ୍‌ତେ ବାର୍‌ଗୁନା ମାଇନ୍‌ପେ ନାମେୟା।

ଓଡ଼ୋଃ ନିନ୍ଦା ବାଦ୍‌ଲାରେ ଇନ୍‌କୁ ଆପାନ୍ ଆପାନ୍ ଆକ୍‌ତେୟାର୍‌ରେ ରାସ୍‌କା ରିକାୟା।

ଏନାମେନ୍ତେ ଇନ୍‌କୁ ଆପ୍‌ନାଃ ଦିଶୁମ୍‌ରେ ବାର୍‌ଗୁନା ହିସା ନାମେୟା,

ଇନ୍‌କୁ ଜାନାଅଗି ରାସ୍‌କା ରିକାୟା।

8 ଚିୟାଃଚି ଆଇଙ୍ଗ୍‌ ପ୍ରାଭୁ, ନ୍ୟାୟ ବିଚାର୍‌କେ ଦୁଲାଡ଼୍‌ ନାମାଃଇଙ୍ଗ୍‌,

କା ଧାର୍‌ମାନ୍‌ରେୟାଃ ରେରେଃକ୍‌ କାଜିକେ ଆଇଙ୍ଗ୍‌ ହିଲାଙ୍ଗ୍‌ ରିକାଃଇଙ୍ଗ୍‌।

ଓଡ଼ୋଃ ଆଇଙ୍ଗ୍‌ ଇନ୍‌କୁକେ ନ୍ୟାୟ ରେୟାଃ ସାର୍‌ତିତେ ଇନ୍‌କୁଆଃ କାମିରାଃ ଜ ଏମାକଆଇଙ୍ଗ୍‌

ଓଡ଼ୋଃ ଇନ୍‌କୁଲଃ ମିଆଦ୍ ଜାନାଅ ଜାନାଅରେୟାଃ ରାଜିନାମା ରିକାୟାଇଙ୍ଗ୍‌।

9 ଓଡ଼ୋଃ ଇନ୍‌କୁଆଃ କିଲି ଏଟାଃ ଦିଶୁମ୍‌ରେନ୍ ହଡ଼କଆଃ ଥାଲାରେ

ଓଡ଼ୋଃ ହନ୍‌କଆଃ ପୁରାଃ ଝୁଣ୍ଡ୍‌ ଥାଲାରେ ମାରାଙ୍ଗ୍ ହୁଇନାଃ।

ଇନ୍‌କୁକେ ନେଲ୍‌ତାନ୍‌ ସବେନ୍ ହଡ଼କ ମାନାତିଙ୍ଗ୍‌ ରିକାୟା

ଓଡ଼ୋଃ ପ୍ରାଭୁଆଃ ଆଶିଷ୍‌ ନାମାକାଦ୍ ହଡ଼କ ମେନ୍ତେ ଇନ୍‌କୁକେ କାଜିୟା।

10 ଆଇଙ୍ଗ୍‌ ପ୍ରାଭୁତାଃରେ ପୁରାଃଗିଇଙ୍ଗ୍‌ ରାସ୍‌କାଅଃଆ, ଜୀଉତାଇୟାଁଃ ପାର୍‌ମେଶ୍ୱାର୍‌ତାଃରେ ପୁରାଃ ରାସ୍‌କା ରିକାଅଃଆ।

ଚିୟାଃଚି ଦୁହ୍ଲାକଡ଼ା ଚିଲ୍‌କା ଆପାନ୍‌କେ ସେକାଡ଼େନା ଓଡ଼ୋଃ ଆଣ୍‌ଦିୟଃ କୁଡ଼ି ଚିଲ୍‌କା ଆପାନ୍‌କେ ସିଙ୍ଗାରେନା,

ଏନ୍ କାମି ଲେକାଗି ଇନିଃ ପାରିତ୍ରାଣ୍‌ରେୟାଃ ଲିଜାଃତେ ଆଇଙ୍ଗ୍‌କେ ତୁସିଙ୍ଗ୍‌କେଦିୟାଁ

ଓଡ଼ୋଃ ଧାର୍‌ମାନ୍‌ରେୟାଃ ଲିଜାଃତେ ଆଇଙ୍ଗ୍‌କେ ଉୟୁକେଦିୟାଁ।

11 ଚିୟାଃଚି ଅତେ ଚିଲ୍‌କା ଆୟାଃ ଏତେ ହିତାକେ ଅମନ୍ ରିକାଏତାନା

ଓଡ଼ୋଃ ବାଖ୍‌ଡ଼ିରେ ହେରାକାନ୍‌ ତେୟାଃ ଚିଲ୍‌କା ଅମନଃତାନା,

ଏନ୍‌ଲେକା ପ୍ରାଭୁ ପାର୍‌ମେଶ୍ୱାର୍ ସବେନ୍ ଦିଶୁମ୍‌ରେନ୍‌ କିଲିକଆଃ ଆୟାର୍‌ରେ ଧାର୍‌ମାନ୍‌

ଓଡ଼ୋଃ ମାଇନାନ୍ କେ ଅମନ୍ ରିକାୟା।