1 Samweli 2:1-10 | YNT2018

Mapopelo ga che Hana

1 Nipele che Hana ŵapopesile achitiji,

"Ntima wangu ukusangalala kwa ligongo lya Ambuje Akunnungu.

Ngwakusya Ambuje Akunnungu ŵaambele machili.

None mbatile machili paujo pa ŵammagongo ŵangu,

ngusangalala pakuŵa Ambuje angulupwisye ni kundenda sangalale!"

2 "Ngapagwa ŵaakukundikwa kupopelelwa mpela Ambuje Akunnungu,

ngapagwa jwine jwalijose jwaali mpela ŵelewo,

ngapagwa jwaali lwala nti Akunnungu ŵetu

3 Nnechanje kuligamba,

ni kuwecheta kwa kulifuna.

Pakuŵa Ambuje Akunnungu ni ŵakwimanyilila.

Ŵelewo ni ŵachalamule ipanganyo yetu yose.

4 Maukunje ga ŵaali ni machili gatemeche,

nambo akwapamachili ŵaalepetele.

5 Ŵandu ŵaŵajikutaga kalakala

sambano akutenda masengo ga kulema kuti apate yakulya.

Nambo ŵaŵaliji ŵasala kalakala,

sambano akwete yakulya yejinji.

Jwankongwe jwangaŵeleka sambano aligopwele ŵanache saba.

Nambo jwankongwe jwaŵeleche ŵanache ŵajinji,

sambano asigele nkulilasika.

6 Ambuje Akunnungu ni ŵakuulaga ni sooni akuuchisya umi,

Ŵelewo ni ŵakwatulusya ŵandu kumalembe ni kwakoposya sooni.

7 Ambuje Akunnungu akwatesya ŵane kuŵa ŵakulaga,

ni ŵane kuŵa ŵakusichila.

Ŵane akwatulusya ni ŵane akwakwesya.

8 Akwanyakula ŵakulaga kutyochela nkulaga,

akwatyosya ŵakusoŵekwa kutyochela mu usauchi,

ni kwatenda atame pamo ni achakulu,

ni kwatenda atame pa chitengu cha luchimbichimbi cha mwenye.

Pakuŵa misingi ja chilambo jili jakwe Ambuje Akunnungu,

Ni pachanya pakwe achiŵisile chilambo.

9 Ŵelewo ni ŵakuugosa matala ga wandu ŵakwe ŵali ŵakukulupilichika,

nambo chiwatende ŵandu ŵachigongomalo ajonasiche mu chipi.

Pakuŵa ngapangwa mundu jwakupata indu kwa machili gakwe syene.

10 Ŵammagongo ŵa Ambuje tatemangulanywe ipande ipande,

tachilindima nti njasi kutyochela kwinani kwaligongo lyao.

Ambuje tachichilamula chilambo chose,

tachimpa machili ni luchimbichimbi mwenye jwa msagwile."