1 Iyi nɛmɔ ne, marɔ̃go ikɔdzɛ

aamɔɛ̃ ɔrɛrɛ̃ ɔwɛ̃

maɣɛ sɔ, "Boaɖe bo mɔmɔ araɖea

bobie bo mɔmɔ arapia;

tã makpere bo kere sɔ fɔ mare boɖe

si aɖi bo kunuarɛ i anɔ!"

2 Iyi nɛmɔ ne, Bosate aatã ɔraɖui sɛɛ wɔ nto ɔlɛnyɔ ɔre, fiɛ Israel mabi ɔɖuɖu ma lokuti aapa so ala kumɛgɔ i ɔraɖui aalɛ ɔso. 3 Mma lokuti i Zion, mma lokpese mawe i Yerusalem fiɛ matsɛrɛ ma ayere i magbanadze ndɛ̃ i Yerusalem ne, maakpere ma sɔ masekele. 4 Bosate aafore Yerusalem marɔ̃go anyini ɔɖi i ma iso, ɔfore kaɖe ima nɛ maɔfere i karɔ̃ anyini ɔɖi i ma iso iki i atɔ̃me iɣɛgu gu ɔtɔ siwarã ame. 5 Iyɔ i Zion kube iso gu mma ɔɖuɖu losikanya i mmɔ ne, Bosate aatã idɔdɔ ɔfu i ma iso ku anɔwã, ɔtã kuyɔ gu ɔtɔ wɔ lokpawaĩ ɔdzuɛ̃ ma ku kasɛ̃ ame. 6 Iaɖe igbɔdɔ gu ɔyu itã ma i ikpɛnɛ ame, fiɛ iaɖe katarikɔ̃ gu kawɛrɛkɔ̃ itã ma i kado gu awɛ ame.