1 Bosate sɔ, "Mikã me atsue, mi ma nsɛ mibie ara bɔlɔlɔa ibara

fiɛ mito mibie Bosate:

Midzuĩ itasiare nɛ ame mawe mi mabɔrɛgu

gu i itakabiɛkɔ̃ ga ame maɖi mi mabɔrɛgu.

2 Midzuĩ mi ɔse, Abraham,

gu Sara, mma loɣe mi iso minyɔ.

Ɔwi wɔ lokpere Abraham ne, ɔnɔwɛ̃ kere ɔɖe

fiɛ lofere wũ kusɛkusɛ ɔɣe masi gbodzoo.

3 Gbaã ne, Bosate to ɔ̃apia Zion kɔrɔ̃ i kayiri,

fiɛ ɔto ɔ̃anyɔ ɔ̃ akpakpi ɔɖuɖu nnya.

Ɔto ɔ̃abara ɔ̃ fafuĩ ame ɔse lɛ Eden kawĩ awe,

ɔbara ɔ̃ agbigbi ɔse lɛ Bosate kawĩ awe.

Isoɣɔ gu ilɛlɛ maanya i ɔ̃ ame

fiɛ sibaipɛ gu ileaka aare i ɔ̃ ame.

4 Mikã me atsue, wũ maturi;

minɔ me, wũ kaɖe.

Mmara to miabɔrɛ i wũ kɔrɛ;

fiɛ wũ atɔ̃meiɣɛ aafiɛ, lɛ ɔtɔ itã nɖebi.

5 Wũ sibɔlɔlɔ ka sibore sibo malamala,

wũ iɖi ka isɛ i ɔri.

fiɛ wũ ɔle aabɔ atɔ̃meiɣɛ i ɔri iso itã nɖebi.

Ndukilɔnrɔ̃ maturi to manyɔ me ɔri

fiɛ maɣɛ masia i ɔriinyɔ ame matã wũ ɔle.

6 Kɔlɛ anɔmi kato nyɔ kuɖokpo

si ka anyɔ karɔ̃ iso.

Kuɖokpo to kuawã lɛ kuyɔ awe,

fiɛ karɔ̃ to kaafoee lɛ arapia awe.

Maturi ma i karɔ̃ iso to maakpi lɛ kubɔibi fɛrɛrɛa awe.

Ɣɛɛ wũ iɖi to iase ɔwi daaro,

fiɛ wũ ara bɔlɔlɔa ibara iibafe kuiyikuiyi.

7 "Mi ma nɣe ara sɛɛ ibara,

mi maturi ma ɔtu ame i wũ mmara pia ne, mikã me atsue.

Midaanigã si maturi to mabara mi aɣiãra

ɣee midaati mikpakpa si maturi to matia mi.

8 Alasɔ makorokpɛ to maaɖe ma lɛ arapia awe;

irɔrɛ̃ to iakɛkɛ ma lɛ ɖɔti awe.

Ɣɛɛ wũ ara bɔlɔlɔa ibara aase ɔwi daaro,

wũ iɖi aase i siɣekparɛ ɔɖuɖu ame.

9 Bosate,

ta, ta! Pia ɔle lɛ arapia awe,

Ta lɛ kokowi awe

lɛ kumɛgɔ ata ku siɣekparɛ ku kokooko ɔwi awe.

Fɔ lotutu Raxab*51.9 Raxab: Itɔ̃me nɛgbe ɣɛ itã bɔi siare i ndu ame. apia i kusɛi ame,

fiɛ akpira aɣɛ siare wamɔ.

10 Iiɖe fɔ lotã ɔpo gbodzoo ɔsɔ̃,

ɔkɛlɛ ta kawodorokɔ̃

fiɛ aɖi ɔri i kawodorokɔ̃

atã fɔ maturi ma aɖi sɔ maki mafe?

11 Maturi ma i Bosate ɔfɔ ɔɣa aakpese maba.

Mato maabo i Zion ku aka ika;

mala maɔna isoɣɔ daaro, iase lɛ igaraikoto i ma ati iso.

Mato maala isoɣɔ ina gu ilɛlɛ kere,

iyɔ isoma gu itɔtɔrɛ̃ iisibawe.

12 "Mme, gbaã Mme nɖe nwɔ nsɛ ɔpia mi kɔrɔ̃ i kayiri.

Be ɔso ato anigã ɔturi wɔ nsɛ ɔkpi,

ɔturi awune wɔ kawirikɔ̃ lofe lɛ sikua awe?

13 Fiɛ ne miɣara Bosate mi Baradze,

nwɔ lowarɛ kato ɔfere

fiɛ ɔpia karɔ̃ sikaĩ ne.

Mipia mito minigã ɔwi biara ku iyi biara

ala maturi ma loyika mi mabɔ karɔ̃ sikpã teterea ɔso,

fiɛ iɣɛ ma iso sɔ maawɔra mi.

Ɣɛɛ lɛ i nwɔ loyika mi ɔbɔ karɔ̃ sikpã pia?

14 Ikuti kɛkɛĩ mma mabara masande fɔ̃dze to maana iwarã,

maibakpi i iyorɛ ame,

fiɛ araɖea iibanya ma.

15 Alasɔ Mme nɖe Bosate mi Ɣaa,

nwɔ nsɛ ɔtã ɔpo ɔnyagɛ̃ fiɛ ɔ̃ sipotutaa sɛ siɖi silɔ -

ɔ̃ iyere nɖe Bosate Ɔlesate.

16 Loɔsu wũ itɔ̃me lotã-ɔ si aɖi ne kanya

fiɛ lokɔla-ɔ i wũ kɔrɔ̃ kusɔ kayirinɔ-

Mme wɔ losɛra kuɖokpo i kɔ̃ kasɛkɔ̃

nwɔ lopia karɔ̃ sikaĩ,

nto loɣere Zion sɔ, 'Wũ maturi miɖe.' "

17 Ta, ta!

O Yerusalem ta ya,

fɔ wɔ lonɛ ira i abɔrɛgu i Bosate kɔrɔ̃ ame

i ɔ̃ sikpã teterea ibui ame.

Fɔ wɔ lonɛ ira nɛ nsɛ imɔɛ̃ maturi masɛ dodadoda

tiɔtiɔtiɔ ta ne karɔ̃.

18 Kɔdze kuwɛ̃ na i ɔ̃ mabi ɔɖuɖu

ma ɔɣe ame ɔ̃ate wũ ɔri.

Kuwɛ̃ na ɔ̃amɔɛ̃ wũ kɔrɔ̃ ɔla

i mabi ɔɖuɖu ma ɔla maɔmɔ ame.

19 Ara aka anyɔ nyanyariã wagbe ɔɔba-ɔ iso

nna loawo-ɔ kɔrɔ̃ ɔpia i kayiri? -

Ikpakpi gu iwɔ, kukã gu kakpã -

nna loapia-ɔ kɔrɔ̃ i kayiri?

20 Fɔ mabi ɔɔsɛ̃ alele;

marɛ i sivurã ɔɖuɖu iso pelepele,

lɛ kasɔlɔ ga i asabu ɔmɔɛ̃ awe.

Bosate sikpã ɔɔbo ma iso

fɔ Ɣaa ɔɔyagalagu ma.

21 Ne ɔso nɔ itɔ̃me nɛgbe, fɔ wɔ mabara iraboa,

fiɛ ato arɛ̃ ɣɛɛ iiɖe wain anɛ ato arɛ̃.

22 Bosate Wɔ Nsiguso fɔ Ɣaa sɔ

fɔ Ɣaa, nwɔ nsɛ ɔkpɛ̃ i ɔ̃ kaɖe iti sɔ,

"Nyɔ lo, loɔfɔ i fɔ kɔrɔ̃ ame

ikɔi nɛ lotã asɛ dodadoda,

i ikɔi nɛmɔ, i wũ sikpã teterea ibui ame,

aisibanɛ ne kuiyikuiyi.

23 Nto loasu ne lopia i mma lobara mi amumuɣɔ nrɔɔ̃ ame,

mma loɣere mi sɔ,

'Mirɛ i karɔ̃ si bosɛ mi iso bofe.'

Ne mibɔdzo mibara mi kama lɛ karɔ̃,

lɛ ɔvurã fiɛ masɛ maki iso ne."