1 तेबे यहोवे रा ये सन्देश माखे मिलेया, 2 "ओ नाश ऊणे वाल़े माणूंआ, यरूशलेमो रे लोका खे तिना रे सारे घिनौने काम बताई दे, 3 ओर तिना खे बोल, ओ यरूशलेमो रे लोको, परमेशर यहोवा तुसा खे ईंयाँ बोलोआ, तुसा रा जन्म ओर तुसा री उत्पत्ति कनानिया रे देशो ते ऊई, तुसा रा बाओ तो एमोरी ओर माये हित्तिन थी। 4 ये एड़ा ए जेड़े कि जेस दिने तुसे जम्मे, तेस दिने तो तुसा रा नाल़ूआ कटणे वाल़ा कोई नि था, ना तुसा रा शरीर पाणिये की नुल़ाया, ओर ना तुसा रा शरीर लूणे की मल़ेया या तुसा दे कोई टाल्ला लपेटेया ओ, जेड़े की इस्राएली बच्चेया साथे हमेशा ओआ। 5 यरूशलेम, किने बी तां पाँदे दया नि कित्ती ताकि इना कामा बीचा ते तेरिया तँईं एक बी काम कित्तेया ऊँदा, बल्कि आपणे जमणे रे दिने तूँ घृणित ऊणे रिया बजा ते खुले मैदानो दे सेटिती दी थी।" 6 फेर मैं तूँ देखी जेबे आऊँ तीसिए जाणे लगी रा था। ओर तूँ तेती आपणे ई खूनो बीचे लथपथ जमीना पाँदे पड़ी री थी। तूँ ईलणे री कोशिश करने लगी री थी। जेबे तूँ तेती लेटी री थी, तेबे मैं ताखे बोलेया, "जिऊँदी रओ।" 7 तेबे मैं तूँ डोरूआ रिया डाल़िया जेड़े बढ़ाई ओर तूँ बढ़दे-बढ़दे बड़ी ऊईगी ओर बऊत बांकी ऊईगी, तेरी छातिया सुडौल ऊईया ओर तेरे बाल़ बढ़दे गये, तेबे बी तूँ नांगी थी। 8 जेबे मैं फेर थोड़े साला बाद तूँ देखी, तो एड़ा लगेया जेड़े मैं देखेया कि तूँ ब्या करने लाईक बड़ी ऊईगी दी ए। तेबे एड़ा लगेया जेड़े मैं आपणे टाल्ले रा कुणा तां पाँदे टखाईता ओ, ये दशणे रिया तँईं कि मां तां साथे ब्या करना, जेतेरा मतलब ऊआ कि तूँ एबे नांगी री रयी। मां तां साथे ब्या करने रा वादा कित्तेया, ओर तूँ मेरी लाड़ी बणीगी। परमेशर यहोवे री येई बाणी ए।

9 तेबे मैं तूँ पाणिए साथे नुल़ाई की तां पाँदा ते खून तोयी ता ओर तेरे शरीरो पाँदे जैतूनो रा तेल मल़ेया। 10 तेबे मैं ताखे कढ़ाई वाल़े टाल्ले ओर बाकरेया री खाला रिया जूतिया पन्याईया ओर तेरे लको दे छोटा रेशम बानेया ओर ताखे रेशमी टाल्ले पन्याए। 11 तेबे मैं तेरा श्रृंगार कित्तेया ओर तेरे आथो दे बांगा ओर गल़े दे आर पन्याया। 12 तेबे मैं तेरे नाको दे बाल़ू ओर तेरे कानो दे बाल़िया पन्याईया ओर तेरे सिरो पाँदे सुन्दर मुकुट राखेया। 13 तांगे सूईने-चाँदिए रे गईणे थे, ओर तूँ हमेशा कढ़ाईदार सण ओर रेशमो रे टाल्ले पईनो थी। तूँ खास आटे री बणी री रोटिया ई खाओ थी, ओर खाणे रिया तँईं सयीत ओर जैतूनो रा तेल राखो थी। तूँ बऊत सुन्दर ऊईगी थी। ओर तूँ राणी बणीगी। 14 तेरी सुन्दरता रा बोल-बाला दूजी जातिया बीचे फैलीगा, कऊँकि तेस प्रतापो रिया बजा ते, जो मैं ताखे आपणी तरफा ते दित्तेया था, तूँ बऊत बांकी थी, परमेशर यहोवे री येई बाणी ए। 15 परमेशरे फेर बोलेया, ओर माखे एड़ा लगेया जेड़े कि ताखे परोसा ऊईगा ओ कि कऊँकि लोक जाणो थे कि तूँ बऊत बांकी ए, तूँ वेश्या बणी की बऊत पैसा कमाई सकोई। एड़ा लगेया जेड़े कि तैं हर एकी आदमिए साथे व्याभिचार कित्तेया जो तांगे आया ओर सेयो सब बी तेरी सुन्दरता रा मजा लणे लगी रे थे। 16 तैं आपणे बांके टाल्ले लई की रंग-बरंगिया मूर्तिया री पूजा करने खे ऊच्ची जगा बणाई तिया ओर तेती व्याभिचार कित्तेया, एड़े बुरे काम कित्ते जो ना कदी ऊए ओर ना कदी ऊणे। 17 जो सूईने-चाँदिए रे गईणे मैं ताखे दित्ते थे तिना ते तैं मूर्तिया बणाई लिया, ओर तिना मूर्तिया री पूजा करी की विश्वासघाती वेश्या जेड़ा पाप कित्तेया। 18 तेबे तैं आपणे बांके कढ़ाईया वाल़े टाल्ले लई की तिना मूर्तिया खे पन्याए ओर मेरा तेल ओर तूप तिना सामणे चढ़ाया। 19 मैं ताखे जो रोटी दित्ती थी, मतलब जो मैदा, तेल ओर सयीत ताखे आऊँ खुलाऊँ था, से सारा तैं तेस सामणे सुख देणे वाल़ी खुशबू करी की राखी ता, परमेशर यहोवे री येई बाणी ए कि एड़ा ई ऊआ। 20 परमेशरे बोलेया तैं आपणे माठे-बेटिया लई की जो तैं मेरिया तँईं जमाए, तिना मूर्तिया खे बलिदान करी की चढ़ाए। क्या तेरा व्याभिचार एड़ी छोटी गल्ल थी? 21 कि तैं मेरे बाल-बच्चे काईते, ओर तैं सेयो मूर्तिया रे सामणे बलि करी की चढ़ाईते। 22 तैं आपणे सारे घृणित कामो रे ओर व्याभिचार करदे ऊए आपणे बचपनो रे दिन कदी याद नि कित्ते, जबकि तूँ नांगी आपणे खूनो बीचे लेटी री थी।

23 तेरी तेसा सारी बुराईया पीछे क्या ऊआ? परमेशर यहोवे री येई बाणी ए, हाय, तां पाँदे हाय! 24 तैं चूठे देवतेया खे एक मन्दर बणाया ओर तैं एकी चौको दे तिना मूर्तिया री पूजा करने खे ऊच्ची बेदिया बणाई ती। 25 तैं आपणी एक-एक सड़का रे कनारे बी ऊच्ची जगा बणाई की आपणी सुन्दरता घृणित कराईती ओर हर एक यात्री खे बुरे कामो खे बुलाई की, तूँ हर दिन एकी वेश्या ते बी जादा ऊँदी चली री। 26 तेबे तू तेस आपणे पड़ोसी मिस्रो रे लोका साथे बी, जो मोटे-ताजे ए, तिना साथे वेश्या जेड़ा बर्ताओ कित्तेया ओर तिने माखे रोष चढ़ाणे खे आपणा व्याभिचार वाल़ा पाप ओर जादा बढ़ाईता। बढ़ांदी गयी। 27 इजी बजा ते मैं ताखे सजा देणे रा फैंसला कित्तेया, तेरा रोज का खाणा कम करिता रा ए ओर तेरी दुश्मण पलिश्ती जवाणसा जो तेरे महापापो रे कामो ते शर्माओईया, मैं तूँ तिना री इच्छा पाँदे छाडी ती री। 28 तेबे बी तेरे तोखे वाल़े काम कम नि ऊए, इजी री खातर तैं अश्शूरी लोका साथे बी वेश्या जेड़े विश्वासघात कित्तेया ओर तिना साथे व्याभिचार करने ते बाद बी तेरी इच्छा शान्त नि ऊई। 29 तैं बेबीलोनो रे बपारिया साथे बी व्याभिचार कित्तेया। एकी वेश्या जेड़े तैं आपू खे बऊत सारेया लोका खे बेचेया। पर सेयो फेर बी ताखे खुश नि करी सके।

30 ओ, यरूशलेम, आऊँ तांते बऊत गुस्से आ। आऊँ परमेशर यहोवा ए ओर ये मेरी बाणी ए कि तेरा मन केड़ा चंचल ए कि तूँ इना सारे कामा करेई, जो बेशर्म वेश्या रेई काम ए? 31 तैं हर एक गल़िया रे कुणे पाँदे मूर्तिपूजा करने खे मन्दर बणाए ओर हर एक चौको दे आपणी ऊच्ची जगा मूर्तिपूजा खे बणाई, क्या इजी तेई तूँ वेश्या नि बणी? कऊँकि तूँ एड़ी कमाईया पाँदे आसोई। 32 तूँ व्याभिचार करने वाल़ी लाड़ी ए, तूँ पराए मर्दा खे आपणे लाड़े रे बदले मानेई। 33 सबी वेश्या खे तो पैसे मिलोए, पर तैं आपणे सबी दोस्ता खे आपू पैसे देई की ओर तिना खे लाल़च देई की बुलाई राखे, ताकि सेयो चऊँ कनारे ते आई की तां साथे व्याभिचार करो। 34 ईंयाँ तेरा व्याभिचार बाकी व्याभिचारिया ते उल्टा ए। तां पीछे कोई व्याभिचारी नि चलदा ओर तूँ केसी ते कीमत नि लंदी, बल्कि तूँ ई देई, इजी बजा ते तूँ उल्टी ठईरी।

35 इजी बजा ते, ओ वेश्या जेड़े तोखा देणे वाल़े यरूशलेम, यहोवे रा वचन सुण, 36 परमेशर यहोवा ईंयाँ बोलोआ, "तैं जो करी राखेया से एड़ा ए जेड़े तैं आपणे टाल्ले आपू खोली राखे ओर वेश्या जेड़ा बर्ताओ कित्तेया ओर तिना मर्दा साथे संबंध बणाए जो तेरे लाड़े नि ए। मेरा मतलब ए कि तूँ घृणित मूर्तिया री पूजा करदी रये ई, ओर ताखे आपणे बच्चे तिना खे बलि करना अच्छा लगोआ। 37 एबे आऊँ जो करने वाल़ा ए से एड़ा ए जेड़े मां सेयो सब लोक कट्ठा करने जिना रे बारे दे तूँ सोचे ई कि सेयो मांते प्यार करोए, ओर जिना ते तूँ नफरत करेई। मां सेयो तां पाँदे अमला करने खे तेरे चऊँ कनारे कट्ठे करने, ओर मां जो करना से एड़ा ए जेड़े मैं तेरे टाल्ले खोली ते, ओर तिना तूँ तेबे देखणी जेबे तूँ पूरी तरआ ते नांगी ऊणी। 38 तेबे मां ताखे एड़ी सजा देणी, जेड़ी व्याभिचारणिया ओर खून करने वाल़ी जवाणसा खे दित्ती जाओई ओर मां रोष ओर जल़नी रे आई की तेरा खून बाह्णा। 39 मां ईंयाँ तूँ तेरे प्रेमिया रे वशो दे करी देणी ओर तिना तेरे गुम्मट टाल़ी देणे ओर तेरी ऊच्ची जगा तोड़ी देणियां, तिना तेरे टाल्ले जबरदस्ती खोलणे ओर तेरे सुन्दर गईणे छुड़ाई लणे ओर तूँ नांगी करी की छाडी देणी। 40 तेबे तेरे खलाफ तिना एक सभा कट्ठी करी की तिना तां पाँदे पात्थर बाणे ओर आपणी तलवारी साथे बाडी की टुकड़े-टुकड़े करी देणी। 41 तेबे तेरे पईलके प्रेमी जो एबे तेरे दुश्मण ए तिना आग लगाई की तेरे कअर फूकी देणे ओर ताखे बऊत जवाणसा सामणे सजा देणी ओर मां तेरा व्याभिचार बन्द करना ओर तां फेर व्याभिचार करने खे कीमत नि देणी। 42 तेबे मां फेर तां पाँदे रोष नि करना। मां, तैं जो माखे छाडी की ओरी देवतेया री पूजा कित्ती तेतेरिया बजा ते फेर तांते घृणा करना छाडी देणा। 43 तैं जो आपणे बचपनो रे दिन याद नि राखे, बल्कि इना सबी गल्ला रिया बजा ते माखे रोष चढ़ाया, इजी बजा ते मां तेरा चाल-चलण तेरे सिरो पाँदे पाणा ओर तूँ आपणे पिछले सारे घिनौने कामा ते ओर जादा महापाप नि करना, परमेशर यहोवे री येई बाणी ए।"

44 यहोवा बोलोआ, "देख, ओ यरूशलेम, सबी लोका तेरे बारे दे ये कहावत बोलणी, ‘जेड़ी माये तेड़ी बेटी’।" 45 तूँ आपणियां माया जेड़ी ए, जेसे आपणे लाड़े ओर आपणे बच्चेया ते नफरत कित्ती, तूँ बी आपणियां बईणा जेड़ी ए, तेसे बी तेरिया आपणे लाड़े ओर आपणे बच्चेया ते नफरत कित्ती। तुसा रा बाओ एमोरी था ओर तुसा री माये हित्ती थी। 46 तेरी बड़ी बईण शोमरोन ए, जो आपणी बेटिया समेत तेरे खूँजे कनारे रओई ओर तेरी छोटी बईण, जो तेरे दाँणे कनारे रओई, से बेटिया समेत सदोम ए। 47 तैं तिना जेड़ी चाल नि चली ओर ना तिना जेड़े बुरे कामो ते सन्तुष्ट ऊई, ये तो बऊत छोटी गल्ल ऊँदी, पर तेरा सारा चाल-चलण तिना ते बी जादा बिगड़ी गा। 48 परमेशर यहोवा एड़ा बोलोआ, "जेड़ा कि आऊँ जिऊँदा परमेशर ए, मेरी जिन्दगिया री कसम, तेरी बईण सदोमे ओर तेसा रे गांवें कदी बी से बुराई नि करी राखी जो तैं ओर तेरे गांवें करी राखी। 49 देख, तेरी बईण सदोमो रा पाप ये था कि से आपणी बेटिया समेत कमण्ड करो थी, पेट परी-परी की खाओ थी ओर सुख-चैनो दे रओ थी ओर गरीब-कंगाल़ लोका खे नि मानो थी। 50 सदोम ओर तेसरे लोक बऊत ज्यादा कमण्ड करी की मां सामणे बऊत पाप करने लगे। जेबे मैं सेओ तिना कामा खे करदे देखे तेबे मैं सजा दित्ती।" 51 परमेशरे बोलेया, इजी ते अलावा, शोमरोनो रे लोक तुसा यरूशलेमो रे लोका सामणे निर्दोष निकल़ी रे, तैं तो शोमरोनो ते बढ़ी की बुरे काम करी राखे ओर आपणे अन्दकूप घृणित कामो रे जरीये आपणी बईणा ते जीती गी। 52 इजी री खातर तैं जो आपणी बईणी रा न्याय कित्तेया, इजी बजा ते शर्मिंदा ओ, कऊँकि तैं तिना ते बढ़ी की घृणित पाप करी राखे, इजी बजा ते सेयो तां सामणे निर्दोष ठईरी रिया। इजी री खातर तूँ एते गल्ला ते शर्म कर ओर शर्मांदी रओ, कऊँकि तैं आपणियां बईणी कम दोषी ठराई राखिया।

53 जेबे आऊँ तिने खे, मतलब बेटिया समेत सदोम ओर शोमरोनो खे गुलामिया ते वापस ल्याऊँगा, तेबे तिना बीचे ई तेरे गुलाम बी वापस ल्याऊँगा। 54 जेते कि तूँ शर्मांदी रये ओर आपणे सारे कामा खे देखी की ताखे शर्म आऊँदी रओ, कऊँकि तूँ तिना री शान्तिया री बजा ऊई री। 55 ईंयाँ तुसे ओर तुसा रिया बईणी सदोम ओर सामरिया रे लोके बी आपणी-आपणी बेटिया समेत आपणी पईलकी दशा दे फेर पऊँछणियां। 56 परमेशरे बोलेया जदुओ तक तेरी बुराई सामणे नि आई थी, मतलब जेस बखतो तक तूँ नेड़े-तेड़े रे लोका समेत अरामी ओर पलिश्ती जवाणसा री जो एबे ताखे चऊँ कनारे ते तुच्छ जाणोईया, बेज्जती करो थी, 57 आपणे तिना कमण्डो रे दिना रे तूँ आपणी बईण सदोमो रा नाओं पनि लओ थी। 58 पर एबे ताखे आपणे पापा रा बोज आपू ई चकणा पड़ी रा, यहोवे री येई बाणी ए।

59 परमेशर यहोवा ईंयाँ बोलोआ, "मां तां साथे एड़ा ई बर्ताव करना, जेड़ा तैं कित्तेया, कऊँकि तैं वाचा तोड़ी की कसम तुच्छ जाणी। 60 तेबे बी मां तेरे बचपनो रे दिना री आपणी वाचा याद करनी ओर तां साथे सदा री वाचा बानणी। 61 जेबे तां आपणी बड़ी बईण ओर छोटी बईण आपू गे ल्याऊणिया, तेबे तां याद करना कि तैं क्या करी राखेया, ओर तां बऊत बेज्जती महसूस करनी। मां सेयो तेरिया बेटिया जेड़िया रणे देणियां, हालाँकि ये तां साथे मेरे वादे रा इस्सा नि था।*16:61 रोम. 6:21 62 मां तां साथे आपणी वाचा पक्की करनी ओर तेबे ताखे पता लगी जाणा कि आऊँ ई यहोवा ए।*16:62 यहे. 37:26 63 जेते कि तूँ याद करी की शर्मिंदा ओ ओर शर्मा रे मारे फेर कदी मूँ नि खोले। ये तेस बखते ऊना, जेबे मां तेरे सारे काम टखणे, परमेशर यहोवे री येई बाणी ए।"*16:63 पज. 78:38