1 तेबे यहोवे मांगे एक ओर सन्देश दित्तेया, 2 तिने बोलेया, "ये कहावत क्या ए जो लोक इस्राएल देशो दे बार-बार बोलोए कि माये बावे खट्टे अँगूर खाए, पर बच्चेया खे खट्टा स्वाद मिलेया।" 3 प्रभु यहोवा ये बोलोआ कि मेरिया जिन्दगिया री कसम, तुसा खे इस्राएलो दे फेर ये कहावत बोलणे रा मौका नि मिलणा। 4 देखो, सबी रे प्राण तो मेरे ई ए, जेड़ा बाओ रा प्राण, तेड़ा ई पाऊआ रा बी प्राण ए, दोनो मेरे ई ए। एतेरिया तँईं जो आदमी पाप करोगा से तेथी ई मरी जाणा। 5 जो कोई आदमी पला ओ, तेबे से जिऊँदा रणा। से पला आदमी ओर न्याय ओर तर्मो रे काम करो, 6 ओर ना तो पाह्ड़ो रे पूजा री जगा पाँदे रोटी खाई ओ, ना इस्राएलो रे लोका रिया मूर्तिया री पूजा कित्ती ओ; ना दूजे री लाड़िया साथे गल़त काम कित्तेया ओ, ओर ना छोतली जवाणसा रे नेड़े गया ओ, 7 ओर ना केसी पाँदे अन्देर कित्तेया ओ बल्कि कर्जदारो खे तेसरी बन्धक फेर देईती ओ, ना केसी खे लूटेया ओ, बल्कि पूखे खे आपणी रोटी दित्ती ओ, ओर नांगे खे टाल़े दित्ते ओ, 8 से केसी खे पैसे उधार नि देंदा ओर फेर तिजी रा ब्याज नि मांगदा ए। ओर से कोई बी बुरा काम करने खे ना करोआ। से लोका री मताद सच्चाईया ते ओर बिना केसी भेद-भावो ते करोआ। 9 से मेरे बिधि बिधानो खे सई तरीके ते मानोआ, सच्चाईया साथे काम करोआ, एड़ा माणूं तर्मी ए, से पक्का ई जिऊँदा रणा, प्रभु यहोवे री येई वाणी ए। 10 पर जे तेसरा पाऊ डाकू, अत्यारा, या ऊबे बोली राखे पापा बीचा ते केसी रा करने वाल़ा ओ, 11 ओर ऊबे बोली राखे खरे कामो खे करने वाल़ा ना ओ, ओर पाह्ड़ो रिया पूजा रिया जगा पाँदे रोटी खाई ओ, ओर तिने दूजे री केसी लाड़िया साथे गल़त काम करी की प्रष्ट कित्तेया ओ, 12 तिने गरीब लोका पाँदे अन्देर कित्तेया ओ, ओरी खे लूटेया ओ, बन्दक वापस नि कित्ती ओ, मूर्तिया रिया तरफा खे आख चकी ओ, बुरा काम कित्तेया ओ। 13 ब्याजो पाँदे पैसा दित्तेया ओ, ओर ब्याज लया ओ तेबे क्या से जिऊँदा रणा? से जिऊँदा नि रणा; इजी खे की तिने ये सारे बुरे काम करी राखे से पक्का मरना ओर तेसरा खून तेसरे ई सिरो पाँदे पड़ना। 14 फेर जे एड़े दुष्ट माणूंए रा पाऊ ओ ओर से आपणे बाओ रे ये सारे पाप देखी की डरो रे मारे तिना जेड़ा ना करदा ओ। 15 मतलब ना तो पाह्ड़ो दे पूजा रिया जगा दे रोटी खाई ओ, ना इस्राएलो रे कराने री मूर्तिया री तरफा खे आख चकी ओ, ना पराई जवाणस प्रष्ट कित्ती ओ, 16 ना केसी पाँदे अन्देर कित्तेया ओ, ना कुछ बन्धक लया ओ, ना कोई लूटेया ओ, बल्कि आपणी रोटी पूखेया खे देईती ओ, ओर जेसगे टाल्ले नि थे तेसखे टाल्ले दित्ते ओ, 17 गरीब लोका रे नुकशाणो ते आथ रोकेया ओ, ब्याज ओर बढ़ती नि लई ओ, मेरे नियमो खे मानेया ओ, ओर मेरी बिधिया पाँदे चलेया ओ, तेबे से आपणे बाओ रे पापो रिया बजा ते नि मरना, बल्कि जिऊँदा ई रणा। 18 तेसरा बाओ, जिने अन्देर कित्तेया ओर लूटेया, ओर आपणे साथो रे लोका बीचे बुरा काम कित्तेया, से आपणे बुरे कामो रिया बजा ते मरी जाणा। 19 जे तुसे मांते पूछो कि बाओ रे पापो रिया बजा ते तेसरे पाऊए खे सजा कऊँ नि ऊणी, तो मां ज्वाब देणा कि पाऊए सेई कित्तेया जो सई ओर ठीक था तिने बऊत सावधानिया साथे मेरे नियमो रा पाल़न कित्तेया! तेबे से जिऊँदा रणा। 20 जो आदमी पाप करोगा सेई मरोगा, ना तो पाऊ बाओ रे पापा रा बोज चकोगा ओर न बाओ पाऊए रा; तर्मिये खे आपणे ई तर्मो रा फल, ओर दुष्टो खे आपणी ई दुष्टता रा फल मिलणा।* 21 पर जे दुष्ट माणूं आपणे सब पापो ते फिरी की, मेरी सब बिधिया रा पाल़न करो ओर न्याय ओर तर्मो रे काम करो, तेबे से नि मरना; बल्कि जिऊँदा ई रणा। 22 तिने जितणे पाप कित्ते ओ, तिना बिचा ते केसी री याद तेसरे खलाफ नि करनी; जो तर्मो रे काम तिने कित्ते ओ, तेसरिया बजा ते से जिऊँदा रणा। 23 मां प्रभु यहोवे री ये वाणी ए, "क्या आऊँ दुष्टो रे मरने ते थोड़ा जा बी खुश ऊँआ? क्या आऊँ इजी ते खुश नि ऊँदा कि से आपणियां बाटा ते फिरी की जिऊँदा रओ?*" 24 पर जेबे एक तर्मी माणूं खरे ओर सई काम करना बन्द करी सकोआ, बल्कि दुष्टो रे जे सारे बुरे कामा खे करने लगोआ। तेबे से जिऊँदा नि रई सकदा। जितणे तर्मो रे काम तिने करी राखे, मां तिना बिचा ते कोई बी याद नि राखणे। इजी रे बजाये मां तेसखे तेसरे कित्ते रे बुरे कामा रिया बजा ते सजा देणी। से मां साथे परोसे जोगा नि रया, तेतेरिया बजा ते से मरी जाणा। 25 परमेशरे बोलेया, तेबे बी तुसे लोक बोलोए, "प्रभुए री चाल एक जेड़ी नि ए।" ओ इस्राएलो रे कराने, देख, क्या मेरी चाल एक जेड़ी नि ए? क्या तेरी चाल गल़त नि ए? 26 जेबे तर्मी आपणे तर्मो ते फिरी कि बुरे काम करने लगो, तेबे से तिना रिया बजा ते मरना, मतलब से आपणे बुरे कामो रिया बजा ते ई मरी जाणा। 27 फेर जेबे दुष्ट आपणे बुरे कामो ते फिरी कि, न्याय ओर तर्मो रे काम करने लगो, तेबे से आपणे प्राण बचाओगा। 28 से जो सोच बचार करी की आपणे सारे अपराधा ते फिरेया, इजी बजा ते नि मरना, जिऊँदा ई रणा। 29 तेबे बी इस्राएलो रे लोके बोलेया कि प्रभुए री चाल एक जेड़ी नि ए। ओ इस्राएलो रे कराने, क्या मेरी चाल एक जेड़ी निए? क्या तुसा री चाल गल़त नि? 30 प्रभु यहोवे री ये वाणी ए, "ओ इस्राएलो रे लोको, मा तुसा बिचा ते हर एक माणूंआ रा न्याय तेसरे चाल चलणो रे मुताबिक ई करना। पश्चाताप करो ओर आपणे सारे पापा खे छाडो, तेबे तुसा रा तर्म तुसा खे ठोकर खाणे री बजा नि ऊणा। 31 आपणे सारे पाप जो तुसे करी राखे, दूर करो; आपणा मन ओर आपणी आत्मा बदलो! ओ इस्राएलो रे लोको, तुसे कऊँ मरो?" 32 माखे खुशी नि ऊँदी जेबे केसी खे मरना पड़ोआ। आपणे पापा ते दूर ऊई जाओ ताकि तुसे जिऊँदे रओ। सर्वशक्तिमान यहोवे री ये ई वाणी ए।