1 परमेशरे माखे बोलेया, "ओ माणूंआ, जेबे मां तां साथे गल्ला करनिया तेबे तैं खड़े ऊई जाणा।"* 2 जिंयाँ ई तिने माखे एड़ा बोलेया, तिंयाँ ई परमेशरो री आत्मा मांदे समायी गी आऊँ पैरा पाँदे खड़ा करी ता ओर जो मां साथे गल्ला करो था, मैं तेसरी सुणी। 3 तिने माखे बोलेया, "ओ नाश करने वाल़े माणूंआ, आऊँ ताखे इस्राएलिया गे, मतलब बगावत करने वाल़ी जातिया गे पेजुँआ, जिने मेरे खलाफ बगावत करी राखी, तिना रे बुजुर्ग ओर सेयो बी आजो तक मेरे खलाफ पाप करदे आई रे। 4 एते पीढ़िया रे लोक जिना गे आऊँ यहोवा ताखे पेजुँआ, सेयो बेशर्म ओर टीठ ए।" 5 ओर जेबे तां तिना खे मेरिया गल्ला बताणिया तो ऊई सकोआ कि सेयो बगावत करने वाल़े लोक तिना खे सुणी लो या नि बी सुणी सकदे, पर तेबे बी तिना खे इतणा पता लगी जाणा कि आसा बीचे एक भविष्यबक्ता आई रा। 6 ओ माणूंआ, तैं तिना ते नि डरना, ओर ना तिना रिया गल्ला ते डरना। तिना बीचे रणा मतलब कांडे-चीट ओर चींआ बीचे रणे रे बराबर ए, पर तिना ते नि डरना। सेयो बगावत करने वाल़े लोक ए, पर तिना खे आपू पाँदे प्रबल नि ऊणे देणा। 7 इजी री खातर चाए सेयो सुणो या ना सुणो, तेबे बी तैं मेरिया गल्ला तिना गे बोलणिया, सेयो तो बड़े बिद्रोही ए। 8 पर ओ नाश करने वाल़े माणूंआ, जो आऊँ ताखे बोलूँआ, तूँ तेतेखे सुणी लो, तेस बिद्रोही कराने जेड़े तैं नि बणना, ओर एबे जो आऊँ ताखे देऊँआ, तेतेखे मूँ खोली की खाई लया।* 9 तेबे मैं नजर दित्ती ओर देखेया कि मेरी तरफा खे एक आथ बढ़ी रा ओर तिदे एक कताब ए। 10 परमेशरे से कताब मां सामणे खोली ती ओर से दोनो कनारे लिखी री थी ओर जो तिदे लिखी राखेया था, तिदे रोणे रे गाणे, कथा ओर चतौणिया रिया गल्ला थिया।*