1 मैं यहोवे री शक्ति आपू दे महसूस कित्ती ओर से माँदे आपणा आत्मा समायी की बारे लईगा ओर आऊँ तराईया बीचे खड़ा करी ता; से काअटी आड्डिया साथे परी री थी। 2 तेबे तिने आऊँ तिना आड्डिया रे चऊँ कनारे कुमाया ओर तराईया बीचे बऊत सारिया आड्डिया थिया ओर सेयो पूरी तरआ ते सूकी गिया थिया। 3 तेबे यहोवे मांते पूछेया, "ओ नाश ऊणे वाल़े माणूंआ, क्या यो आड्डिया जियूँदिया ऊई सकोईया?" मैं ज्वाब दित्तेया, "ओ मेरे परमेशर यहोवा तूँ ई जाणेया।" 4 तेबे यहोवे माखे फेर बोलेया, "इना आड्डिया खे भविष्यबाणी करी की बोल, ओ सूकी आड्डियो, यहोवे रा ये वचन सुणो। 5 परमेशर यहोवा तुसा आड्डिया खे ईंयाँ बोलोआ: देखो, मां आपू तुसा सबी दे आपणा साआ*37:5 साआ आत्मा पाणा, ओर तुसे फेर जिऊँदिया ऊई जाणिया। 6 मां तुसे लोक कट्ठे जोड़ने ओर तुसा पाँदे मास चढ़ाणा, ओर तुसे चामड़िया साथे टखणे। मां तुसा लोका दे साआ पाणा ओर तुसे जिऊँदे ऊई जाणे। तेबे तुसा खे पता लगी जाणा कि आऊँ ई यहोवा ए।"

7 एसा आज्ञा रे मुताबिक आऊँ भविष्यबाणी करने लगेया ओर आऊँ भविष्यबाणी करने ई लगी रा था कि एक आवाज आई ओर ईल्लण ऊआ ओर हर एकी शरीरो रिया आड्डिया कट्ठिया जुड़ी गिया ओर पूरे कंगाल़ बणीगिया। 8 आऊँ देखदा रया, कि तिना दे नसा पैदा ऊईया ओर मास चढ़ेया ओर सेयो पाँदा ते चामड़िया साथे टखी गिया; पर तिना रे कोई साआ नि था। 9 तेबे तिने माखे बोलेया, "ओ नाश ऊणे वाल़े माणूंआ, साओ ते भविष्यबाणी कर ओर साओ ते भविष्यबाणी करी की बोल, ओ साआ, परमेशर यहोवा ईंयाँ बोलोआ कि चारो दिशा ते आई की जो यो काई राखे इना दे समायी जा ताकि यो जिऊँदे ऊई जाओ।" 10 परमेशरो री एसा आज्ञा रे मुताबिक मैं भविष्यबाणी कित्ती, तेबे तिना रे साआ आई गा ओर सेयो जिऊँदे ऊई की आपणे-आपणे पैरो पाँदे खड़िया ऊईगिया ओर एक बऊत बड़ी सेना ऊई गी। 11 तेबे यहोवे माखे बोलेया, "ओ नाश ऊणे वाल़े माणूंआ, यो आड्डिया इस्राएलो रे सारे कराने री उपमा ए। सेयो बोलोए, म्हारी आड्डिया सूकी गिया ओर म्हारी उम्मीद टूटी गी, आसे पूरी तरअ ते टूटी चुके रे।" 12 इजी बजा ते भविष्यबाणी करी की तिना खे बोल, "परमेशर यहोवा ईंयाँ बोलोआ: ओ मेरी प्रजा रे लोको, देखो, मां तुसा रिया कब्रा खोली की तुसे तिना बीचा ते काडणे ओर इस्राएलो रे देशो रे पऊँचाई देणे।*37:12 यशा. 26:19 13 इजी री खातर जेबे आऊँ तुसा रिया कब्रा खोलूँ ओर तुसा खे तिना ते निकयाल़ूँ, तेबे ओ मेरी प्रजा रे लोको, तुसा खे पता लगी जाणा कि आऊँ यहोवा ए। 14 मां तुसा दे आपणा साआ देणा ओर तुसे जियूणे ओर तुसे तुसा रे आपणे देशो रे बसाणे; तेबे तुसा खे पता लगी जाणा कि मैं यहोवे ई ये बोली राखेया ओर करी बी राखेया, यहोवे री येई बाणी ए।"*37:14 यहे. 36:27

15 फेर यहोवे रा ये सन्देश माखे मिलेया, 16 "ओ नाश ऊणे वाल़े माणूंआ, लकड़िया रा एक टुकड़ा लई की तेते पाँदे लिख, ये यहूदा ओर इस्राएलो रे सबी गोत्रा री अगुआई करोआ। ओर तेबे दूजी लकड़ी लई की तेते पाँदे लिख, ये यूसुफो री मतलब एप्रैमो री ओर इस्राएलो रे सबी गोत्रा री अगुआई करोआ।" 17 तेबे तिना लकड़िया खे एकी-दूजिया साथे जोड़ी की एक ई बणाई दे, ताकि सेयो तेरे आथो रे एक ई लकड़ी बणी जाओ। 18 जेबे तेरे लोक तांते पूछो, क्या तां आसा गे नि बताणा कि इना ते तेरा क्या मतलब ए? 19 तेबे तिना खे बोलणा, "परमेशर यहोवा ईंयाँ बोलोआ: मेरे आथो दे जो ये यूसुफो री लकड़िया रा टुकड़ा ए, से इस्राएल ओर इस्राएलो रे सबी गोत्रा रा नशाण ए। मां ये यहूदा*37:19 यहूदा एप्रैम रे नशाण वाल़ी लकड़िया रे टुकड़े ते जोड़ी की तेसरे आथो दे एक लकड़िया रा टुकड़ा बणने लगी रा। 20 जिना लकड़िया पाँदे तां एड़ा लिखणा, सेयो तिना सामणे तेरे आथो रे रओ।" 21 तेबे तूँ तिना लोका खे बोल, परमेशर यहोवा ईंयाँ बोलोआ, "देखो, मां इस्राएली तिना जातिया बीचा ते लई की जिना बीचे सेयो चली गे रे, चऊँ कनारो ते कट्ठे करने ओर सेयो तिना रे आपणे देशो रे पऊँचाणे। 22 मां सेयो तिना रे देशो रे, मतलब इस्राएलो रे पाह्ड़ो रे एक ई जाति करी देणी; ओर तिना सबी रा एक ई राजा ऊणा ओर सेयो फेर दो नि रणे ओर ना ई फेर दूई राज्या दे बटणे। 23 इस्राएलिया फेर आपू खे आपणी मूर्तिया, घिनौने काम या आपणे केसी बी पापो रे जरीये अशुद्ध नि करना, पर मां सेयो तिना सबी बस्तिया दे, जेती सेयो पाप करो थे, निकयाल़ी की शुद्ध करने ओर छुड़ाणे ओर सेयो मेरी प्रजा ऊणे ओर आऊँ तिना रा परमेशर ऊणा।"*37:23 यहे. 36:25

24 मेरे दास दाऊदो जेड़ा राजा तिना रा राजा ऊणा ओर तिना सबी रा एक ई ग्वाल़ा ऊणा। सेयो मेरे नियमो पाँदे चलणे ओर मेरी बिधिया मानी की तिना रे मुताबिक चलणे।*37:24 यहे. 34:23 25 सेयो तेस देशो रे रणे, जो मैं आपणे दास याकूबो खे दित्तेया था ओर जेती तुसा रे बुजुर्ग रओ थे, तिदे ई सेयो ओर तिना रे माठे-पोते सदा बसे दे रणे ओर मेरे दास दाऊदो जेड़ा राजा सदा तिना रा परदान रणा। 26 मां इस्राएलो रे लोका साथे शान्तिया री वाचा बानणी; से सदा री वाचा ठईरनी ओर मां तिना खे जगा देई की गिणतिया दे बढ़ाणे ओर तिना बीचे आपणी पवित्र जगा सदा बणाई की राखणी।*37:26 पज. 89:3,4 27 मां तेती तिना बीचे रणा, आऊँ तिना रा परमेशर ऊणा, ओर सेयो मेरी प्रजा ऊणे।*37:27 प्रका. 21:3 28 जेबे मेरा मन्दर तिना बीचे सदा खे रणा, तेबे सबी दूजे देशा रिया जातिया खे पता लगी जाणा कि आऊँ यहोवा इस्राएलो खे पवित्र करने वाल़ा ए।