Isaías 40

परमेशरेरे लोकन शान्ति

1 ई भी यशायाह नेबेरी नबूवत आहे, तुश्शो यहोवा एन ज़ोते, "मेरे लोकन शान्ति देथ, शान्ति देथ!✝40:1 भज. 85:8;2 कुरि. 1:4. 2 यरूशलेमे सेइं शैन्तरी गल्‍लां ज़ोथ; ते तैस सेइं ज़ोरे सेइं ज़ोथ कि तेरी सखत सेवा पूरी भोवरीए, यहोवारे हथ्थे सेइं तीं अपने सेभी पापां केरि दुगनी सज़ाह मैल्ही जेवरीए, हुनी परमेशरे तेरे अधर्म माफ़ किये।"

3 केन्चेरी आवाज़ शुनोने लगोरीए, "सुनसान ठैरी मां यहोवारी बत तियार केरा, इश्शे परमेशरेरे लेई अराबा मां अक सड़क सिद्धी केरा।✝40:3 मत. 3:3;मरक. 1:3;यूह. 1:23. 4 हर अक वादी भरी गाली, ते हर अक पहाड़ ते पहाड़ी बिछ़ोड़ी गाली; ज़ैन टारूए तैन सिद्धु कियूं गालू ते ज़ैन उन्ढू उबरूए तैन पट्ठू कियूं गालू। 5 तैखन यहोवारी महिमा बांदी भोल्ही, ते सब लोक तैस साथी लाहेले; किजोकि यहोवाए एप्पु एन्च़रे ज़ोवरूए।"✝40:5 भज. 72:19;लूक. 3:6.

6 ज़ोने बालेरी आवाज़ शुनोई, "प्रचार केर!" मीं पुछ़ू, "अवं कुन प्रचार केरीं?" सारे मैन्हु घासेरे ज़ेरेन, तैन केरि शोभा मैइदानेरे फूड़ोंवेरी ज़ेरिए। 7 ज़ैखन यहोवारी सांस तैस पुड़ च़लतीए, तैखन घास शुक्‍की गाते, ते फूड़ोंव भी शुक्‍की गाते; इस मां कोई शक नईं लोक घासेरे ज़ेरेन।✝40:7 याक. 1:10-11. 8 घास त शुक्‍की गाते, ते फूड़ोंव शुक्‍की गाते, पन इश्शे परमेशरेरू वचन हमेशा अटल रालू।✝40:8 1 पत. 1:24-25.

9 हे सिय्योने*40:9 सिय्योने यरूशलेम ते सिय्योन एक्‍की नगरेरू नवं आहे। खुशखबरी शुनाने बाली, उच्‍चे पहाड़े पुड़ च़ैढ़ी गा; हे यरूशलेमे खुशखबरी शुनाने बाली, बड़े उच्‍ची आवाज़ी सेइं शुना, उच्‍ची आवाज़ी सेइं शुना, डेरां न; यहूदारे नगरन सेइं ज़ो, "अपने परमेशरे हेरा!"✝40:9 यशा. 52:7-8. 10 हेरा, प्रभु यहोवा अपनि शक्ति हिरातो एज्जी राहोरोए, तै अपने शेक्ति सेइं हुकूमत केरेलो; हेरा, ज़ै मज़दूरी देनेरे लेई आहे तै तैस्से कांए ते ज़ै बदलो देनेरोए तै तैस्सेरे हथ्थे मांए।✝40:10 प्रका. 22:7-12. 11 तै पुहालेरी ज़ेरि अपनि कन्नी च़ारेलो, तै भैड्डां केरां गबड़ां अपने कुम्मे मां रखते ते दुद्ध पियाने बैली भैड्डन बल्हे-बल्हे च़लालो।✝40:11 यहे. 34:23;मीक. 5:4.

इस्राएलेरो शक्तिशाली परमेशर

12 केनि समुन्दर आँज़ले सेइं नापोरोए ते केनि आसमान ढ्लिठे सेइं नापोरूए ते केनि ज़मीनरी मित्ती हेटी सेइं नापोरीए ते पहाड़ पहैड़ी ट्लेकड़ी मां तुलोरूए? 13 ते केनि यहोवा बत हिरेवरीए या तैसेरो सलाहकार बेनतां तैस ज्ञान शिखालोरूए? 14 यहोवा कैस सेइं सलाह कियोरीए ते केनि तैस न्यायेरी बत हिरेवरीए तै कौन थियो ज़ैनी तैस ज्ञान हिरेवरूए ते अक्लरी बत हिरेवरीए? 15 हेरा, कौमां घड़ेरे एक्‍की तेप्पेरी ज़ेरिन या ट्लेकड़रे धूड़रे बराबरन, ते तै जज़ीरन धूड़रे सिक्‍कां केरे ज़ेरे उडारते। 16 लबानोनेरी सारी लकड़ी ते सारे जानबर परमेशरे जो होमबलि देनेरे लेई पूरे न भोल्हे। 17 सैरी कौमां तैसेरे लेई किछ भी नईं, ते तैसेरे नज़री मां कोई कीमत नईं।

18 तुस परमेशरे केसेरे बराबर ज़ोले ते तैसेरी मसाल कोस चीज़ी सेइं देले? 19 कारीगिर मूरती बनाते, ते सुनार तैन सोन्नू लाते ते चैंदरी जंजीरी तैसारे लेई बनाते। 20 कंगाल मैन्हु ज़ै एत्री च़ढ़तल न च़ैढ़ी सखे, तै एरी लकड़ी च़ुनते ज़ै कधे न शड़े, तै एरे कारीगिरे तोपते ज़ै एरी मूरती बनेई सखे ज़ै अपने जगारे न हिल्‍ले।

21 कुन तुसां न ज़ानथ? कुन तुसेईं नईं शुनोरू? कुन तुसन शुरू करां ऐह गल नईं ज़ोवरी? कुन दुनिया बनानेरे वक्ते करां विचार न कियो? 22 ई तैए कुल दुनियाई करां बहा उच्‍चे तखते पुड़ बिशोरोए; ज़ैट्ठां दुनियारे मैन्हु टिट्टां केरे ज़ेरे लगतन; ज़ै आसमाने मलमलेरे ज़ेरे फैलाते, ते एन्च़रे खिलारते ज़ेन्च़रे रानेरे लेई तेम्बु लातन; 23 परमेशर ज़ै बड़े-बड़े हाकिमन घटिया बनाते ते अधिकारी लोकन नाचीज़ बनाते।

24 तैना मसां रूहोरे थिये, तैना मसां बेवरे थिये, मसां तैन केरे ढिक्‍के ज़ीलां ज़मीनी मां छ़डोरां थियां, कि तैन पुड़ हवा च़ली ते तैना शुक्‍की जे; बाते तैना भूंसेरे ज़ेरे उडारे।

25 पवित्र परमेशर पुछ़ते, "तुस मीं केसेरे ज़ेरे ज़ोले कि अवं तैसेरो ज़ेरो भोईं?" 26 एपनी एछ़्छ़ी खोलतां तक्‍का, केनी एन सब बनेवरूए? तै एन तारन गेनतां कढते; तैन सेभी केरू नवं ज़ोई-ज़ोइतां कुजाते? तै एरहो सामर्थी ते ताकतबरे ते तैन मरां कोई भी एजने बगैर न राए।

27 हे याकूब, तू किजो ज़ोतस, हे इस्राएल तू किजो ज़ोतस, "मेरी बत यहोवा करां छ़पोरीए, मेरे परमेशरे मेरे न्यायेरी कोई फिक्र न केरे?" 28 कुन तुस न ज़ानथ? कुन तुसेईं नईं शुनोरू? यहोवा ज़ै सच़्च़ो परमेशरे ते सारी धरती बनानेबालोए, तै न थके, ते तैसेरे समझ़रे गहराई तगर कोई न पुज़्ज़ी सके। 29 तै थकोरे ताकत देते ते कमज़ोरे शक्ति देते। 30 नौजुवान भी थेकी गातन ते रेई गातन ते जुवान ठोकर खेइतां बिछ़ड़ी गातन; 31 पन ज़ैना यहोवा बलगतन; तैना नंव्वी ताकत हासिल केरते गाते, तैना उकाबा केरे ज़ेरे उडरेले, तैना दौड़ेले ते थकेले न, च़लेले ते थकावट मैसूस न केरेले।