Ezequiel 39

1 «Koo manjinke belto, Googi’ni raaga raagi hitatto qici: ‹Dada Duuchchik Duuchchi Woddik Gootti: Koo Meesheekikenna Tubbalike umo akeekisanjo koo Googi; ani ate’ni qophphi hiyye ke’ennen. 2 Ate’e udumi’a hiisannon; iittanni middi darree’n bayyii’n harkisa’ni idage Isira’eelixxe iimixxe koobabaa atee shorrannon. 3 Bita’ixxe anga atixxe’ni hexxeexxa gabe angii’ni ganannon; middixxe anga’ni abiddeteka mogiduwwa ibisannon. 4 Atinna loliink atik manni duuchchi, atinni welti hedhemmak gosa gosak ardiir Isira’eelixxe kooba’ni mundaan. Allaattuwwanna biniichuwwi ha’noo itaashsha sa’isse uwwannon. 5 Atinna ba’linake’n rertatton: tenne haaso’ennekinna anten hiyya’neen lumok Duuchchi Woddik Gootti. 6 Maagoginna soda’a mittebelo abbayyati qarqara’ni hedha’nekeera’ni giira worannon; insa’nenna ani Duuchchi Woddike Gootta kadennexxa egennaan.

7 « ‹Woyyichchi anki summi arda anke Isira’eeli’ni ege’nemaashsha assannon; Ta’inni udumi’a woyyichchi anki summi cee’memo’anna, diqqaatemo’a hasabe’non; gosa gosak ardinna ani Duuchchi Woddik Gootta Isira’elike woyyichcha kadennexxa ege’naan. 8 Yoona tinni yaanuwwa daggaan; dhugandinni muuxxendaan; hiyya’nen lumok Duuchchi Woddik Gootti; iitti hiyyennaxxi barra tenneten.

9 « ‹Ookko’ninna Isira’eelike qachcha’ni hedha’neer duuchchi dageexxi lolinka imaana ifika, lumollamanna shishiixaramma wonte, gabuwwa, mogiduwwa, lollinxa siqqonna bagedo bukki asse’naan; torbaane wogga’anna haqqete la’onffantaan. 10 Insa’ne loliinka ifika imaanuwwa giidhinammaxxee; woldeennatenaa’n haqqe qocanna gongomakenaa’ni haqichcho kadhdha insa’ne’a hasisaabaan. Insa’ne mulqemmakeeranaa’n insa’nenna mulqe’naan; insa’nee booji’emmakeeranaa’ninna insa’nenna boojinaan: tenne haaso’ek Duuchchi Woddike Goottan.

11 « ‹Eettene barra’ni ardi dhidhimii darree’ni abbaayyatiba’a me’inammaxxe dhooqaba, Googi’a mooginka booncho Isira’eeli’ni uwwannon. Googinna isik sannachchuwwi duuchchi ookkonni moogemammaxxe ora cunfee’naa me’ammaki manni sa’aba gophaan; Tennexxee eettene bakka Hamon Googixxe*39:11 Hamon Googi hiyyo Googike sannachcha hiyyoten. dhooqa hiyyennan.

12 « ‹Boga qullo fulchate’e Isira’eelik ardi torbaane agenjo duuchcha insa’neka rensha moongaan. 13 Bogi giddik ardi duuchchi rensha moogaan; ani ulfatannoxxa yanna insa’ne hedemmaaxxe barra kaddaan; tenne haaso’ek lumoke Duuchchi Woddike Goottan.

14 « ‹Boga qullossatee gateeka renshuwwa barra barra’n hasakaaranna moogaa manna dhaanbaan. Torbaane agenji udumanna moogemebaak gateekaara qullesatee hasitto ke’naan. 15 Kunni manni hasito ma’a wodda manjiinka rensha afoole moogaki manni dageexxi Hamon Googixxe dhooqa’n moogaa qico’n renshii qarqara beesissa ugginaan. 16 Ookkonna Haamo hiyyemaak qachchi hedhaan; konne qicinin boganna qulleensinaan.›

17 «Koo manjinke belto; Dada Duuchchk Duuchchi Woddik Gootti hiyya’nee qici: Gargar hexxeexxe ci’anna biniincha duuchcha ye’i: ‹konnechchuwwanna erqe kayyii’ni bukki hitineexxi ani ha’no’a qixxeessannoke tolchibaa amme; tinninna Isira’eelixxe kooba’ni kadaake lumoke tolchan. Ookkone maala ittinaan; mundetanna ha’witinaan.✝39:17 Wal. 19:17-18. 18 Gedhebinke korbeessika gedhebinke buruusika; re’etike korbesika kormika, maala indammashsha jajaba mannika maala iitinaan; buttatike ja’labuwwixxa mundenna ha’witinaan; insa’ne duuchchi ha’yeeke Baasanike horishshaten. 19 Ani qopheessannoke tolcha’ni ha’yotanna godditinaxe’e ittinan: machootinaa qico’n mundetanna ha’witinaan. 20 Anxe qore’ni fadhadokanna fadhado qolchammakaara, jajjabba hunnameessa mannanna gosa gosanaa’ni filemeeka lolinka manna godditinaaxee ittinaan› Tenne haaso’ek lumoke Duuchchi Woddike Goottan.

21 «Ulfinna anka gosa gosake ardi giddo leellishannon: gosa gosak ardi duuchchinna insa’ne’ni geessisenneka xixichchonna insa’ne’ni hunnameette anxe anganni hitta murannoxxa uundaan. 22 Eettene yannanaa’ni Isira’eelik ardi ani Duuchchi Woddike Gootta insa’neke Mageno kadennexxa egennaan. 23 Gosa gosak ardi Isira’eelik ardinna hujemmaxxe cubbonaa’ni kexxeexxa ane’ni addatema gophexxi shorremeexxa egennaan; Tennexxee aninna insa’ne’n duduro sho’edhenne; aninna naapha insa’negee sa’isse uwwennen; duuchchingi wolaantichchake’n munde. 24 Aninna battumma insa’nexxishshanninna cubbo insa’nexxishshanni murennen; dudurokanna insa’ne’n wirri hiyyenne.

25 «Tennexxee Dada Duuchchk Duuchchi Woddik Gootti hiyya’nee qici, Ya’iqoobixxa horte ta’a shorremmebaa’n hiissannon: Isira’eelik ardi duuchchi’a mararannon; woyyichcha anke summixxe hinaafanno. 26 Mitti insa’ne sodaachchisaachchi hedhebangi boga insa’neke’ni nage’iki he’naa wodda, salphinne insa’nekanna ane’ni addatema gophati he’neeka baro deenaani. 27 Gosa gosake ardike boganaa’ni insa’nee hiisse idaganno wodda, naaphuwwa insa’nekike boganaa’ni bukki assannoxxa yanna anxa woyyummanna insa’ne darree’ni heddo gosa gosake ardi edo leellishannon. 28 Gosa gosake ardi giddo shorremashsha assonnolenna, mittikinna gantebang ifike bogiba’a insa’ne’e hiissannon; Ookko’ninna ani Duuchchi Woddike Gootta insa’neeke Mageno kadennexxa egennaan. 29 Ta’inni udumi’a duduro insa’ne’n wirri hiyyabo’non; Hafuura ankanna Isira’eelike arda’n wonshannon; tenne haaso’ek lumoke Duuchchi Woddike Goottan» hiyye.