1 ଆମୋସତେ ମାର୍‌ ଯିଶାଇୟତେ ଦର୍ଶନ, ଅଣ୍ଡ୍‌ ଯିହୁଦା ରାଜାନଡ଼୍‌ ଉଷିୟ, ଯୋଥମ୍‌, ଆହସ୍‌ ନୁ ହିଜକୀୟତେ ଅଦିକାର ସମୟ୍‌ତେ ଯିହୁଦା ନୁ ଯିରୂଶାଲମ୍‌ ବିଷୟତେ ଇଦ୍‌ ଦର୍ଶନ ପାହେମ୍‌ ଆତ୍‌ତଣ୍ଡ୍‌।

2 ହୋ ମାବ୍‌ ମୟଲ୍‌, କେଞ୍ଜା, ହୋ ପୃତିବି, କେୱୁତାରେ, ବାତେଙ୍କ୍‌ଇତ୍କେ ସଦାପ୍ରବୁ କେସ୍‌ମିନ୍ଦେଣ୍ଡ୍‌; "ମାମ୍‌ ପିଲାକିଙ୍କ୍‌ ପଡ଼୍‌ପିମିନ୍ଦେମ୍‌ , ମାତର୍‌ ଅଡ଼୍‌ ମାନାଙ୍କ୍‌ ରାମ୍‌କ୍‌ ମାଡ଼ମିନ୍ଦେଡ଼୍‌।" 3 ଗଡ୍‌ ତାନ୍‌ ମାଲିକ୍‌ତିଙ୍କ୍‌ ପୁନ୍ଦ୍‌ତେ ନୁ ଗଦ ନିଜର ମାଲିକ୍‌ତେ ଓଡେ କୁଣ୍ଡେତିଙ୍କ୍‌ ପୁନ୍ଦେ, ମାତର୍‌ ଇସ୍ରାଏଲ୍‌ତେ ନାରୁଡ଼୍‌ ପୁନଡ଼୍‌ ନୁ ହେର୍କେ ମାଡ଼୍‌ଡ଼, ମା ନାରୁଡ଼୍‌ ବୁଜେମ୍‌ ଆୟଡ଼୍‌। 4 ହୋ ପାପିତେ ପିଲୁଡ଼୍‌, ଅଦର୍ମତାଗ୍‌ ମାନ୍ଦାନ୍‌ ନାରୁଡ଼୍‌, ବେବିଚାର୍‌ ନାରୁଡ଼୍‌ତେ ପିଲୁଡ଼୍‌, ପାଦ୍ରାପିଲାକି ! ଅଡ଼୍‌ ସଦାପ୍ରବୁଙ୍କ୍‌ ୱିଡ଼୍‌ସି ମିନ୍ଦେଡ଼୍‌, ଅଡ଼୍‌ ଇସ୍ରାଏଲ୍‌ତେ ଦର୍ମଲେକାମ୍‌ ମାନେମ୍‌ ଆୟିୱେ ମିନ୍ଦେଡ଼୍‌, ଅଡ଼୍‌ ମାଲ୍‌ସ୍‌ ପେର୍କେ ଆଞ୍ଜମିନ୍ଦେଡ଼୍‌। 5 ମିଡ଼୍‌ ଅଦିକ୍‌ ଅଦିକ୍‌ ରାମକ୍‌ ମାଡ଼ାନଙ୍କ୍ ବାତ୍‌ତିଙ୍କ୍‌ ମେଣ୍ଡେ ଦେବ୍‌ତିଞ୍ଜ ମିନ୍ଦେଡ଼ି ? ତାଲେତାଗ୍‌ ପୁଣ୍ଡ୍‌କ୍‌ ନୁ ସାରେ ହୃଦୟ ଦୁର୍ବଲ୍‌ ଆସ୍‌ମିନ୍ଦେ। 6 ଡେକେତ୍‌ ମଦଲ୍‌କଞ୍ଜ୍‌ ତାଲେତାଗ୍‌ ହେୱୁନା ବାତେ ସୁସ୍ଥଇଲେ; ମାତର୍‌ ପୁଣ୍ଡ୍‌କ୍‌ ନୁ ଦାଗ ନୁ କୁଲୁମ୍‌ ନିଣ୍ଡିତେ, ଦାଗ ନୁ ସାରେ ମେନ୍ଦୁଲ୍‌ ପୁଣ୍ଡ୍‌କ୍‌; ଇ ସାରେ ନର୍‌ସ୍‌ କି ତହଃସ ଆୟ, କି ନିୟ୍‌ ତଡ଼୍‌ ମାପଇଲେଡ଼ି। 7 ମିୟାଦ୍‌ ଦେଶ୍‌ ଦଂସପଡ଼ିୟେ; ମିୟାୱୁ ନଗର୍‌ସାରେ କିସ୍‌ତଡ଼୍‌ କାର୍‌ୱତା; ମିୟାୱୁ ବୁମ୍‌ ବିଦେଶିନଡ଼୍‌ ମିଇପାକେ ଦଂସ ମାଡ଼୍‌ତଡ଼୍‌, ଆଦ୍‌ ବିଦେଶିନଡ଼୍‌ତେ ଦଂସ ଆଦାନ୍‌ ଲେକାମ୍‌ ଦଂସପଡ଼ିୟେ ଆସ୍‌ମିନ୍ଦେ। 8 ମେଣ୍ଡେ, ସିୟୋନତେ ପିକି ଅଙ୍ଗୁର୍‌ୱାୟେ, ୱେଃକୁକ୍‌ ୱାୟେତେ ଗୁଡ଼ୁସା, ଗେରାମାଡ଼ିମାନ୍ଦାନ୍‌ ନଗର୍‌ ଲେକାମ୍‌ ଆସ୍‌ମିନ୍ଦେ। 9 ସାରେତିଙ୍କ୍‌ ଆନ୍‌ ବେଡ଼ିୟେ ସଦାପ୍ରବୁ ମାନ୍‌ସେଙ୍ଗେ ଅଦିକ୍‌ ସୁକୁକ୍‌ ନାରୁଡ଼୍‌କ୍‌ ନେଃସ୍‌ ମାନ୍‌ୱେ ମାତ୍‌ତଣ୍ଡ୍‌, ମାନାଡ଼୍‌ ସଦୋମ୍‌ତେ ଲେକାମ୍‌ ଆୟେଡ଼୍‌, ମାନାଡ଼୍‌ ହମୋରାତେ ଲେକାମ୍‌ ଆୟେଡ଼୍‌। 10 ହୋ ସଦୋମ୍‌ତେ ଶାସନକର୍ତ୍ତାନଡ଼ି, ସଦାପ୍ରବୁନ୍‌ ବାକ୍ୟ କେଞ୍ଜାଟ୍‌, ହୋ ହମୋରାତେ ନାରିନଡ଼ି, ମିଡ଼୍‌ ପରମେଶ୍ୱର୍‌ତେ ନିୟମ୍‌ତାଗ୍‌ କେୱୁ ତାରାଟ୍‌। 11 ସଦାପ୍ରବୁ କେତିତଣ୍ଡ୍‌, "ମାନାଡ଼୍‌ ପାକେଙ୍କ୍‌ ମିଇ ନାର୍ଗେ ବଲିଦାନ୍‌ତେ ଇତ୍କେ ବାତେ ?" "ମାମେ ମେଣ୍ଢାକିନ୍‌ ହୋମବଲିତେ ନୁ ମେନ୍ଦୁଲ୍‌ତେ ପଶୁକିନ୍‌ କଡ଼୍‌ୱେସ୍‌ ନିଣ୍ଡିଆସ୍‌ ମିନ୍ଦେ; ମେଣ୍ଡେ, କନ୍ଦେ କି ମେଣ୍ଢା କି ମେଣ୍ଢେପିଲେକିନ୍‌ ନେତୁର୍‌ତେ ମାମେ ୱେଡ଼୍‌କେ ଆୟିମ୍‌। 12 ମିଡ଼୍‌ ମା ମୁନେ ହେୱ୍‌ଦାନ୍‌ ୱେଲେ ମା ଦୁୱାଡ଼୍‌ତାଗ୍‌ ଡେକେତ୍‌ ମଦଲ୍‌ ନକାନ୍‌ ସେଙ୍ଗେ ବେନ ମିୟାଗାଙ୍କ୍‌ ଇଚ୍ଛା ମାଡ଼ୁତଣ୍ଡ୍‌ ? 13 ଅସାର୍‌ତେ ନିୟ୍‌ ମେଣ୍ଡେ ତାଡ଼୍‌ମାଟ୍‌; ଦୁପାମ୍‌ ଇଦାନାଦ୍‌ ମାମେ ପାସ୍‌କିତମ୍‌ ; ମାୟାଦ୍‌ ଆମାସ୍‌ତେ ନୁ ରମାନ୍‌ ଦିନେତ୍‌, ମିଟିଙ୍କ୍‌ତେ କେତାନ୍‌ ଇଦ୍‌ ଅଦର୍ମ ନୁ ବେଡ଼ିୟେ ମିଟିଙ୍କ୍‌ ମାମେ ସହେମ୍‌ ଆଦେ ପାର୍‌ୱମ୍‌। 14 ମାୟାଦ୍‌ ଜୀୱେ ମିୟାଦ୍‌ ଆମାସ୍‌ତେ ନୁ ତିଆର୍‌ ଆତ୍‌ତେ ପାଣ୍ଡମ୍‌କିଙ୍କ୍‌ ସାରେ ପାସ୍‌କି ତମ୍‌; ଆୱୁସାରେ ମା ପାକେ ତିପାଲ୍‌ତାୱୁ; ମାମେ ଆୱୁସାରେ ମାଡ଼ାନଙ୍କ୍‌ ଆୟିଦ୍‌ତମ୍‌। 15 ମେଣ୍ଡେ, ମିଡ଼୍‌ ମିୟାୱୁ କାଇକ୍‌ ଆତାନ୍‌ ୱେଲେ ମାମେ ମିୟାଗାଙ୍କ୍‌ ମାୟାଦ୍‌ କଣ୍ଡା ମୁସିତମ୍‌; ମେଣ୍ଡେ, ମିଡ଼୍‌ ନାର୍ଗେ ପ୍ରାତନା ମାଡ଼ାନ୍‌ ୱେଲେ ମାମେ କେଞ୍ଜମ୍‌। ମିୟାୱୁ କାଇକ୍‌ ନେତୁର୍‌ତେ ନିଣ୍ଡିମିନ୍ଦେ। 16 ମିଡ଼୍‌ ନିଜେତିଙ୍କ୍‌ ନର୍‌ମୁଟ୍‌, ନିଜେତିଙ୍କ୍‌ ପବିତ୍ର ମାଡ଼ାଟ୍‌; ମା କଣ୍ଡେତାଗାଙ୍କ୍‌ ନିଜେତାୱୁ ମାଡ଼ିମାନ୍ଦାନ୍‌ କାରାପ୍‌ କାମ୍‌ ଦୁର୍‌ ମାଡ଼ାଟ୍‌; ମୁନେ କାରାପ୍‌ କାମ୍‌ ମାଡ଼ାନାଦ୍‌ ୱିଡ଼୍‌ସାଟ୍‌ ; 17 ସାୟେତ୍‌ କାମ୍‌ ମାଡ଼ାନଙ୍କ୍‌ ନାଡ଼୍‌ସାଟ୍‌; ସାୟେତ୍‌ ବିଚାର୍‌ ମାଡ଼ାଟ୍‌, ଅବାବ୍‌ତେ ମାନ୍ଦାନଡ଼୍‌କିଙ୍କ୍‌ ସାହାଯ୍ୟ ମାଡ଼ାଟ୍‌, ମୁନେଙ୍କ୍‌ତଡ଼୍‌କିଙ୍କ୍‌ ନ୍ୟାୟ ବିଚାର୍‌ ମାଡ଼ାଟ୍‌, ରାଣ୍ଡିକିନ୍‌ ପାକେ ନିଲ୍‌ମୁଟ୍‌।" 18 ସଦାପ୍ରବୁ କେତିତଣ୍ଡ୍‌, ୱାଡ଼ାଟ୍‌, ମାନାଡ଼୍‌ ଉତ୍ତର୍‌ ସାରେତାୱିନାୱୁ ଇଦିକାଡ଼୍‌; ମିୟାୱ ଅପରାଦ୍‌ ସାରେ ସିନ୍ଦୁର୍‌ରଙ୍ଗ୍‌ ଲେକାମ୍‌ ଆତ୍‌କେ କେ ବରପ୍‌ଲେକାମ୍‌ ପାଣ୍ଡ୍ରି କଲର୍‌ ଆଦ୍‌ତେ; ଆୱୁସାରେ କେସ୍ରରଙ୍ଗ୍‌ ଲେକାମ୍‌ ରଙ୍ଗ୍‌ ଆତ୍‌କେ କେ ମେଣ୍ଢେତେ କେଲେକ୍‌ ଲେକାମ୍‌ ଆଦ୍‌ତେ। 19 ଯଦି ମିଡ଼୍‌ ତିଆର୍‌ ନୁ ନିୟମ୍‌ ମାନେମ୍‌ ଆଦ୍‌ତିଡ଼୍‌, ଆଲେକେ ଦେଶ୍‌ତେ ଲେକେତ୍‌ କାୟା ପାହେମ୍‌ ଆଦ୍‌ତିଡ଼୍‌। 20 ମାତର୍‌ ଯଦି ମିଡ଼୍‌ ତିଆର୍‌ ଆୟ୍‌ୱିଡ଼୍‌ ନୁ ବିରୁଦ୍ଦ୍‌ତେନଡ଼୍‌ ଆଦ୍‌ତିଡ଼୍‌, ଆଲେକେ ଚୁର୍‌ତଡ଼୍‌ ତିପାଲ୍‌ ଆଦ୍‌ତିଡ଼୍‌; ବାତେଇତ୍କେ ସଦାପ୍ରବୁ ଇଦ୍‌ କେସ୍‌ମିନ୍ଦେଣ୍ଡ୍‌।

21 ବିଶ୍ୱାସ୍‌ତେ ମାନ୍ଦାନ୍‌ ନଗର୍‌ ବେଲାନ୍‌ ଦାରି ଆସ୍‌ମିନ୍ଦେ ! ଆଦ୍‌ ନ୍ୟାୟବିଚାର୍‌ତେ ନିଣ୍ଡି ମାତ୍‌ତେ। ଦର୍ମ ଆଗେମିକା ବାସେ ମାଡ଼୍‌ତେ, ମାତର୍‌ ଇଞ୍ଜେ ଆୱୁକାନଡ଼୍‌ ମିନ୍ଦେଡ଼୍‌। 22 ମିଇ ରୂପା କାର୍କେ ପୟିସ୍‌ମିନ୍ଦେ, ମିୟାଦ୍‌ ଅଙ୍ଗୁର୍‌କାଲ୍‌ ଏର୍‌କାଇଲି ମିନ୍ଦେ। 23 ମିଇ ଅଦିପତିନଡ଼୍‌ ରାମ୍‌କିନଡ଼୍‌ ନୁ ଡଙ୍ଗାଲ୍‌ନଡ଼୍‌ ତଡ଼ଦେନଡ଼୍‌; ସାରେତଡ଼୍‌ ଲାଞ୍ଚ୍‌ତିଙ୍କ୍‌ ବଲ୍‌ ପାହେମ୍‌ ଆଦ୍‌ତଡ଼୍‌ ନୁ ପାରିତୋଷିନଡ଼୍‌ ପେର୍କେତଡ଼୍‌ ଆଦ୍‌ତଡ଼୍‌; ଅଡ଼୍‌ ବାବାଲ୍‌ ଇଲ୍‌ୱେନଡ଼କ୍‌ ବିଚାର୍‌ ମାଡ଼ଡ଼୍‌, କିଅବା ରାଣ୍ଡିମୁତେନ୍‌ ଅନୁରଦ୍‌ ଅଡ଼୍‌ପାକେ ୱାଡ଼ଡ଼୍‌। 24 ଆଦିନ୍‌ ସେଙ୍ଗେ ପ୍ରବୁ, ସାରେତିଙ୍କ୍‌ ବେଡ଼ିୟେ ସଦାପ୍ରବୁ, ଇସ୍ରାଏଲ୍‌ତେ ଶକ୍ତିଦାତାଙ୍କ୍‌ କେତିତଣ୍ଡ୍‌, କେଞ୍ଜାଟ୍‌, ମାମେ ନିଜେତ୍‌ ଆପାକେତ୍‌ ବିଷୟତେ ଆରାମ୍‌ ପାହେମ୍‌ ଆଦିକାଡ଼୍‌ ନୁ ମାନାଡ଼୍‌ ନିଜେତ୍‌ ଶତ୍ରୁନଡ଼୍‌କ୍‌ ବଦ୍‌ଲା ଅଦ୍‌ତଡ଼୍‌; 25 ମେଣ୍ଡେ, ମାମେ ମିପାକେ ନିଜେତ୍‌ କାଇ ମାଲ୍‌ପି ମିୟାଦ୍‌ କାର୍କେ ଲେକେତ୍‌ ପରିଷ୍କାର୍‌ ମାଡ଼ିକାଡ଼୍‌ ନୁ ମିୟାୱୁ ସୀମାସାରେ ଟେଣ୍ଡି ଅଦିକାଡ଼୍‌; 26 ମେଣ୍ଡେ, ମାନାଡ଼୍‌ ମୁନେତ୍‌ କାଲାମ୍‌ ଲେକାମ୍‌ ମି ଶାସନ୍‌ତେ ନଡ଼କ୍‌ ନୁ ମୁନେତ୍‌ ସମୟ୍‌ ଲେକାମ୍‌ ମିଇ ମନ୍ତ୍ରିନଡ଼୍‌କ୍‌ ମେଣ୍ଡନ୍‌ଦାମ୍‌ ତିଆର୍‌ ମାଡ଼ିକାଡ଼୍‌; ତାନ୍‌ ପେର୍କେ ନିମେ ଦାର୍ମିକ୍‌ ଆଦ୍‌ତି, ବିଶ୍ୱାସ୍ତେ ନଗର୍‌ ଲେକାମ୍‌ ଏକାମ୍‌ ଆଦ୍‌ତେ। 27 ସିୟୋନ ନିୟମ୍‌ ବିଚାର୍‌ତଡ଼୍‌ ନୁ ଆଦିନାଗାଙ୍କ୍‌ ମାଲ୍‌ସ୍‌ ୱାଦାନ୍‌ ନାରୁଡ଼୍‌ ଦାର୍ମିକ୍‌ତଡ଼୍ ମୁକ୍ତି ପାହେମ୍‌ ଆଦ୍‌ତଡ଼୍‌। 28 ମାତର୍‌ ଦୁଷ୍ଟନାରୁଡ଼୍‌ ନୁ ପାପିନଡ଼୍‌ ଅଣ୍ଡୟ୍‌ଦାମ୍‌ ନଷ୍ଟ ଆଦ୍‌ତଡ଼୍‌ ନୁ ବେନଡ଼୍‌ ସଦାପ୍ରବୁଙ୍କ୍‌ ୱିଡ଼୍‌ସି ମିନ୍ଦେଡ଼୍‌, ଅଡ଼୍‌ ସାରେ ତଡ଼୍‌ ଡଲିତଡ଼୍‌। 29 ବାତେଙ୍କ୍‌ଇତ୍କେ ଅଡ଼୍‌ ମିଇ ଗେଲ୍‌ସ୍‌ତେ ଅଲୋନ୍‌ ମାଡ଼େ ବିଷୟତେ ସିଗ୍‌ ଆଦ୍‌ତଡ଼୍‌, ମେଣ୍ଡେ, ମିଡ଼୍‌ ନିଜେ ହେଞ୍ଚିଆସ୍‌ ମାନ୍ଦାନ୍‌ ଗୁଡ଼ାନ୍‌ ପାକେ ବିଷୟ୍‌ତେ ଆଇୱି ଆଦ୍‌ତିଡ଼୍‌। 30 ବାତେଙ୍କ୍‌ଇତ୍କେ ମିଡ଼୍‌ ୱାସ୍ତେଆକ୍‌ ଅଲୋନ୍‌ ମାଡ଼େ*1:30 ଇସ୍ରାଏଲ୍‌ତେ ଦକ୍ଷିଣ୍‌ପାକେ ବୂମ୍‌ତାଗ୍‌ ଆଲୋନ୍‌ ମାଡ଼ାକ୍‌ ଉଡ଼ାନଙ୍କ୍‌ ଆଦ୍‌ତେ ମାଡ଼୍‌ ନୁ ଏର୍‌ ଇଲ୍‌ୱାଗ୍‌ ପେଇତାନ୍‌ ବଗିଚା ଲେକାମ୍‌ ଆଦ୍‌ତିଡ଼୍‌। 31 ମେଣ୍ଡେ, ଶକ୍ତିତଣ୍ଡ୍‌ ନାରୁଣ୍ଡ୍‌ ୱାସ୍ତେତେ କାରା ଲେକାମ୍‌ ଅନାଦ୍‌ କାମ୍‌ କିସ୍‌ତାଡ଼୍‌ମିନ୍‌ ଲେକାମ୍‌ ଆଦ୍‌ତେ; ଆଦ୍‌ ରେଣ୍ଡ୍‌ ଅଣ୍ଡୟତାଗ୍‌ ନିଡ଼୍‌ତିତା ନୁ ବେନ ଆଦିଙ୍କ୍‌ ପିଇୟ।