18 Nya o, Ọvaar Ibinọkpaabyi oben bẹ́, "Kojibhẹ bẹ́, ojinọng oninga manchenẹ; kaam m’nsi oyok-ẹkaan kw’ọbaan-ẹ."
19 M’ogbese nwa, Ọvaar Ibinọkpaabyi kk’mgbaten maphyir ọsa, ọmaana ọnọhn f’ẹrọng, ọtọka bẹ ochena ọnọng nwo bẹ́, okpe bẹ ache. Eche kpenamkpen ch’ojinọng nwo oyerẹ ọttọhk kpenamkpen f’orukọ akpen, dẹ dọ ede eche chẹ. 20 Minna kw’ojinọng nwo okpe etirakpo, ọmaana ọnọhn f’ẹrọng, ọttara mgbaten maphyir ache.
Ṉ́nòde ojinọng nwo, oyok-ẹkaan kw’ọbaan-ẹ koze. 21 Nya o, Ọvaar Ibinọkpaabyi osi ojinọng nwo otto ọda bẹ́ ttoobh. Ch’oning nya ọttaabh ọda, ọrọbha otitaanchakpa wanẹ kwẹ, otima ẹkpakpa obubha ibyi njo. 22 Ọvaar Ibinọkpaabyi otima otitaanchakpa nwo kw’ikk’ọrọbha ny’ojinọng k’ifor, osi kwanọng, ọtọk-ẹ ochena ọjinọng.
23 Ojinọng nwo oben bẹ́,
"Ma wọ ode ọkọbhọ kw’akọbhọ paam,
ọmaana ẹnang ch’anang paam.
Mmin’ad-ayer-ẹ bẹ́, kwanọng
okurọ ch’marọhbh-ẹ k’ojinọng k’ifor."
24 Ofona nya, ojinọng m’obina orik otte ọttara ọkka, ọd-ọgbaka ifor ọmaana kwanọng kwẹ, mfha bẹ anọng mbo afa makwu ade mawanẹ.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)