Salmos 132

Devidi nee Ɛlɛne ne ziale rale

1 O Nana Nyamenle, mmamaa ɛ rɛle fi Devidi, ɔ nee ye anwubɛnyunlu kpokpoti mɔɔ ɔvale nu la. 2 Kakye, O Nana Nyamenle, ye ɛwɔkɛ ne mɔɔ ɔbɔle, ndane ne mɔɔ ɔhanle ɔmaanle wɔmɔ, Bedevinlinli ne mɔɔ le Gyekɔbo ye Nyamenle ne la: 3 "Menrɛhɔ me sua nu, anzɛɛ menrɛla. 4 Menrɛlie me ɛnwomenle bɔbɔ, anzɛɛ menrɛbɔ ngɔsɔkɛ, 5 kɔkpula kɛ menwɔnyia ɛleka menwɔmaa Nana Nyamenle, tɛnlabelɛ mɔɔ mebava meamaa Bedevinlinli Kpole Ko ne mɔɔ le Gyekɔbo ye Nyamenle ne la."

6 Yɛdele Ɛlɛne ne anwo edwɛkɛ wɔ Bɛtelɛhɛm, na yɛnwunle ye noko wɔ Gyaa ɛya ne mɔ anu. 7 Akee yɛzele kɛ, "Bɛmaa yɛhɔ Awulae Asɔne Sua ne anu; bɛmaa yɛzonle wɔ ɔ gyakɛ abo ebia ne anwo." 8 O Nana Nyamenle, dwazo, na fa wɔ Ngyekyeleɛ Ɛlɛka ne mɔɔ le ɛdawɔ wɔ tumi ne ye sɛkɛlɛneɛ la wolo wɔ Nwuanzanwuanzaleka ne, na tɛnla ɛkɛ ne wɔ melɛ mɔɔ ɔnlɛ awieleɛ la.

9 Maa wɔ azɛlɛvolɛ dahuu ɛva tenleneyɛlɛ tɛladeɛ ɛwula; maa wɔ nwuanzanwuanzama ne mɔ ɛdeɛdea nu wɔ fɛlɛkolilɛ nu, wɔ wɔ sonvolɛ Devidi ati.

10 Ɛbɔle wɔ sonvolɛ Devidi ɛwɔkɛ; mmamaa ɛkpo wɔ belemgbunli ne mɔɔ ɛdawɔ wɔva nwole wɔkpokpa ye la, O Awulae. 11 Ɛhanle ndane mɔɔ di munli la ɛhilele Devidi, ndane mɔɔ ɛnrɛzia ɛnrɛhakyi ɛ nloa wɔ nwo a: "Mebaye ɛ mra mrenyia ne mɔ anu ko belemgbunli, na yemɔ yɛɛ bali wɔ ebia ne agya a. 12 Saa ɛ mra ne mɔ di me ɛwɔkɛ ne, ɔ nee me daselɛlilɛ ne mɔ mɔɔ meva memaa bɛ la azo a, bɛ mra noko bali wɔ agya wɔ mekɛ biala kɛ arelemgbunli."

13 Nana Nyamenle ɛnlea nu ɛye Zayɔn; na ɔkulo kɛ ɔkɛva ɛkɛ ne ɔkɛyɛ ye tɛnlabelɛ: 14 "Ɛke yɛɛ bayɛ me ɛnwomenlelielɛ tɛnlabelɛ dahuu a; ɛke yɛɛ mebadɛnla na meali me belemgbunli ne a. 15 Mebava Zayɔn ye ngyianlɛndeɛ kpokpoti meamaa ye; mebamaa ye ehyiavolɛma ne mɔ aleɛ meamaa bɛ kunlu adwo bɛ nwo. 16 Mebava ngoanelielɛ meaheda ye sɛlɛvolɛma ne mɔ anwo zo kɛ ɛdanlɛ la, na ye menli ne mɔ bado edwɛne bɛali fɛlɛko bɛadeɛdea nu. 17 Ɛkɛ ne yɛɛ mebayɛ Devidi abo zo amra ne mɔ anu ko belemgbunli kpole a; ɛkɛ ne yɛɛ mebayila me belemgbunli ne mɔɔ meye ye la ye maamulɛ zo a. 18 Mebava anyunluguase meaheda ye kpɔvolɛma kɛ ɛdanlɛ la; na emomu, ye belemgbunli abotile ne bada hyeleenyi."