1 Aleɛabo amra, bɛ muala bɛva fɛlɛkolilɛ nee anyelielɛ bɛye Nyamenle ayɛlɛ. 2 Bɛdo ye anyunlunyia ne anwo edwɛne; na bɛva anyunlunyia bɛye ye ayɛlɛ!

3 Bɛze Awulae Nyamenle kɛ: "Nea nwanwane ninyɛne mɔɔ ɛyɛ a! Wɔ tumi ne le totohyia la ati, wɔ kpɔvolɛma fa ɛzulolɛ a koto ɛ nyunlu a. 4 Ewiade amra kpokpoti sonle wɔ; bɛto ayɛlɛyelɛ edwɛne bɛmaa wɔ. Bɛto ayɛlɛyelɛ edwɛne bɛkanvo wɔ duma." 5 Bɛrɛla bɛranlea mɔɔ Nyamenle ɛyɛ: nwanwane nyɛleɛ mɔɔ yeyɛ yemaa menli la. 6 Ɔhakyile nyevile tɛtɛtɛlɛlɛ ne azɛlɛ ne ɔyɛle ye azɛlɛ reserese; na yɛ mgbanyima pɛle azule ne wɔ bɛ gyakɛ anu. Ɛkɛ ne yɛɛ yɛlile fɛlɛko wɔ mɔɔ yeyɛ la anwo a.

7 Yemɔ mɔɔ ɔlua ye tumi nu ɔsie ewiade wɔ melɛ mɔɔ ɔnlɛ awieleɛ, na ɔ nye wɔ maanle maanle nwo zo, mmamaa bɛdabɛ mɔɔ bɛko bɛtia ye la dwazo.

8 Maanle maanle kpokpoti, bɛhanvo yɛ Nyamenle; bɛmaa bɛde bɛ nganvolɛ ne wɔ ɛleka biala. 9 Yemɔ mɔɔ yemaa yɛtɛte ngoane nu, na yɛtɛnwunle ewule ɛlɛ a. 10 O wɔmɔ Nyamenle, wɔzɔ yɛ wɔnlea! Kɛmɔ dwinvolɛ kolo ye dwɛtɛ fufule wɔ senle zo la, zɔhane ala yɛɛ wɔzɔ yɛ wɔnlea a. 11 Ɛmaa yɛtɔ ɛhane nu, na ɛfa adesoa mgbole mgbole ɛsoɔzoa yɛ. 12 Ɛmaa yɛ kpɔvolɛma tietia yɛ nwo zo. Ɛvale yɛ ɛluale senle nee azuyilɛ nu; na kɛkala, wɔye yɛ wɔvi munzule nu, ɛ nee yɛ ɛra file zo.

13 Mebava ɛyelalɛ azubɔdeɛ meara wɔ aako nu; na mearadua me ɛwɔkɛ ne mɔɔ membɔle wɔ la meamaa wɔ. 14 Mebava mɔɔ mengɔle ɛmianlɛ nu la menganle la meamaa wɔ. 15 Mebava mboane ɛyelalɛ azubɔdeɛ meamaa wɔ; mebava nlankɛ nee mbɔnkye azubɔdeɛ meamaa wɔ; na nyɛmoa ne mɔ bɛ esike ne adwu ɛ nwo lɔ wɔ anwuma nehane.

16 Bɛrɛla bɛradie, bɛdabɛ mɔɔ bɛdi Nana Nyamenle eni la amuala; mebabɔ mɔɔ yeyɛ yemaa me la nolo meahile bɛ. 17 Menzunle menvɛlɛle ye moalɛ, na me tafinlima yele ye ayɛlɛ. 18 Saa menvale ɛtane menziele me ahonle nu a, anrɛɛ Awulae andie me. 19 Nɔhalɛ nu, Nana Nyamenle ɛdie me; yedie me nzɛlɛlɛ.

20 Nyilalɛ ɛha Nana Nyamenle, ɔluakɛ yeamkpo kɛ ɔkɛdie me nzɛlɛlɛ, anzɛɛ kɛ ɔkɛye ye ɛhulolɛ kpundii ne ɔkɛvi me nwo zo!