1 O Nana Nyamenle, dwazo, bɔ wɔ kpɔvolɛma asande; maa bɛdabɛ mɔɔ bɛkpɔ ye la ɛnriandi ɛvi ɔ nyunlu. 2 Kɛmɔ bɛwuda esike bɛmaa ɔkɔ la, zɔhane ala yɛɛ wuda bɛ maa bɛhɔ a. Kɛmɔ ehuaba kolo wɔ senle nu la, zɔhane ala a maa kpɔvolɛma ɛholo wɔ Nyamenle nyunlu a!

3 Emomu, maa tenlenema anye ɛlie, na bɛli fɛlɛko wɔ Awulae anyunlu; maa bɛva anyelielɛ bɛli fɛlɛko! 4 Bɛdo edwɛne bɛmaa Nana Nyamenle; bɛdo ayɛlɛyelɛ edwɛne bɛmaa ye duma ne. Bɛdo edwɛne bɛmaa ahenle ne mɔɔ lua amungu nu la, ye duma a le Awulae; bɛli fɛlɛko wɔ ɔ nyunlu! 5 Nrisa mralɛ bɛ ze, ɔ nee ahunlavolɛ bɛ sinzavolɛ, kɛ Nana Nyamenle de wɔ ye tɛnlabelɛ nwuanzanwuanza ne anu la ɛne. 6 Nana Nyamenle maa baholɛ nyia abusua; ɔmaa efiadedavolɛma nyia fanwodi; na emomu nzakatovoma ɛdeɛ, ɔmaa bɛtɛnla alɔbɔlɛ nu.

7 O Nana Nyamenle, mekɛ mɔɔ ɛlile wɔ menli ne mɔ anyunlu, ɛvale bɛ ɛpɛle ɛsɛlɛ ne la, 8 azɛlɛ wozole, na ezule dɔle totohyia wɔ Nyamenle nyunlu. Boka Saenae wozole wɔ ɛ nyunlu, wɔmɔ Yizilayɛ Nyamenle. 9 Ɛmaanle ezule dɔle bilididi, O Nana Nyamenle; na ɛmaanle azɛlɛ mɔɔ ɛhete la nyianle nzule. 10 Wɔ menli nyianle azɛlɛ kpalɛ dɛnlanle zolɛ. Wɔ wɔ ahunlunyele nu, O Nana Nyamenle, yɛɛ ɛmaanle ehyiavolɛma nyianle bɛ ngyianlɛndeɛ a.

11 Awulae fa mɛla ne ɔmaa, na menli bɔ ye nolo. 12 Arelemgbunli nee bɛ ɛlɔnema nriandi gyakyi bɛ konle ninyɛne wɔ bɛ nzi; na mraalɛ mɔɔ wɔ sua nu la kyɛ konle nwo nvasoɛ ne fa. 13 Bɔbɔ bɛboka mboane ekpunli nwo ɛdeɛ, noko akee bɛle kɛ abubule ndɛba mɔɔ bɛholo dwɛtɛ fufule bɛgua nwo la. Bɛ ndɛba ne mɔ ta kɛ nvutuke. 14 Mɔɔ Nana Nyamenle Bedevinli ne zandele arelemgbunli ne mɔ wɔ Zalemɔn azo la, ɔmaanle asukɔntweaba dɔle wɔ ɛkɛ ne.

15 O Beeshyan, boka bedevinli! Duzu boka a le wɔ, mɔɔ ɛ sa zo zonle zɛhae a? 16 Duzu ati a ɛmaa ɛ nye bolo Boka bedevinli ne, Boka ne mɔɔ Nana Nyamenle ɛva ɛyɛ ye tɛnlabelɛ, ɛleka ne mɔɔ Nana Nyamenle badɛnla wɔ melɛ mɔɔ ɔnlɛ awieleɛ la ɛ? 17 Mɔɔ bɛlɛ konlendeɛ ehwili mɔɔ kɛyɛ kɛ apenle bulu, mɔɔ bo mgbe mgbe bɔbɔ la, Awulae vi Saenae rale nwuanzanwuanzaleka ne. 18 Ɔfo ɔkɔ anwuma anwuma, ɔ nee menli mɔɔ yehye bɛ nuokɛ la dɔɔnwo a kɔ a. Ɔnyia ahyɛlɛndeɛ dɔɔnwo ɔfi menli mɔɔ ko tia ye la ɛkɛ; Awulae Nyamenle baboa ɛkɛ.

19 Bɛye Awulae ayɛlɛ, yemɔ mɔɔ alehyenlɛ dahuu ɔzo yɛ adesoa la; yemɔ a le Nyamenle ne mɔɔ die yɛ ngoane la a.

20 Yɛ Nyamenle ne le Nyamenle mɔɔ die ngoane a; ɔle yɛ Awulae, mɔɔ le yɛ mu yɛ Awulae, mɔɔ ye yɛ fi ewule nu a. 21 Nana Nyamenle bagelegele yɛ kpɔvolɛma ati, bɔbɔ bɛdabɛ mɔɔ bɛse bɛnrɛgyakyi ɛtanelilɛ la. 22 Awulae ɛha ye kɛ, "Mebava bɛ kpɔvolɛma meazia meavi Beeshyan meara; me nee bɛ bazia avi nyevile ne akɔme zo hwehwe nehane ara, 23 amaa bɛatietia bɛ mogya nu, na bɛ ahwea anyia bɛ mogya ne bie dɔɔnwo atafetafe."

24 O Nana Nyamenle, menli kpokpoti ɛnwu wɔ konimlilɛ ɛlɔnwɔne ne mɔ, ɛlɔnwɔne ne mɔ mɔɔ kile Nana Nyamenle, me Belemgbunli ne sua nwuanzanwuanza ne anu ɛhɔlɛ la. 25 Edwɛndovolɛma lumua, yɛɛ aweɛnebɔvolɛma li amozi; wɔ ekpunli nwiɔ ɛhye avinli, mbɛlɛra ɛlɛwozo awa. 26 "Bɛye Nyamenle ayɛlɛ wɔ ayiaku kpole ne anu! Bɛye Nana Nyamenle ayɛlɛ, O Gyekɔbo amra kpokpoti!" 27 Bɛngyaman eku ɛdeɛ ne, mɔɔ le bɛ nuhua ekyi kpalɛ la yɛɛ lumua a; mɔɔ doa ye la a le Dwuda ekpunli ɛdeɛ ne, yɛɛ Zɛbulɛn nee Nafetalae eku ɛdeɛ ne mɔ a li amozi a. 28 Kile wɔ tumi, O Nana Nyamenle, wɔ anwosesebɛ ne mɔɔ wɔva wɔho wɔ yɛ ti la.

29 Kɛmɔ asɔne sua nwuanzanwuanza ne wɔ Gyɛlusalɛm la ati, arelemgbunli fa ahyɛlɛndeɛ bɛlɛ wɔ. 30 Twi nyɛmoa mɔɔ wɔ ndile nu la anyunlu! Twi maanle maanle mɔɔ le kɛ nlankɛ nyinli nee mbɛda la anyunlu! Tietia bɛdabɛ mɔɔ bɛkulo ayɛlɛyelɛ la anwo zo, na bɔ menli mɔɔ kulo konle la asande. 31 Katakyiema vi Yigyibiti bara; na ndɛndɛ zo ala, Yiteɔpea badɛlɛ ɔ sa nu azɛlɛ Nana Nyamenle moalɛ. 32 O ewiade arelemgbunli, bɛdo ayɛlɛyelɛ edwɛne bɛhanvo Awulae. 33 Yemɔ mɔɔ ɔlua anwomanyunlu, tete anwomanyunlu, tie ye kɛ ɔlɛ ɛnelɛ kpole ɔlɛtea nu a!

34 Bɛva tumi kpole ne bɛmaa Nyamenle, yemɔ mɔɔ ye belemgbunlililɛ komo Yizilayɛ amuala anwo zo a; ye tumi keda anwomanyunlu amuala anwo zo. 35 Nana Nyamenle, Yizilayɛ Nyamenle ne anwo yɛ ɛzulolɛ wɔ ye nwuanzanwuanzaleka ne. Ɔfa tumi nee anwosesebɛ ɔmaa ye menli. Nyilalɛ ɛha Awulae.