Salmos 75

Nyamenle ne mɔɔ bua Maanlesievoma ndɛne la

1 Yɛyɛ wɔ mo, O Nana Nyamenle, yɛyɛ wɔ mo. Yɛbɔ wɔ duma, na yɛka wɔ nwanwane ninyɛne ne mɔ mɔɔ wɔyɛ la.

2 Nana Nyamenle se, "Saa menyia mekɛ kpalɛ a, menwɔbua ndɛne pɛlepɛle. 3 Saa azɛlɛ wozo, ɔ nee ye nuhua menli kpokpoti a, mame yɛɛ memaa ɔgyinla kpundii a.

4 "Meka mekile bɛdabɛ mɔɔ bɛtu bɛ nwo la kɛ, Bɛmmatu bɛ nwo; yɛɛ mese amumuyɛvoma noko kɛ, ‘Bɛmmamemaa bɛ nwo zo; 5 bɛmmayɛ bɛ mbati ngengɛndɛɛnye, anzɛɛ bɛmmakyengye bɛ nwo bɛtendɛ.’ " 6 Ɔluakɛ ndɛnebualɛ ɛnvi sɛnzɛne aduduleɛ anzɛɛ ye adɔleɛ; ɔnvi fiemgbole zo anzɛɛ boka zo; 7 na emomu Nana Nyamenle yɛɛ bua ndɛne a. Ɔbu bie mɔ fɔlɛ, yɛɛ ɔbu bie mɔ benle. 8 Nana Nyamenle lɛ kɔpo wɔ ɔ sa nu, mɔɔ ye ɛyavalɛ ɛyi ye tɛkɛɛ kɛ nza ɛsesebɛ a. Ɔbawola yeagua azɛlɛ ye azo, na ɛtanevolɛma anlo ye kpokpoti adu ɔ bo. 9 Na mame ɛdeɛ, mebali fɛlɛko mɔɔ ɔnlɛ awieleɛ. Mebado edwɛne meaye Gyekɔbo Nyamenle ne ayɛlɛ. 10 Mebapepɛ ɛtanevolɛma mɛne ne mɔ meagua bɛ lɔ, na tenlenema mɛne ɛdeɛ ne mɔ, yemɔ bɛbakpogya zolɛ anwuma anwuma.